Read Car_Nicobarese INMEUKHÖMAT 7 Bible Online

INMEUKHÖMAT 7 - Car_Nicobarese bible

INMEUKHÖMAT 7

¹Fën tak yik Ma-ahānga tömeūkö tö chu, unôichrit ngih, sökhaka nö i nup tö fën sinkeukngö ngih panam, pòn sōtu nö fötöre kuföt nö ing panam, hēk el mai, hēk i rōi chōn.

²Ngaich meuk tahëng Ma-ahānga chū-ö, yônlö nö löklö lā maneutlö ngam tavūöi, īnu tö minkahngö ngam tö-aṅ Tēv; ngaich hūkö yip tö fën tak anga-aṅ Ma-ahānga nö pōitô, yip tö kē-ĕvkūö nö hachök ngih panam, mai inrē;

³Ngö ṙô, Un hachökö ngam panam, un rēhĕn ngam māl, uh rēhĕn në chōn; hanöng saha tī hī mikahngö mal yip kūön ngam Tēv.

⁴Ngaich chū-ö hang ṙôken yip tö mikahayö, hēngòng fën anāi fën köṅny, tömikahayö i tum miyöngö yik kūön Israĕl.

⁵Nët sīön köṅny tö mikahayö i miyöngö Yūtā. Nët sīön köṅny tömikahayö i miyö- ngö Rūpen. Nët sīön köṅny tömikahayö i miyöngö Kāt.

⁶Nët sīön köṅny tö mikahayö i miyöngö Asēr. Nët sīön köṅny tö mikahayö i miyöngö Neftalī. Nët sīön köṅny tö mikahayö i miyöngö Manasē.

⁷Nët sīön köṅny tömikahayö i miyöngö Sumōn. Nët sīön köṅny tömikahayö i miyöngö Lēvi. Nët sīön köṅny tömikahayö i miyöngö Issakār.

⁸Nët sīön köṅny tömikahayö i miyöngö Sepūlön: Nët sīön köṅny tömikahayö i miyöngö Yôsĕf. Nët sīön köṅny tömikahayö i miyöngö Penyamin.

⁹Unôichrit u, chū-ö meuk tömaṙôngö töt kanṙeūken tarik, aṅ i taṙòkhöre pūlngö, miyöngö tarik, ëlô inrē. Sökhaka i kūö kantēra ngam pököre inrē, inyūtuvö tö tö-aṙū-uti tö-isoh, aṅhaṅv eltī inrē tö rōi kachūr.

¹⁰Ngaich pōitô cha-a nö ngö ṙô, Inyööken aṅ im Tēv hī, ngam amūichhak nö el kantēra; im pököre inrē.

¹¹Ngaich ṙòkhöre më ma-ahānga nö havīlö ngam kantēra, havīlö yip yöngṙen, nup tö fën nòng inrē tö-aṅ chehechōn; ngaich fāttökūöre cha-a nö i kūö ngam kantēra; ngaich salām ngam Tēv,

¹²Nö ngö ṙô, Āmen. Inkôlò, kanôlò, mikah, nöiyö, ineū-euṅ, chöngö, minhôiṅyö inrē, aṅ i ngam Tēv hī, nöng örheūheu. Āmen.

¹³Ngaich hĕng tak ök aṅ i yik mā tö ngö ṙô tö chu, nö sap ṙô, Achīö aich vē, tö hayūtö tö tö-aṙū-uti inyut tö-isoh, ṙā-ang yih aich inrē?

¹⁴Ngaich ngö ṙô chū-ö tö ò, Me-eṅ man tö akahalōn. Ngaich ngö ṙô anga-aṅ tö chu, Cha-a yin vē ṙamā-ang el ök yöng kanihngen, ngaich cha-a nö söich minë tö aṙū-uti inyutre, nö i mahām ngam pököre nö mī-isohnyö mat u.

¹⁵Lökten yin cha-a nö i kūö ngam kantēra ngam Tēv; ngaich lök la-en Ò cha-a nö peuheū harap, nö el ngam töhet chūök. Ngaich anga-aṅ ngam amūichhaka nö el ngam kantēra, nö hanyāṅknyö ngam inrūkuire min nö i kui cha.

¹⁶Öt kapahare yin min nö ngaich, ötrēhĕn nö haṙëhe nômö; öt rēhĕn ngam tavūöi min nö rātökui tī tö cha, öt rēhĕn nup yô-òv ṙanāichö:

¹⁷Pò ngam Pököre ngam ellōn ngam kantēra nö yōm cha min, ngaich hachōten cha min nö i nup töhëmlö mak nômö; ngaich min ngam Tēv nö chūtngö makmat cha, nö ṙā-ang i mat cha.