Read Car_Nicobarese 1 SAMUĔL 14 Bible Online

1 SAMUĔL 14 - Car_Nicobarese bible

1 SAMUĔL 14

¹Ngaich hĕng sumkam fanuk ten angū-ö, hē Yônatan ök kikōnyö kūön Sôl nö ngö ṙô tök ṙāl tarik ök kameun kö ök lanaklö ò, Tā-a, tai havāngngöre in yip Filistain ip chūök kumyung, ap lamā mū-aṅ. Hö-ö pöri anga-aṅ nö vë-eny nang ök yöngre.

²Höngngöh ang Sôl nö ip manā-angkūö Kīpīa elkatòh ök chōn anār ök mi-i Mikròn: tafūölòng yik tarik mi-in ò;

³Ngaich Ahīchā, ök kikōnyö kūön Ahītöp, mëm Ichapōt, ök kikōnyö kūön Finehas, ök kikōnyö kūön Ēli, kūönṙô ngam Mā Tēv i Sailō, nö hayūtöre tö sörplis. Öt akahalōn yik tarik tö Yônatan nö kiröönngöre.

⁴Ihôi nup talöökö, löknyö Yônatan nö lukkenre nö havāngtöre ip chūök kumyung yip aṅ Filistain, hĕng ap ihong umuh tölarak nö hĕng lā, hĕng inrē ök ihong tölarak nö im tahëng lā: Pōses minënyi ök hĕng, Sēneh minëyi ök tahëng.

⁵Kööilö ök linrākö lā kapā nö lākūö Mikmas, lā kūö Kēpā inrē ök tahëng nö lòhngö.

⁶Ngö ṙô ngaich Yônatan tök ṙāl tarik ök kameunkö ök lanaklö ò, Tā-a, tai havāngngöre ip chūök kumyung vē töttunyīnyi: amahtuṙen an ngam Tēv min nö hol alaha hā: pò ngam Mā Tēv nö öt sōten inyööken nö lökten i tömaṙôngö hēk lökten i töt ṙōl taka.

⁷Ngaich ngö ṙô tö ò ök kameunkö lanaklö, La-evṙen man tap ellōn meh: havöökūöre, yĕh meuk hol meh chin sā lōn meh.

⁸Ngö ṙô ngaich Yônatan, YĔh meuk, hòṅ havāngtöre an in më tarik, ngaich ayā-a min hameuktöre in cha.

⁹Ngaich yē cha nö ngö ṙô tö hā, Ngöh nan sin hanöng saha ih yihtöre in nāṅ; ngaich sökhak min ayā-a öt halöinyköre ip chūökre, uh ai yihtöre in nāṅ; ngaich sökhak min ayā-a öt halöinyköre ip chūöre, uh ai yihtöre in cha.

¹⁰Yē cha pöri nö ngö ṙô, Tā-ih yihtöre in ih; ngaich yihtöre min ayā-a; tön kēten cha an ngam Mā Tēv nö eltī hā: angū-ö ön ngih min minkahngö e nö in hā.

¹¹Nëtre taka cha-a ngaich nö hameuktöre nö ik chūök kumyung yik aṅ Filistain: ngö ṙô ngaich yik Filistian, Yĕh meuk, meutlö yin vē Hīprū nö löklö ël nup tömëngö i chūök cha nö hayunngöre.

¹²Ngö ṙô yik tarik el ök chūök kumyung tö Yônatan töp kameun kö lanaklö ò inrē, Tā-ih yônlö nan in ih, hòṅ ih hameukhömat nāṅ. Ngö ṙô ngaich Yônatan tök kameunkö lanaklöre, Tā-a yônlö tömrit chu: tön kēten cha an ngam Mā Tēv nö eltī Israĕl.

¹³Yônlö ngaich Yônatan nöng hanṙeūlö unôichrit ò inrē ök kameunkö lanaklö: fukngö cha-a ngaich nö i kūö Yônatan; ngaich ök kameunkö lanaklö ò nö fëlngen cha nö unôichrit ò.

¹⁴Nët anāi tumtak yik tarik raneh pôḵ, Yônatan tök kameunkö lanaklö ò höng sā rôta töròngti töfūngö tumlat eltöhĕng kamnāchö ṙôkti ök chūök cha.

¹⁵Kayīna ngaich ök chūök cha, elkahôyö, in yik tarik inrē; hayīna inrē cha-a, yik kumlöön holre tök chūök kumyung inrē: kayīna inrē ngam tumlat; kalēḵ ngaich ök kinyīnö.

¹⁶Ngaich yik amahati tarik in Sôl i Kīpia aṅ Penyamin nö ngëicha; ngaich meuk, yik tömṙôngö nö payāyi, chuh hī-a cha-a ngaich umū-aṅ inrē.

¹⁷Ngö ṙô ngaich Sôl tö yik tarik yik mi-in ò Kaheūköre yin, ngëichkö öp kumröönngöre nö ṙāngen hī. Ngaich hē cha nö keuheūten nö kaheūköre, yĕh meuk, öt umuh ngaich ang Yônatan tök kameunkö lanaklö ò inrē.

