Read Car_Nicobarese 1 SAMUĔL 13 Bible Online

1 SAMUĔL 13 - Car_Nicobarese bible

1 SAMUĔL 13

¹Lūöi anāi samyeūheu ṙēti ang Sôl hē ranehten ò nö hayöng; nët samyeūheu anga-aṅ nö hayöng i kui Israĕl.

²Lūöi köṅny katöllö ngaich Sôl tö tarik aṅ Israĕl; i yik aṅ in cha nët köṅny yik mi-in Sôl nö i Mikmas i kui ap rung Pētĕl inrē, hĕng köṅny inrē yik in Yônatan in Kipīa yip aṅ Penyamin: tīnngörit yik tarik chööḵṙen anga-aṅ nö kö el rūkuire.

³Ngaich Yônatan nö kilöön ök chūök kumyung yik aṅ Filistain ök mi-i Kēpā, hāngö e ngaich yik aṅ Filistain. Föö ök römpet ngaich ang Sôl nö keuheūtngöre chūök nö im panam, nö ngö ṙô, Hang yip yēḵ Hīprū.

⁴Ṙòkhöre ngaich yik Israĕl nö hang tö Sôl nö ngaich nö kilöön ök chūök kumyung yik aṅ Filistain, tö yik Israĕl inrē nö tòk el mat tö yik Filistain. Hamūlöre ngaich yik tarik nö tömrit Sôl nö i Kilkāl.

⁵Hamūlöre inrē yik aṅ Filistain nö kiyung yik Israĕl, lūöi anāi köṅny inröl yik aṅ Filistain, tafūöl köṅny tö kōravö tarik, sā ṙôken kuyāyö ngam mai, i kuyāyö yik tarik inrē tö ṙôngöre: yih cha-a ngaich, iyöngtöre ngaich nö i Mikmas, lā chuhöt tö Pĕtaven.

⁶Hē yik tarik Israĕl nö meuk kanihngen re, (pò yik tarik nö kihten,) lökten yik tarik nö hayunngöre el kinluhu el töyul, el ihong, el tömëngö, el chūök tit mak inrē.

⁷Ngaich rīkre yik Hīprū mahavāngngöre tö Yôtön i panam Kāt Kilīöt inrē; ṙòngmöng i Kilkāl pöri ang Sôl, kichëyöre yik tarik nö ṙòkhöre nö tömrit ò.

⁸Sat sumkam anga-aṅ nö höka sā ngam ṙētak halēnngen Samu-ĕl, öt yih pöri Samu-ĕl nö i Kilkāl; kö parātṙen ngaich yik tarik nö ṙā-ang in ò.

⁹Ngaich ngö ṙô ang Sôl, Kētö ap töföngö tökētu in chu, tap tökētu inlāmö inrē. Kētö ap töföngö tökētu ngaich anga-aṅ.

¹⁰Ngaich, hē ò nö keuheūten nö kētö ngam töföngö tökētu, yĕh meuk, yih ngaich Samu-ĕl kunyī-inyre ngaich Sôl nö höngkūö ò, pòn salāman.

¹¹Ngö ṙô ngaich Samuĕl. Suāp taheui la-en meh? Ngö ṙô ngaich ang Sôl, Kūöre chin meuk vē tarik nö parāti nö ṙā-ang in chu, ngaich rö-ö më-eṅ yih i nuk sakāmö töhalēni, hamūlöre inrē yip Filistain nö i Mikmas;

¹²Lökten chu ngö ṙô, Yih yip min aṅ Filistain nö in chu i Kilkāl, ngaich rö-ö chū-ö havëkö inṙētöre tö ngam Mā Tēv; lökten chin pötngenre kētö ngam töföngö tökētu.

¹³Ngö ṙô ngaich Samu-ĕl tö Sôl, Kulō-ov inlahen man: hö-ö man haköp ngam chöngö ngam Mā Tēv ngam Tēv meh, ngam hinôtö meh tö ò: pòn ngaich öre töngamuh ngam Mā Tēv nö örheūheu nö haköpngö ngam pūlngö meh i Israĕl.

¹⁴Ngaich pöri ngam pūlngö meh töngamuh nö ötngöhören: ngaich an ngam Mā Tēv nö chöh öp tösā ellōn ò tarik, ngaich inrē ngam Mā Tēv nö vīlen ò nö rācha i kui vē tarik ò, pò meh më-eṅ öt köp tö ngam hinôtö meh tö ngam Mā Tēv.

¹⁵Choholre ngaich Samu-ĕl, ngaich ṙeū-eung Kilkāl nö chuh Kīpiā i Penyamin. Kaheuk yik tarik ngaich ang Sôl mi-in ò, tafūölòng yik tarik.

¹⁶Höngngöh nö i Kēpa i Penyamin ang Sôl, Yônatan inrē ök kikōnyö kūön ò, tö yik tarik mi-in cha: iyöng Mikmas pöri yik Filistain.

¹⁷Lūöi kiteūm ngaich nö yih nö ṙā-ang elyöngö yip Filistain yip töng kamëḵtöre: hēng kiteūm yik lamök el talöökö tökū-ötö ôfrah, ip panam Sūal;

¹⁸Kānngöre ök tahëng kiteūm nö el talöökö chamuh Pethòròn: kānngöre inrē ök tahëng kiteūm nö el talöökö ök kūöngö panam ök lātulöng tö achāṙö Sīpōim tökū-ötö el tönyalnyi.

¹⁹Ngaich keuheūtngöre chūök im panam Israĕl nö öt ramömu vët: pòn ngö ṙô yik Filistain, Hòṅ Hīprū nö öt vī sanëtre, vöire inrē:

²⁰Ṙòkhöre pöri yik aṅ Israĕl nö chuh in yik Filistain nö hakeutnyö kūö nuk kunköh tumlatre, tökeut taseū kūö kunköh tumlat ò, hanīöng ò, sanöh tumlat ò inrē;

²¹Kunhīölu in pöri cha-a tö kunhīöl kūö sanöh, kunhīöl taseū kūö kunköh tumlat, kunhīöl kūö lanòk, kunhīöl kūö hanīöng inrē, vītö kūö insīöich inrē.

²²Ngaich hē ök sakāmö kinyūngö, nö öt sanëtu öt rēhĕn nö vöiyu eltī yik tarik mi-in Sôl in Yônatan inrē: höng Sôl, Yônatan inrē ök kikōnyö kūön ò tö-aṅhaṅvin.

²³Ngaich yik kumyung aṅ Filistain nö kunyī-inyre nö el talöökö Mikmas.