Read Car_Nicobarese RŪT 2 Bible Online

RŪT 2 - Car_Nicobarese bible

RŪT 2

¹Ngaich hĕng tak ök tarik mak alaha ök pīhö Naōmī, töminā-aṅvö, tökôlò aṅ mupīhö Elimelek; Pō-as ök minënyö ò.

²Ngaich Rūt ök aṅ Mô-āp nö ngö ṙô tö Naōmī, Hökngen chu man kiröönngöre im panô-òṅ, öich chap nup ṙòng unôichrit ò ngam chūök chu min kôtökūö tö inkôlò. Ngaich ngö ṙô anga-aṅ tö ò. Kūṙòh kūön chu kikānö.

³Kiröönngöre ngaich anga-aṅ, yihtöre ngaich nö el panô-òṅ ngaich unôichrit yik mū-uvòh nö chap: ngaich anga-aṅ nö söktöre el ök kamnāchö panô-òṅ Pō-as, ök aṅ mupīhö Elimelek.

⁴Chalô ngaich Pō-as nö ṙā-ang Petlihem, ngaich ngö ṙô tö yik mū-uvòh. In yīö An yēḵ ngam Mā Tēv. Ngaich sap ṙô ò cha-a nö ngö, Hakôlò meh An yēḵ ngam Mā Tēv.

⁵Ngaich ngö ṙô Pō-as tök tarikre, ök yöngṙen yik mū-uvòh, Kūön chīö ang ngòh kikānö?

⁶Ngaich ök tarik ök yöngṙen yik mū-uvòh nö sap ṙô ò nö ngö ṙô, Aṅ Mô-āp an holröön Naōmī nö havan nö ṙā-ang panam Mô-āp:

⁷Ngö ṙô an taheui, Vë-ekūö meh chin, hökngen chu chap, hamūl inrē unôichrit më mū-uvòh i minë unvôsö: lökten an nö yih: ngaich nöng öt ṙākenre löktökūö peuheū söl ing töngamuh, höng rahëchtaṙen an nöng ngöh nö i patī.

⁸Ngaich Pō-as nö ngö ṙô tö Rūt, Kūön chu kikānö, öt hang ömeh? Uh man kiröönngöre chap el panô-òṅ tahëng, um rēhĕn kiröönngöre ṙā-ang ihih ngöh pöri ihih haköpngöre i më tarik chu kikānö.

⁹Haköpmatre më-eṅ tö ngam panô-òṅ tö-uvôhò tö cha ngaich tömrit cha më-eṅ: röh öich ngāichô tö më ṙāl tarik nö un suhken meh? Ngaich yē meh haṙehe nômö, kuṙòh chuh i minë neū-euṅ man, ngaich òk i minë fahòklö më ṙāl tarik.

¹⁰Afukngöre ngaich anga-aṅ nö lā kūöre, sōntöre nö el tumlat, ngaich ngö ṙô tö ò, Kūöyòh öich aheukhuvö ikūö meh, öm akahakūö tö chu, yē chu öich aṅ tahëng.

¹¹Ngaich ngö ṙô Pō-as nö sap ṙô ò, Keuheūtnyöre inmeukti an nö in chu, tö tī meh ip yöng pīhö meh kikānö hēten tö kinpaha ök pīhö meh: tö inlahen meh ṙāngö yöngre tö kikōnyö kikānö inrē, ṙāngö panam chūök kinyônyöre inrē, ngaich yih öm i tarik vē töt mikahkūö meh sin misī.

¹²Havahlö ngam la-en meh an yēḵ ngam Mā Tēv, hateung ṙôken tīre an yēḵ ngam Mā Tēv nö kētö raneushö meh, ngam Tēv Israĕl, ngam tö-aṅhaṅv elkatòh sanëòk chūök meh yih hanyatlöre.

¹³Ngaich ngö ṙô anga-aṅ, Mā chu, hökngen chu yēḵ kôtökūö tö neūkölōn ikūö meh, tön ngaich man yih haṙamkölōn, chu, ngaich inrē öm aheūkölōn, tö chu, ngaich inrē öm aheūkölōn, chu, ngaich inrē öm aheūkölōn ṙô i ngòh kūönre kikānö, pòrô chū-ö öt aṅ in yip tarik meh kikānö.

¹⁴Ngaich hē el nyinā-aṅ ang Pō-as nö ngö ṙô tö ò, Yih man ihih, nyā inrē i në nyā-aṅkūö, kasum nyā-aṅre el ngam töhikīölhu vāin. Ūichngöre ngaich anga-aṅ nö in yik mū-uvòh: silôhukūö anga-aṅ tö cha tök tö keh sāiny, nyā ngaich anga-aṅ, ngaich tööḵngen, ṙā-ang umuh ngaich.

¹⁵Ngaich hē ò nö hōklöre nö chap, tölṙô yik ṙāl tarikre ngaich Pō-as, nö ngö ṙô, Hökngen ò pöchö nö chap nö in nup unvôsö nö pòrô, uh an nö vëka.

¹⁶Ngaich inrē rahëchyen tahūöknyi i nup tönyëkö, ṙātö u ngaich hökngen ò nö chap, un vëka anga-aṅ.

¹⁷Ngaich söl harap anga-aṅ nö chap nö el panô-òṅ; piṙōngnyö ök pārlī nö hĕng kumvôkö.

¹⁸Tayūkö e ngaich anga-aṅ ngaich chuh elpanam; ngaich ök kikānö yöng pīhö ò nö meuk nuk chahap ò: kūmu inrē anga-aṅ tö chööḵūöre i tanööngen ò nö ngaich ngaich kētö e nö in ò.

¹⁹Ngö ṙô ngaich tö ò ök kikānö yöng pīhö ò, Isuh öm taheui chap i ngih sakāmö? I suh inrē öm la-evṙen? Tökôlò ap yĕh anga-aṅ öp tö-akahakūö tö meh. Ngaich anga-aṅ nö hameukhöti nö ik yöng pīhöre kikānö tök chūökre nö la-evṙen, nö ngö ṙô, Pō-as minënyi öp tarik chūök chu taheui la-evṙen.

²⁰Ngaich ngö ṙô Naōmī tök kankūönre, Tökôlò öp yĕh anga-aṅ nö i ngam Mā Tēv ap töt ṙamāngö neūkölōn nö i tö-aṅ tökapah inrē. Ngaich ngö ṙô Naōmī tö ò, Töröhta ap tariknö mak alaha hī, töhĕng tak öp nö töröhta i tumtak yip mak alaha hī.

²¹Ngaich ngö ṙô inrē Rūt ök aṅ Mô-āp, Hôṅ, ngö ṙô ap taheui tö chu, Haköpngöre man i më ṙāl tarik chu, hanöng saha kinheūten cha tö minë aṅ panô-òṅ chu.

²²Ngö ṙô inrē Naōmī tö Rūt ök kankūön ò, Kakūönö, tölöök an, tö meh öm kiröönngöre hol yip tarik ò kikānö, ngaich cha-a inrē nö öt meūkö meh el tahëng panô-òṅ.

²³Lökten anga-aṅ nöng haköpngöre nö in yik tarik Pō-as kikānö nö chap söl i kinheūten inmūlö ṙòng vīt inrē; ngaich iyöng in ök kikānö yöng pīhöre anga-aṅ.