¹⁸Ngö ṙô ngaich Sôl tö Ahīchā, Kētö ap kasòng ngam Tēv ihih. Pò ök kasòng ngam Tēv nö umuh hē e in yik kūön Israĕl.

¹⁹Ṙònghöichṙen Sôl nö vë-ekūö ök kūönṙô, ngaich ök tinṙōlen ik elyöngö yik Filistain nö ṙūölöreṙen: ngaich ngö ṙô Sôl tök kūönṙô, Kē-ĕngtīre mana.

²⁰Hamūlöre ngaich hēḵ Sôl tö yik tarik mi-in ò, yihtöre ngaich nö im kinyūngö: ngaich meuk yik tarik nöng kö sapngen höö tö holre, pōihāngen ngaich yik tötkô.

²¹Ngaich yik Hiprū yik mi-in yik Fililstain sin, yik mi-in cha nö im elyöngö aṅ i nuk i chīṙö panam; havöötöre cha-a inrē nö hol yik aṅ Israel yik mi-in Sôl in Yônatan inrē.

²²Ngatī inrē yik tarik Israĕl yik mahayunngöre nö i rung panam Ifrēm, hē cha nö hang yik Filistain nö falngöre, cha-a inrē töröhlö nö tömkörit cha im kinyūngö.

²³Ngatī ngam Mā Tēv nö hayööken Israĕl ik sakāmö angū-ö: vāngngö ngaich ngam kinyūngö nö lök Pĕtaven.

²⁴Öt kalē-en yik Israĕl tö kūö neūkö re ik sakāmö angū-ö, pô Sôl nö kētö chöngöre: Töp tö hĕng tak nyama-avkūö nö öt inkôluṙô hanöng sāha ò (Sôl) nö havāhalvahre nö in yip lā-al re lökten yik tarik nö öt hĕng tak kamlahkö nyā-aṅkūö.

²⁵Ṙòkhöre ngaich yik tarik nö chuh el inchōn; ngaich kôtö kūö tö hönī nup el tumlat nö keuheūtngöre chūök.

²⁶Ngaich hē yik tarik nö sölta nö el inchōn, ngaich meuk, katāka nuk hönī: öt hĕng tak pöri tarik kumpōp kuntī re nö elvāngre; pò yik tarik nö pa-ekūö tö ngam töchūökuṙô Sôl.

²⁷Hö-ö pöri Yônatan nö hanglöre hē ök yöng ò nö kētö chöngö nö in yik tarik nö chūkuṙô: lökten anga-aṅ nö kulòktörit ök chōn eltīre, lòktö e ngaich nö ik chūök hönī, kupōphöt kuntīre ngaich nö elvāngre; malaklöng mat ngaich anga-aṅ.

²⁸Hĕng tak ngaich ök tarik tö ngö ṙô, Chūökuṙô ap yöng meh taheui nö kētö chöngö nö i vē tarik, nö ngö ṙô, Rūtiṙen ap tarik nyamā-aṅvkūö i ngih sakāmö. Ngaich yik tarik nö takngö.

²⁹Ngö ṙô ngaich Yônatan, Kihngen tī öp yöng chu töng panam: vë-ekūö meh chin, ngëichkö në mat chu nö malaklöng, pò chu rahëchvat kalahkö ngih hönī.

³⁰Möthë öre, yē vē tarik nö halöngtu kūö töngamuh nö nya-aṅvkūötö nuk pô cha nö in yik lā-alre nup kanôtökūö cha ngaich pōihangvah öre yik Filistain tögamuh.

³¹Löktökūö Mikmas cha-a söl Aichalōn nö kiyung yik Filistain im sakāmö angū-ö: pōihangṙen yik tarik nö takngö.

³²Faltöre ngaich yik tarik nö i nuk pô cha, ngaich kē sīṅp kōiny nuā inrē ṙatnyö likeun u ngaich nö el tumlat: kē-ĕ u ngaich cha-a nö holtö mahāmre.

³³Vë-eny nang Sôl cha-a ngaich, nö ngö ṙô, Yĕh meuk, köölö fālen yip tarik nö im Mā Tēv, pò cha nöng kāḵtö mahāmu Ngaich ngö ṙô-anga-aṅ, Michūḵ inlaha yīn: pilön tö kui chu yin yēḵ tö tökiröng ihong i ngih sakāmö.

³⁴Ngaich ngö ṙô Sôl, Pirātngöre yin in yip tarik, ngö ṙô tö cha, Kö kētö nup kōiny nuāre yin ihih in chu, kö kētö nup sīṅp inrē, ṙatnyö likeun u ihih, nya-āṅvkūö ngaich; uh yin köölö fālen im Mā Tēv i kinā-aṅ töng mahāmre. Ṙòkhöre ngaich yik tarik nö kö kētö nuk kōiny nūa in re ik hatööm angū-ö, ṙatnyö likeun u ngaich nö umuh.

