Read Car_Nicobarese 1 SAMUĔL 10 Bible Online

1 SAMUĔL 10 - Car_Nicobarese bible

1 SAMUĔL 10

¹Ngaich Samu-ĕl nö kē ök pilön tavī-ī, ṙöstö e ngaich nö i kui ò, hāmkūö ò ngaich, nö ngö ṙô, Röh öng angū-ö nö inchamkui meh tö ngam Mā Tēv öm hōtu rācha i kui vē amin ò?

²Yē meh pöchö ngaich ṙā-ang in chu töngamuh ngaich kôtökūö min më-eṅ tö nap tarik nët tak röhta nö ip kui mitīlö Rēchöl, i kūöngö Penyamin i Selsā; ngö ṙô nap min tö meh, Kôti nup köttö nup tö chöhöh tö nāṅ an kiröönngöre: ngaich, yĕh meuk, ṙā-ang pinṙūtölōnre ap yöng meh tö nup köttö, ngaich nö piṙūtken meh, nö ngö ṙô, Sitih inlahen öich vö min tök kūön chu kikōnyö?

³Kiröönö kūöre pömchö ṙā-ang umuh, ngaich asöltöre më-eṅ min ip tarapin i Tapōr, ngaich in e min yip tarik tölūöi tak chamuh im Tēv i Pētĕl, nö meukkūö meh, hĕng tak öp tölūöi nòng kum tö kūön pököre, lūöyö kum öp tahëng tö rôtī hēngö kum öp tahëng tö uk chūök vāin:

⁴Salāmö meh yip min, ngaich nët hata min tö rôtī nö kē-ĕkūö meh; ngaich kē-ĕ u min më-eṅ ṙā-ang eltī cha.

⁵Ngaich yihtöre min më-eṅ im rung ngam Tēv unôichrit e, ip chūök yip kumyung aṅ Filistain: ngaich, yē meh sölta umuh im elpanam, ngaich më-eṅ min meuk kūö yip pròfĕt töhĕng kiteum pameūtöre nö ṙā-ang ip tömarô-òl chūök chūökö nö kumtö tö-inröötu ranöng, timpröl, fanöö, hāp, nö urēhĕkūö cha; ngaich cha-a min nö vë-eny yanīhih mu-unôich:

⁶Ngaich min ngam ma-alaha aṅ im Mā Tēv nö kalēḵ nö teungtöre nö in meh, ngaich holṙô cha më-eṅ min vë-eny yanīhih mu-unôich, ngaich haṙi-ingre min më-eṅ tahëng öm tarik.

⁷Ngaich mīnö, yē në minkahngö nö teungtöre nö in meh, ngaich më-eṅ la-evṙen yĕm hōtenvö; tön in meh an ngam Tēv.

⁸Ngaich urēhĕkūö chu më-eṅ min chuh Kilkāl; ngaich chū-ö min yihtöre in meh, öich kētö töföngö tökētu, kētö tökētu inrē nö inlāmö: sat sumkam min më-eṅ höngngöh, hanöng saha yanīhih chu in meh, öich hameukhömat meh tö inlahen la-en meh min.

⁹Ngaich ngö inlahen angū-ö, hē-ò nö hapungtö ukre nö ngaich nö ṙāngen Samu-ĕl, kētö ellōn ò ngaich ngam Tēv tö tahëng: ngaich ṙòkhöre nup minkahngö nö teungtakūö ik sakāmö angū-ö.

¹⁰Ngaich hē cha nö sölta nö ik rung ngaich höngkūö ò yik töhĕng kiteūm pròfĕt; ngaich ngam ma-alaha aṅ im Tēv nö kalēḵ nö teungtöre nö i kui ò, ngaich hol ṙô cha anga-aṅ nö vë-eny yanīhih mu-unôich.

¹¹Ngaich, hē yik tö-akahakūö tö ò nö lā-urĕh nö meūkö e, yĕh meuk hol ṙô yip prôfĕt anga-aṅ nö vë-eny yanīhih mu-unôich, ngaich ngö ṙô yik tarik tö höö, Asuh öng ngih yamih nö i ngòh kūön Kis? I vē pròfĕt ang inrē Sôl?

¹²Ngaich hĕng tak ök aṅ muh tö ngö ṙô nö sap ṙô, Achīö ap yöng cha kikōnyö? Lökten an nö vīngöre nö inchō-oṙô, I vē pròfĕt ang inrē Sôl?

