Read Car_Nicobarese 1 SAMUĔL 15 Bible Online

1 SAMUĔL 15 - Car_Nicobarese bible

1 SAMUĔL 15

¹Ngaich Samu-ĕl nö ngö ṙô tö Sôl, Tīntu chin tö ngam Mā Tēv öich hacham elkui meh rācha i kui vē tarik ò, i kui Israĕl: lökten man yĕh hangihtöre tö në ṙô ngam Mā Tēv.

²Ngö ṙô An ngam Mā Tēv yip tömaṙôngö, Mikahngö nuk tī Amelek chin tö Israĕl, tö inlahen ò nö el talöökö nö lā-al ò, hē ò nö yih nö ṙā-ang Aikup.

³Kiröönngöre man kuṙòh töngamuh kiyūngö Amelek, ahatngö tīre piyāingö nup taṙòkhöre in cha, un aṙēlöng cha-a inrē; hĕnghöre fëlngö kikōnyö kikānö pöri inrē, tënö nyīö töṙòngmö pōḵ inrē kōiny nuā, sīṅp inrē, ūṅt köttö inrē.

⁴Havëtö yik tarik ngaich ang Sôl, kaheūkö cha ngaich nö i Tilēm, nëtòng köṅny kumröön tarik, söm köṅny inrē tarik aṅ Yūtā.

⁵Yih ngaich Sôl nö i elpanam Amelek, el achāṙö ngaich nö höng.

⁶Ngö ṙô ngaich Sôl tö yik aṅ Kēn, Kuṙòh, kiröönngöre yin, kē-ĕngre ṙā-ang in yip aṅ Amalek, hòṅ yīö öt halëli tö chu anòngngen cha: tön hameuk tö miṙēlōnre yin misī tö yik kūön Israĕl nö ṙòkhöre, hē cha nö yih nö ṙā-ang Aikup. Lökten yik aṅ Kēn nö kiröönngöre nö ṙā-ang in yip aṅ Amelek.

⁷Fël yik aṅ Amelek ngaich ang Sôl löktökūö Havīla yē meh kūötö Sūr, ap i kūöngö Aikup.

⁸Kē-ĕ Akak anga-aṅ nö aṅ in ök rācha yik aṅ Amelek, hatngö tī pöri nö halëlngö yik tarik nö aṅ tī tö fël.

⁹Aṙēlöng pöri Ākak tö Sôl tö yik tarik inrē, tö nup tökôlò sīṅp, kōiny nuā inrē tö nuk tö-alahavö, kūön sīṅp inrē ṙòkhöre inrē nup töng kôlò, sōḵ cha-a nö ahatngö tīre nö halëlngö u: höng nuk tötkôlò tösō-ov inrē anū-ö halëlngö cha nö ahāti.

¹⁰Yih ngaich ngam ṙô ngam Mā Tēv nö in Samu-ĕl, nö ngö ṙô,

¹¹Paṙūtalōn chin töre ha-ūichlen Sôl nö rācha: pò ò nö havööngö kūöre tö tinöömörit chu, öt teūngen inrē nö hateungngö nuk chöngö chu. Līn ngaich ang Samu-ĕl, hĕng mitööm ṙô ngaich anga-aṅ nö peuiny hökūö ngam Mā Tēv.

¹²Ka-euilökūö ngaich Samu-ĕl nö choholre tö peuheū nö höngkūö Sôl; ngaich vënyu nang ang Samu-ĕl tö e tö Sôl nö yih nö i Kārmel, yĕh meuk, vīlö minkahngöre apa, nö havötköre, ṙūöhöngre nö ngaich inrē nö chuh Kilkāl.

¹³Yih ngaich Samu-ĕl nö in Sôl: ngaich ngö ṙô Sôl tö ò, Tökôlò man yēḵ i ngam Mā Tēv: ngaich chin hateungngö chöngö ngam Mā Tēv.

¹⁴Ngaich Samu-ĕl nö ngö ṙô, Asuh pöri öp umuh tömëṅaṙô sīṅp nö el nang chu, tömū-aṙô inrē ahang ṙô chu kōiny nuā?

¹⁵Ngö ṙô ngaich Sôl, Kum cha nuk nö ṙā-ang in yip aṅ Amelek: pò yik tarik nö ṙāḵlö nup tökôlò sīṅp kōiny nuā inrē, nö tökētu nö im Mā Tēv ngam Tēv meh: halëli nuk nö ahāti chööḵṙen u.

¹⁶Ngaich Samu-ĕl nö ngö ṙô tö Sôl, Ngöhsin, hòṅ vë-eny nang meh chin tö ṙô ngam Mā Tēv tö chu i ngih hatööm. Ngaich ngö ṙô anga-aṅ tö ò, Yĕh ṙô-òv.

¹⁷Ngö ṙô ngaich ang Samu-ĕl, Pòrô man misī öm tökūöṅnö tö matre, ngaich öt vīlöng hòng më-eṅ yöng kūö yip miyöngö Israĕl? Hachāmö kui më-eṅ ngaich töm Mā Tēv öm rācha i kui Israĕl;

¹⁸Tīnngen meh ngaich ngam Mā Tēv ik töhĕng kinröönngö, nö ngö ṙô, Kuṙòh halëlngö yip tököölö fālen aṅ Amelek ahatngen cha, kiyūngö cha inrē hanöng saha cha nö keuheūtngöre vah.

