Read Car_Nicobarese 1 SAMUĔL 17 Bible Online

1 SAMUĔL 17 - Car_Nicobarese bible

1 SAMUĔL 17

¹Ik hē e yik Filistain nö hamūl yik kumyungre nö kiyung, hamūlöre cha-a ngaich nö i Sōkō öp panam Yūtā, iyöngtöre ngaich nö ihôi Sōkō tö Asëka, i Efestamim.

²Ngaich Sôl tö yik tarik Israĕl inrē nö hamūlöre ngaich iyöngtöre nö el achāṙö Elah, haṙāköre ngaich nö lā-al yik aṅ Filistain nö kiyung.

³Söklöre ngaich yik Filistain nö hĕng lā nö i kui rôngö, sökhak inrē yik Israĕl nö im tahëng lā rôngö; achāṙö ök ihôi cha.

⁴Ngaich hĕng tak ök nangnyi tökalēḵ kumnyī-inyre nö ṙā-ang elyöngö yik Filistain, Kōliat minëyi aṅ Kāt, tö tafūöl sumkôngö hĕng innyāk eltī rôlòng.

⁵Sapīövu anga-aṅ nö el kuire tö mās, hayūtö alaha inrē anga-aṅ tö vët inyut; ngaich taneui köṅny siköl lumngan ök inyut ò mās.

⁶Mās nup inrē innyīng kalröön ò hĕng nòng ök mās vöi ò ihôi kūöhanīöng ò.

⁷Ngaich ök haṙah ök vöi ò nö sā yöngtī kumpāt hilā; sātòng siköl lummgan ök vët kūö ök vöi; urēhĕkūö ò ök kameunkö lanaklö ò nö kiröönngöre.

⁸Söklöre ngaich anga-aṅ ngaich hūkö yik kumyung aṅ Israĕl, nö ngö ṙô tö cha, Kūöyòh öyih kunyī-inyre höng haṙāköre im kinyūngö? Röh öich chū-ö öich Filistain, ngaich yī-ö tarik Sôl? Hĕng tak katöllö yin tö tarikre, hök-ngen ò nö peūtöre nö in chu.

⁹Ngaich yē ò min nö kô nö kilöönö chu, kumpaha chu inrē, ngaich īhö min kūön alaha yīö: Yē chu pöri mihôin tö ò, kumpahan inrē ngaich yī-ö min tarik ih mameukṙen ih inrē.

¹⁰Ngö ṙô inrē ök Filistain, Miṙēngö vē kumyung chin aṅ Israĕl töngamuh; kētö tarik yin hĕng tak in chu, hòṅ ai kilöönö höö.

¹¹Ngaich hē Sôl tö yik aṅ Israĕl inrē nö ṙòkhöre nö hang në ṙô ök Filistain öt ōtre kumlēḵ cha-a ngaich, kiröngö pinhe-eṅkūö inrē.

¹²Kūön ök aṅ Efrā ök Tāvit i Petlihem Yūtā, ök töminënyu tö Yēsī; hëvhör maneuk kūön anga-aṅ tö kikōnyö: köṅny ök tarik hē nuk sakāmö Sôl, sööḵlö samyeūheu nö i tarik.

¹³Lūöi tak yik maṙöinylö kūön Yēsī mi-in Sôl nö ngaich im kinyūngö: në nun minënyö yik tölūöi tak kūön ò tö ngaich nö im kinyūngö, Ēlīap ök lanòh, ṙanët ò ang Apīnatap, linūöyö inrē ang Sāma.

¹⁴Ṙālö takô ang Tāvit: ngaich yik tölūöi tak maṙöinylö nö in Sôl.

¹⁵Ngaich höng havöt ang Tāvit nö ṙā-ang in Sôl nö ha-aṅlö nuk sīṅp ök yöngre i Pitlihem.

¹⁶Ṙūötöre ök Filistian peuheū harap inrē nö fën anāi sumkam nö hameuktöre.

¹⁷Ngaich ngö ṙô Yēsī tök kūönre Tāvit, Hĕng nyanum kahë man tö tönyô piôk kum meh i yip mëm meh, tö në inrē tösöm rôti, kĕ-ĕ u ka-eūyen in yip mëm meh ip elyöngö;

¹⁸Kē në inrē tösöm chīs löö ip yöngkūö töhĕng köṅny, ngëichkö yip mëm re inrē yĕn lööken, kē inmeuktöre pömchö in cha töre öm teūngen.

¹⁹Ngaich Sôl, tö cha inrē, tö yik tarik Israĕl nö ṙòkhöre, nö el achāṙö i Ēlah, nö kiyung yik Filistain.

²⁰Ka-euilökūö ngaich Tāvit nö choholre tö peuheū, ṙāngö nuk sīṅp ngaich nö ik töhĕng tak yōmṙen, kē kumre ngaich, ngaich kiröönngöre, sā tinöölô ò tö Yēsī; yihtöre anga-aṅ ngaich nö i chūök nuk inröl, hē ṙô yik kumyung nö hū-a nö kiröönngöre nö chuh im kinyūngö.

²¹Ngaich yik Israĕl tö yik Filistain inrē nö hatöök yik kumyung nö lā-alre.

²²Ngaich Tāvit nö ṙāngö nuk kum re nö eltī ök yōm kūmö, faltöre ngaich nö i yik kumyung, ngaich yihtöre nö salām yik mëm re.

