Read Car_Nicobarese 1 SAMUĔL 12 Bible Online

1 SAMUĔL 12 - Car_Nicobarese bible

1 SAMUĔL 12

¹Ngaich Samu-ĕl nö ngö ṙô tö yik Israĕl nö ṙòkhöre, Yĕh meuk, ngaich chin hang ṙô yīö i tökeuheūttöre nuk ṙô yīö tö chu ngaich vīlö rācha i kui yīö.

²Yĕh meuk, ngaich an ngam rācha töngamuh nö lök i kūö yīö ngaich chū-ö köiny pakū-uvkui inrē; yĕh meuk, in yīö nan minā kūön chu kikōnyö: lök i kūö yīö chin chū-ö ngaich inrē löktökūö ik nyinī-öre söl in töngamuh.

³Ihih chin yih: vë-eny fālen chu yin yĕh i kūö ngam Mā Tēv, i kūö ngam hacham elkui ò inrē. Chiāp tökē-ĕ nuā tö chu? Hēk chiāp tökē-ĕ köttö tö chu? Hēk achīö töhachīlö tö chu? Achīö töhakihtuṙen tö chu? Hēk el tī chīö öich kētö tö-ulāitu raneushö nö tinlupngö kūö në mat chu nö in ò? Ngaich kô-òren chū-ö havan tö e in yīö.

⁴Ngaich ngö ṙô cha-a, Hö-ö man hachīlö ih, öt rēhĕn hakihten ih, öt rēhĕn öm kahë-evö tö yô-òv eltī tarik.

⁵Ngaich ngö ṙô anga-aṅ tö cha, Ngam Mā Tēv an mameuk lālô yīö, ngam hacham elkui ò inrē mameuk i ngih sakāmö, tö yīö öt kanôtukūö tö yô-òv eltī chu. Ngaich cha-a nö ngö ṙô, Anga-aṅ An mameuk.

⁶Ngö ṙô ngaich Samu-ĕl tö yik tarik, Ngam Mā Tēv An misī vamīlen Môsös, Āròn inrē, nak kamënyö yik yöng yīö nö ṙā-ang öp panam Aikup.

⁷Lökten yin sökhaka ui halöinyköre, hòṅ chu vë-ekūö yīö i kūö ngam Mā Tēv tö nup taṙòkhöre tölöök tī ngam Mā Tēv, nup tī ò nö in yīö in yik yöng yīö inrē.

⁸Hē Yāköp misī nö yih nö i Aikup, peuinyhökūö ngam Mā Tēv ngaich yik yöng yīö, tīnten Môsös ngaich ngam Mā Tēv Āròn inrē, nak kamëḵnyö yik yöng yīö nö ṙā-ang Aikup, vīten cha ngaich nö iyöng nö i ngih chūökö.

⁹Vaichngö pöri cha-a tö ngam Mā Tēv, inyihngen cha ngaich anga-aṅ nö eltī Sisëra, yöngkūö kumyung aṅ Hasör, eltī yik aṅ Filistain inrē, eltī ök rācha aṅ Mô-āp inrē, kiyūngö cha ngaich acha-a.

¹⁰Peuinyhökūö ngam Mā Tēv cha-a ngaich, nö ngö ṙô, Köölö fālen, in, pò ih ṙaḵngö ngam Mā Tēv, ngaich lök la-en Pē-al Astaròt: ṙānyen ih pöri yēḵ töngamuh ṙā-ang eltī vē lā-al ih töngamuh, ngaich in min lök lā-en meh.

¹¹Tinten Yērūpē-al ngaich ngam Mā Tēv, Pērak, Yefta, Samu-ĕl inrē, ngaich ṙānyen yīö ṙā-ang eltī yip lā-al yīö nö keuheūttöre lā-a, öt pinlānguṙen yī-ö ngaich iyöng.

¹²Ngaich hē yīö meūkö Nāhas ök rācha yik kūön Amön nö yih nö lā-al yīö, ngö ṙô yī-ö ngaich tö chu, Hö-ö vīlö rācha ih pöri nö mahayöngö ih: yĕn ngam Mā Tēv lang rācha yīö ngam Tēv yīö.

¹³Lökten yih ngaich meuk ngam rācha ngam katöllö yīö, ngam töhavëka tö yīö: yĕh meuk, ngaich an ngam Mā Tēv nö ṙātö rācha nö i kui yīö.

¹⁴Yē yiö min pa-ekūö tö ngam Mā Tēv, lök la-en ò inrē, hang ṙô ò, ui ahôngö ngam chöngö ngam Mā Tēv, ngaich yī-ö nyöre tö ngam rācha inrē ngam mahayöngö yīö tamömrit ngam Mā Tēv ngam Tēv yīö:

¹⁵Yē yīö pöri min öt hang ṙô ngam Mā Tēv, öi ahôngö ngam chöngö ngam Mā Tēv, ngaich min ngam kël ngam Mā Tēv nö lā-al yīö, sā e misī nö lā-al yik yöng yīö.

¹⁶Lökten yin sökhaka ui halöinyköre meuk ngih tökiröng, tī ngam Mā Tēv min nö meūkö tö yīö.

¹⁷Röh öng töngamuh nö inmūlö vīt? Hòṅ havëkö ngam Mā Tēv chin, hòṅ ò nö tīntö kunṙôkö kumṙah inrē; ngaich yī-ö min akahalōn meuk ṙôkö öt lanöököre inrē, ngam tī yīö ngaich i kūö ngam Mā Tēv, öi havëkö rācha re.

¹⁸Havëkö ngam Mā Tēv ngaich Samu-ĕl, tīntö kunṙôkö ngaich ngam Mā Tēv, kumṙah inrē ik sakāmö angū-ö: kiröngö pinhe-eṅkūö ngaich yik tarik tö ngam Mā Tēv tö Samu-ĕl inrē.

¹⁹Ṙòkhöre ngaich yik tarik nö ngö ṙô tö Samu-ĕl, Vë-elkui vē tarikre man im Ma Tēv ngam Tēv meh, hòṅ ih öt kapah: tön ṙūötö ṙôken tököölre in i ngih tötlöök, invëkö rācha tö ih.

²⁰Ngö ṙô ngaich Samu-ĕl tö yik tarik, Ui pa-ekūö; kô-en yin ngaich lūölken ngih tötlöök: uh pöri kānngöre i tinöömörit ngam Mā Tēv, keuheūttö ellōnre pöri lök la-en ngam Mā Tēv;

²¹Ui kānngöre öi lök nup töt kô-en töt hōḵ nö kôlòtī tö yīö öt rēhĕn nö kô nö ṙānyen yīö pò u nö töt kô-en.

²²Tön öthō an ngam Mā Tēv nö ṙāngö vē tarikre tökūö ngam tökiröng mi ne-eny ò: pò e nö kumchiklōn ngam Mā Tēv nö vīlen yīö öi tarik ò.

²³Sōḵtuṙen pöri chū-ö tö ngam Tēv öich köölö fālen im Mā Tēv öich ṙa-angôre vë-elkui yīö hòṅ haköpten yīö pöri chū-ö tö ngam tölöök töhuveū talöökö inrē.

²⁴Höng ngam Mā Tēv an yēḵ pinhe-eṅkūö yīö, kô-en inrē lök la-en ò keuheūttö ellōnre: öi ngëichkö ṙôkhöl tī ò nö in yīö.

²⁵Yē yīö yī-ö pöri iṙūöhen la-evṙen tö tötlöök, keuheūtngöre vah min yī-ö nyöre tö ngam rācha yīö.