¹⁹Kūöyòh öm pökeh ngaich öthang ṙô ngam Mā Tēv, ngaich pöri öm kiteūlöre i kui nup pôḵre, ngaich chōichö la-en tö tötlöök i kūö ngam Mā Tēv?

²⁰Ngö ṙô ngaich Sôl tö Samu-ĕl, Hòṅ, ngaich chin hang ṙô ngam Mā Tēv, ngaich inrē kiröönngöre el ngam talöökö tinīnngö chu tö ngam Mā Tēv, ngaich öich kumten Ākak öp rācha aṅ Amelek, halëlngö yik aṅ Amelek inrē nö ahāti.

²¹Kē nuk pôḵre pöri vē tarik, sīṅp kōiny nuā inrē nup yöngkūö nup töhet chehen, nö kētu nö im Mā Tēv ngam Tēv meh nö i Kilkāl.

²²Ngaich ngö ṙô ang Samu-ĕl, Kiröngö lōn Ang ngam Mā Tēv nö i töföngö tökētu i tökētu inrē, nö sā öp hināngö ṙô ngam Mā Tēv? Yĕh meuk ngam hinang chöngö nö tömöthë tö tökētu, ngam hināngö inrē nö möthë tö tö sangöṅ kūön sīṅp.

²³Pò ngam inhôngen nö sā ngam vinīngen nö tökööl, ngam nganë-eṅ ellōn nö sā vinë-eṅkūö insātēv nup taraf inrē. Pò meh ngaich sō-o ṙô ngam Mā Tēv, sō-en meh An anga-aṅ inrē nö ngaich öm rācha i kui Israĕl.

²⁴Ngaich ngö ṙô Sôl tö Samu-ĕl, Ngaich chin köölö fālen: pò chu ngaich tôichngen tö chöngö ngam Mā Tēv: tö nup ṙô meh inrē: pò chu pa-ekūö tö yip tarik, ngaich öich hang ṙô cha.

²⁵Yĕh lökten ngaich, vë-ekūö meh chin aṙēlö tökööl chu, havantöre më-eṅ inrē in chu hēk, hòṅ chu salām ngam Mā Tēv.

²⁶Ngaich Samu-ĕl nö ngö ṙô tö Sôl, Hö-ö chin hòṅ havantöre in meh” pò meh ngaich sō-o ṙô ngam Mā Tēv ngaich inrē ngam Mā Tēv nö sō-en meh rācha i kui Israĕl.

²⁷Ngaich hē Samu-ĕl nö havöökūöre nö kiröönngöre, kētö tīre ngaich anga-aṅ nö ik tökiröng inyut ò ik pinnyūtö i ṙat e, takach angū-ö ngaich.

²⁸Ngaich Samu-ĕl nö ngö ṙô tö ò, Tikāichngö ngam pūlngö Israĕl an ngam Mā Tēv nö ṙā-ang in meh i ngih sakāmö, kēngö e inrē nö ngaich nö ip hol meh, öp tö-ĕhten tö meh.

²⁹Ane inrē ngam kumlēḵ Israĕl min nö öt minyôiny öt rēhĕn nö havöötö ellōnre; pò ò nö öt tarik, nö mahavöötö ellōnre.

³⁰Ngaich ngö ṙô anga-aṅ, Ngaich chin köölö fālen: vë-ekūö meh chin, sòk man milēken chu i kūö vē mākūö vē tarik, i kūö Israĕl inrē, havantöre hēk öm in chu, hòṅ chu salām ngam Mā Tēv ngam Tēv meh.

³¹Lökten Samu-ĕl nö hēk nö in Sôl; salām ngam Mā Tēv ngaich ang Sôl.

³²Ngaich ngö ṙô ang Samu-ĕl, Kēten Ākak yin ihih in chu öp rācha aṅ Amelek. Höng ṙamtöhëichlōn Ākak nö yihtöre nö in ò. Ngaich ngö ṙô ang Ākak, Ngaichngen ök öre chanöökö kinpaha.

³³Ngaich ngö ṙô ang Samu-ĕl, Sā ök fël meh nö öt kūönu tī tö kikānö, ngatī min öp yöng meh kikānö nö öt kūön-nu i tum tak vē kikānö. Fangngen Ākak ngaich Samu-ĕl nö pinyë-enyö i Kilkāl i kūö ngam Mā Tēv.

³⁴Chuh Rāma ngaich Samu-ĕl; chuh patīre inrē Sôl nö i Kīpīa öp panam Sôl.

³⁵Öt yihköre ngaich Samu-ĕl nö meuk kūö Sôl hanöng saha kinpaha ò; pò Samu-ĕl nö haṙīvhen Sôl ngaich ngam Mā Tēv nö haṙiv töre nö vīlen Sôl nö rācha i kui Israĕl.