³⁵Vīlö tahāklö ngam Mā Tēv ngaich ang Sôl; angū-ö ök raneh tahāklö vahī-il ò im Mā Tēv.

³⁶Ngö ṙô ngaich ang Sôl, Tā-a, töi peūtöre ing hatööm in yip Filistain, öi hayëngen cha hanöng saha ap peuheū nö hatlö, un hĕng tit tak tarik inrē töṙā-ai nö in cha. Ngaich ngö ṙô cha-a, Kētöre man yēḵ töp tölöök tölōn meh. Ngaich ngö ṙô ök kūönṙô, Tā-a töi ṙūötöre ihih im Tēv.

³⁷Havëkö inlēnöre ngaich Sôl nö im Tēv, Peūtöre öichu in yip Filistain? Kēten cha öm min eltī Israĕl? Hö-ö pöri anga-aṅ nö sap ṙô ò ik sakāmö angū-ö.

³⁸Ngö ṙô ngaich ang Sôl, Ṙūötöre yin ihih, yī-ö mākūö vē tarik: ngëichkö öp chūök ngih tökööl i ngih sakāmö hôiṅ akahalōn.

³⁹Sā ngam Mā Tēv nö tö-aṅ, ngam mahayöölen Israĕl, pòrô min nö Yônatan öp kūön chu kikōnyö öthō min anga-aṅ nö öt kapah. Öt hĕng tak pöri in yik tarik nö ṙòkhöre samap ṙô ò.

⁴⁰Ngaich ngö ṙô anga-aṅ tö yik Israĕl nö ṙòkhöre, hĕng lā yin yī-ö, ngaich chū-ö tö Yônatan inrē ngam kūön chu kikōnyö min im tahëng lā. Ngaich ngö ṙô yik tarik tö Sôl, Kētöre man sā öp tölöök tölōn meh.

⁴¹Lökten Sôl nö ngö ṙô tö ngam Mā Tēv, ngam Tēv Israĕl, Hameuktö öp kintöllö töchip. Kēlöre ngaich Yônatan Sôl inrē: öt kô-òngvah pöri yik tarik.

⁴²Ngaich ngö ṙô ang Sôl, Kalah taneūngen chu tö Yônatan inrē ngam kūön chu. Kēlöre ngaich ang Yônatan.

⁴³Ngaich ngö ṙô Sôl tö Yônatan, Vë-eny nang chu man töp fālen meh. Ngaich vë-eny nang ò Yônatan, nö ngö ṙô, Kô-en chin taheui rahëichvat kalahkö hönī nö i kūö ök chōn ök mi-eltī chu; yĕh meuk, ngaich chin yin kapah.

⁴⁴Ngaich ngö ṙô Sôl, Ngatī tī An ngam Tēv möthë inrē: pò meh ngaich ötkô öt kapah, Yônatan.

⁴⁵Ngaich ngö ṙô yik tarik tö Sôl, Kapah ap min Yônatan, öp töpōyen tī tö inyöölen in Israĕl? Sōḵoti An ngam Tēv: sā ngam Mā Tēv nö tö-aṅ, öt hĕng milöichö keūyö el kui ò tösuktöre min nö el tumlat; pò ò nö hol tī ngam Tēv i ngih sakāmö. Ngaich yik tarik nö kēnyen Yônatan lökten ò nö öt kapah.

⁴⁶Ṙāngenre ngaich Sôl nö fachūrit yik Filistain: ngaich yik Filistain nö chuh i chūökre.

⁴⁷Hē Sôl ngaich nö kē ngam pūlngö Israĕl, keuheūtngöre lā-a ngaich anga-aṅ nö kiyung yik lā-alre, lā-al Mô-āp, lā-al yik kūön Amön, lā-al Ētöm, lā-al yik rācha aṅ Sōpah, lā-al yik Filistain inrē: öt kô-òtī anga-aṅ tö cha ip töng lā-a kū-ö ò.

⁴⁸Öt pinhë-eṅvkūö anga-aṅ inrē, ngaich kiyung yik aṅ Amelek, ṙānyen yik Israĕl inrē nö ṙā-ang eltī cha yik mahayëngen cha.

⁴⁹Vē yin kikōnyö kūön Sôl, Yônatan, Isvī, Malkesuā inrē: në nun minënyi nak tönët tak kikānö kūön ò; Merap minënyö ök lanòh, Maiköl minënyö ök ṙālö:

⁵⁰Ahīnōam minënyi ök pīhö Sôl ök kūön Ahīma-as: Apnör minënyi ök yöngkūö yik kumyung in ò ök kikōnyö kūön Nör, kōinyyöng Sôl.

⁵¹Kis ök kikōnyö yöng Sôl: Nör inrē kikōnyö yöng Apnör nö kikōnyö kūön Apī-el.

⁵²Irô-òtö nuk sakāmö Sôl ök yöng kinyūngö lā-al Filistain: ngaich hē Sôl nö meuk tökalēk tarik, hēk tarik tötpa-ekūö kē an ngaich anga-aṅ nö in ò.