Read Car_Nicobarese INMEUKHÖMAT 9 Bible Online

INMEUKHÖMAT 9 - Car_Nicobarese bible

INMEUKHÖMAT 9

¹Ngaich föö ngam tinneui tak Ma-ahānga, ngaich meuk taneūsömat chū-ö, hĕng tö suktöre nö eltumlat nö ṙā-ang el halīöngö: ngaich kētu nö in ò ök tinkīök öp ṙeūvö töt lātaṙeū-euvö.

²Ngaich anga-aṅ nö löpnyökūö öp ṙeūvö töt lātaṙeū-euvö, tafūnlöng ngaich ök lul nö löklö ël ök ṙeūvö, sā lul tökiröng tameūyö; sangūli mat ngaich ngam tavūöi, tö ngam kupööi inrē, tö kūö ngam lul lamöklö el ngam ṙeūvö.

³Ngaich löknyö ël ök lul nuk hāiyö nö meutnyi nö teunghökui ngih panam; ngaich kē-ĕvkūö anū-ö tö minhôiṅyö, sā në ka-ëp ing panam nö īnu tö minhôiṅyö.

⁴Ngaich tölô anū-ö nö sōtu nö chökhuṙen tö nup kiyôp ing panam, ötrēhĕn tö nup töng tö-uhāv, ötrēhĕn tö nup töng chōn, höng yip tarik pöri, yip töt minkahngu nö i mālre tö minkahngö aṅ im Tēv.

⁵Ngaich kē-ĕvkūö cha-a, pòn sōtu nö fëlngen cha, hōtu pöri cha-a nö hachökö nö haṙeika nö taneui chumngëṅtö, ngaich ap inchökö inṙeikö cha nö sā chanökhukūö ka-ëp yĕn kap tarik.

⁶Lukkö kinpaha min yip tarik i nup sakāmö anū-ö, ngaich öt löktu nö kôtökūö tö e; hòṅ lōntö kinpaha cha-a, falngöre pöri min ngam kinpaha nö ṙā-ang in cha.

⁷Sā kōra nup min hāiyö, nup töhalēnö nö i kinyūngö; el kui u inrē nup sapīöv tö sā humlum, ngaich nup kūö u inrē nö sā kūö tarik.

⁸Keūyu anū-ö tö tösā keūyö kikānö, ane inrē nup kanap u, nö sā kanap laiyön.

⁹Lanāku elngòh anū-ö inrē tö sā vët lanak elngòh; ngaich nup ṙënṙô inröl nup tömaṙôngö kōra mahaveuttöre nö i kinyūngö.

¹⁰Rītu anū-ö tö tö sā rit ka-ëp, chökhukūö inrē; i nup rit u nup minhôiṅyö u nö taneui chumngëṅtö nö hachök tarik.

¹¹Lātulöng tö u nö sā rācha, ap Ma-ahānga aṅ i ngam ṙeūvö töt lātaṙeū-euvö: Apatön minënyi ap tö ṙô Heprāi, i ëlô Krik pöri ap minë-eny ò nö Apōlön.

¹²Ngāichö röön ök raneh öt inkôlò: yĕh meuk, nëttöre nup ötinkôlò yamih nö unôich tö ngih.

¹³Föö ngaich ngam tinfūöl tak Ma-ahānga, ngaich chū-ö hang ök ṙënṙô nö löknyö el nuk sinrōl mī-i ngam humlum tahāklö, ngam mī-i kūö ngam Tēv.

¹⁴Hĕng tak ök tö ngö ṙô tök tinfūöl tak Ma-ahānga, ök tö aṅhaṅv-in tö fanöö, Luhlö yip tö fën tak Ma-ahānga, yip tönyëki nö ip tökiröng tahël Yufratīs.

¹⁵Luhlöng ngaich yik tö fën tak Ma-ahānga yip töhalēnö nö i tum köṅnyṙô, tum sumkam, tum chumngëṅtö, tum samyeūheu inrē, nö hōtu nö fëlngö yip linūöi lā vē tarik.

¹⁶Ngaich ök ṙôken yik kumyung, yik tö kōravö tarik, nö nët van söm köṅny tum van tö van tö söm köṅny: hang ṙôken cha chū-ö.

¹⁷Ngatī mat chū-ö meuk nuk kōra tö hameuktu, yik mī-i-uk u inrē, lanāku elngòh cha-a tö tö sā tameūyö, tö sā hayasin, tö sā tö hūkūö ihong inrē: ngaich nuk kui nuk kōra nö sā kui lāyön; ngaich löknyö elvāng u nö meutnyi, tameūyö, lul, nup töhūkūö ihong inrē.

¹⁸Kūö në tö lūöi tö lëlngökūö invah, nö lūöi milā-a yip tarik nö kapah, kūö tameūyö, lul, nup töhūkūö ihong inrē, nuk lamöknyö elvāng u.

¹⁹Pò nuk minhôiṅyö nuk kōra nö elvāng u, i rit u inrē; pò nup rit u nö sā pēch, nö kūyuvö; aṅtī tö u anū-ö nö hachök.

²⁰Ngaich yip tö ōtngöre tarik, yip töt kapah tö kūö në tö lëlngökūö invah, öt havööngökūöre nö ṙā-ang i nup vahīṙen minë kuntīre, nö uh nö salām më sī-ö, nup aṅ i humlum insātēv, aṅ i rupīö, aṅ i mās, aṅ i ihong, aṅ i chōn: inrē; nup töt rēhĕn nö meuk, öt hang, öt kiröönngöre inrē:

²¹Öt havööngö ellōnre cha-a nö ṙā-ang i finël tarik töre, ötrēhĕn nö ṙā-angre nö i milūönöre, ötrēhĕn nö ṙā-angre nö i chinô-òṅkānö, ötrēhĕn nö ṙā-angre i unlāya töre.