¹³Ngaich hē ò nö keuheūtöṙô nö vë-eny yanīhih mu-unôich, yih ngaich anga-aṅ nö ik tömarô-òl chūök chūökö.

¹⁴Ngaich ök kōiny yöng Sôl nö ngö ṙô tö ò tök tarik ò inrē, Chuh yih an kan fömngöre? Ngaich ngö ṙô anga-aṅ, I chinöhöh nup köttö: ngaich hē ai meukngenre öt kôtökūö tö u, ngaich yihtöre ai in Samu-ĕl.

¹⁵Ngaich ngö ṙô ök kōiny yöng Sôl, vë-ekūö meh chin, ve-ëny nang chu man, Vë-eny töp ṙô Samu-ĕl tö meh.

¹⁶Ngaich ngö ṙô Sôl tök kōiny yöngre, Lööknyi ṙô ök tö nup köttö nö ngaich nö kôti. Öt vë-eny nang ò pöri anga-aṅ, tö ṙô Samu-ĕl tö inlahen ngam pūlngö.

¹⁷Havëtö yik tarik ngaich Samu-ĕl nö ṙòkhöre nö im Mā Tēv i Mispah;

¹⁸Ngö ṙô ngaich anga-aṅ tö yik kūön Israĕl, Ngö ṙô an ngam Mā Tēv, ngam Tēv Israĕl, Kēnyen Israĕl chin nö ṙā-ang Aikup, ṙānyen meh inrē ṙā-ang Aikup, ṙānyen meh inrē ṙā-ang eltī yip aṅ Aikup, ṙā-ang eltī nup pūlngö inrē nö ṙòkhöre töt mahakôlò meh:

¹⁹Sōk-o ngam Tēv re pöri yī-ö in ngih sakāmö ngam mahayööken yīö ṙā-ang i nup taṙòkhöre öt kanôlò yīö kanihngen yīö inrē; ngaich ngö ṙô yī-ö tö ò, Hö-ö, ha-ūichlö rācha pöri i kui ih. Lökten hameuktöre yin töngamuh ikūö ngam Mā Tēv i miyöngö yīö, i tun köṅny yīö inrē.

²⁰Lökten Samu-ĕl nö haröhtö yik miyöngö Israĕl nö ṙòkhöre, ngaich kēlöre ök miyöngö Penyamin.

²¹Haröhtö ngam miyöngö Penyamin anga-aṅ inrē nö i mupīhö cha, ngaich kēlöre ök mupīhö aṅ Matrī kēlöre ngaich Sôl ök kikōnyö kūön Kis: hē cha pöri nö chöhan, öt kôti ngaich anga-aṅ.

²²Lökten cha nö hatöntöre nö im Mā Tēv. Hĕng tör tak hòng tarik yamih nö ihih? Sap ṙô ngaich ngam Mā Tēv, Yĕh meuk, hayunngöre apa i nup chehen.

²³Fal cha-a ngaich nö kē-ĕren ò nö ṙā-ang umuh; ngaich hē ò nö sökhaka nö in yik tarik, marôlòng anga-aṅ tö yik töng tarik löktökūö elranôṙöre kū-ötö tulöng.

²⁴Ngö ṙô ngaich Samu-ĕl tö yik tarik nö ṙòkhöre, meūkan öyih ngam katöllö ngam Mā Tēv, öt hĕng tak tösā ò nö in vē tarik nö ṙòkhöre? Pōitô ngaich yik tarik nö ṙòkhöre nö hūḵa, nö ngö ṙô, Tēv yĕh hayööken ngam Rācha!

²⁵Vë-eny nang yik tarik ngaich Samu-ĕl tö inlahen ngam pūlngö, kūich ngö e ngaich nö i mat līpöre, ṙāḵtö e ngaich nö i kūö ngam Mā Tēv. Tīnngörit yik tarik ngaich ang Samu-ĕl nö ṙòkhöre, nö kö i patīre.

²⁶Chuh patīre inrē Sôl i Kīpīa; hōluröön anga-aṅ nö kiröönngöre tö yik kumyung, yik tölūölka ellōn tö ngam Mā Tēv.

²⁷Rīkre pöri yik kūön Pēlial tö ngö ṙô, Sitih tī ang min ngòh tarik nö hayööken hī? Ngaich cha-a nö mināich tö ò, öt kūmuṙen inrē tö raneushö ò. Hö-ö pöri anga-aṅ nö ṙô-òv.