Read Car_Nicobarese INMEUKHÖMAT 8 Bible Online

INMEUKHÖMAT 8 - Car_Nicobarese bible

INMEUKHÖMAT 8

¹Ngaich hē ò nö ṙòngnyö ngam sinātö inpanngö, tömörit tök chanëvö el halīöngö, sā rô-òten tö ròngti i tö hĕng köṅny ṙô.

²Ngaich meuk yik tö sat tak chū-ö Ma-ahānga, yik samökhaka nö i kūö ngam Tēv; sat nuk fanöö kinë-eṅkūö cha.

³Yihtöre ök tahëng Ma-ahānga nö ik tahāklö, aṅhaṅv-in tök humlum inhus lōpān; ngaich pōyen kinë-eṅkūö anga-aṅ tö lōpān, pòn hōtu anga-aṅ nö aholtö e nö i nup ṙô yip töhet vine-eṅkūö tēv, nö el öp humlum tahāklö, ök i kūö ök kantēra.

⁴Ngaich ök lul nuk lōpān, nö hol nuk vinë-eṅkūötēv ṙô yik töhet, yônlö nö i kūö ngam Tēv nö löklö eltī ök Ma-ahānga.

⁵Ngaich ök Ma-ahānga nö kēḵ ök inhus lōpān; ngaich hatöḵöl e tö tameūyö aṅ ik tahāklö, ngaich suktö e nö i kui ngih panam: tömörit ngaich tö nuk kunṙôkö, ṙënṙô, hanyālö, kumyeūnö inrē.

⁶Hīnöre ngaich yik tö sat tak Ma-ahānga nö föö.

⁷Föö ngaich ök raneh, tömörit ṙô tö nuk tökënngöre kumṙah, tameūyö inrē; kalūöchöre tö mahām, suktu anū-ö ngaich nö i kui ngih panam: ṙāpngö ngaich ök linūöi lā ngih panam, ṙāpngö minë linūöi lā nuk chōn, ṙòkngöre nup tö-ayal kiyôp nö ṙāpngö.

⁸Föö ngaich ök innët tak Ma-ahānga, ngaich angū-ö nö sā öp tökiröng rôngö tö ökti tö kūö tameūyö, ngaich suktu nö el mai: vīngöre ngaich ngam linūöi lā ngam mai nö mahām;

⁹Ngaich kapah nuk linūöi lā tö-aṅ më-el ngam mai, anū-ö, nuk tö unhômuvö; lëlngö ngaich nup linūöi lā minë chōng.

¹⁰Föö ngaich ngam linūöi tak Ma-ahānga, ngaich hĕng ök tökiröng taneūsömat tö suktöre nö ṙā-ang el halīöngö, hūkūö sā tanyukngö, ngaich suktöre angū-ö nö im linūöi lā minë tahël, i kui nup töhëmlö mak inrē;

¹¹Ngaich öp minënyö ök taneūsömat nö kaheūkö nö Tö-angū-öv chōn; ngaich ök linūöi lā minë mak nö vīngöre nö Tö-angū-öv chōn, pòn vī-iyö anū-ö nö angū-övö.

¹²Föö ngaich ngam finën tak Ma-ahānga, ngaich ngam linūöi lā ngam tavūöi nö chökngöre, ane inrē ngam linūöi lā ngam chingëṅt, ane inrē linūöi lā minë taneūsömat; pòn hōtu minë linūöi lā u nö sumngūli, ngaich ngam sakāmö nö öt yang nö im linūöi lā e, ngatī ngam hatööm.

¹³Ngëicha ngaich chū-ö, ngaich hang ṙô ök matēṙö, kiteū nö ellōn ngam halīöngö, nö ngö ṙô nö pōitô, Ötkanôlò, ötkanôlò, ötkanôlò cha yip mī-iyöng eltumlat, kūö nuk tahëng ṙô nup fanöö yik tölūöi tak Ma-ahānga, yip tö öl nö föö.