²³Ngaich hē ò nö ve-ekūö cha, yĕh meuk, peūlöre ök nangnyi kumlēḵ ök Filistain aṅ Kāt, Kōlīat minënyi nö ṙā-ang i töököyik Filistain, ngaich nöng hĕngren ṙô nö ṙô-òv: hāngö u ngaich ang Tāvit.

²⁴Ṙòkhöre ngaich yik tarik Israĕl, hē cha nö meuk yik tarik, nö falngöre tö ò, ngaich pōi pinhe-eṅkūö.

²⁵Ngö ṙô ngaich yik tarik Israĕl, Meuk ngòh tarik öyih ngòh pameūlöre? Kô-en an nö peūlöre nö mumṙēngen Israĕl: hakôlöng ṙô öp min tarik töp rācha öp tökô nö fëlngen ò, tö tökiröngen kanôlò, ngaich kētu min öp kūön ò kikānö, nö in ò, ngaich vītu min öp patī öp yöng ò nö töṙālöngö nö in Israĕl.

²⁶Ngö ṙô ngaich Tāvit tö yik tarik töng sökhak nö in ò, Suh ap min mineukṙen ap tarik tökapahatī tö ngòh Filistain nö kēngö ngam minṙēngö nö ṙā-ang in Israĕl, Achīö ṙöng ang ngòh töttunyīnyi Filistain, töhòṅ miṙēngö vē kumyunglö ngam tö-aṅ Tēv?

²⁷Ngaich yik tarik nö ngö ṙô nö sap ṙô ò, Ngö inkôlò öp min tarik tökapahatī tö ò.

²⁸Hang ṙô ò ang Ēlīap ök maṙönylö mëm ò hē ò nö ve-ekūö yik tarik; hūlökūö tanānyö ngaich ang Ēlīap nö in Tāvit, ngaich ngö ṙô anga-aṅ, Kūöyòh öm yih? In chīö nup töharoh tum nòng sīṅp nö ṙā-ai tö meh nö el tönyalnyi? Akahalōn chin tö inkeūlen meh, tö ngam minôṙô ellōn meh inrē: pò meh yihtökūö öm töhòṅ meuk kinyūngö.

²⁹Ngaich ngö ṙô Tāvit, Asuh ap inlahen chu taheui? öt tö-chööḵnyu ökuh?

³⁰Havööngö-kūöre ngaich anga-aṅ tö ò nö ik tahëng taka, ngaich nöng hĕngren ṙô; ngaich yik tarik nö sap ṙô ò nö hēk nöng sā ök mu-urĕh ṙô.

³¹Ngaich hē nuk ṙô nö hāngö nuk ṙô Tāvit, ahangnyu ngaich anū-ö tö cha nö i kūö Sôl; tīnngö mahavëken ò ngaich anga-aṅ.

³²Ngö ṙô ngaich Tāvit tö Sôl, Un tarīk törötngö rāi tökūö ò; ngòh tarik meh an min kumröönngöre nö kilöön ngòh Filistain.

³³Ngö ṙô ngaich Sôl tö Tāvit, Ötkô man më-eṅ kiröönngöre lā-al ngòh Filistian öm kilöönan: pò meh höng nyīö, ngaich anga-aṅ nö kumyung nö tarik löktö ik nyinī-öre.

³⁴Ngö ṙô ngaich Tāvit tö Sôl, Aṅtö sīṅp öp yöng re ön ṙung ngòh tarik meh; ngaich yē lāyön hēk për nö kapngö kun pököre nö i nup pököre,

³⁵Lūḵ an chū-ö ngaich, ngaich fëlan, ngaich ṙānyen ò nö ṙā-ang elvāng ò: ngaich yē ò nö hòṅ kāpö chu, kē sanôi kūö ò chū-ö ngaich fëlan ngaich, kapaha tī ngaich tö ò.

³⁶Hĕnghöre fël lāyön ön ngòh tarik meh për inrē: ngaich ngòh töttunyīni Fillistain nöng sā töhĕng nòng tö u, yĕh meuk öm tö ò nö miṙēngö vē kumyunglö ngam tö-aṅ Tēv.

³⁷Ngaich ngö ṙô Tāvit, Ṙānyen chu an ngam Mā Tēv ṙā-ang i kūö kinsòh lāyöng, ṙā-ang i kūö kinsòh për inrē, ṙānyen chu an min ṙā-ang eltī ngòh Filistain. Ngaich ngö ṙô Sôl tö Tāvit, Kuṙòh, in meh an yēḵ min ngam Mā Tēv.

³⁸Hayūtö Tāvit ngaich Sôl tök inyutre, sumpīövlen ò inrē tök mās sapīöv nö i kui ò, hayūtan inrē tök vët inyut.

³⁹Hamöplö ṙat re ngaich Tāvit nö holtö ök sanët nö ik inyut ò, kalahtenre anga-aṅ ngaich nö kirööngöre; pò ò nö töt ulòhten nö ngatī. Ngö ṙô ngaich Tāvit tö Sôl, Hö-ö chin kô kiröönngöre chehentö në; pò chu öt ulòhten tö u. Ṙòngngö u ngaich Tāvit nö ṙā-ang in ò.

⁴⁰Kē ök tinkungre anga-aṅ ngaich nö eltī re, ngaich katöllö tömilön ihong, taneui, nö ṙā-ang el ök kun töhëm mak, chaplö u ngaich nö el ök inyul yōm pököre ök mi-in ò, ök kun inyul in ò; eltī ò ök kun inyul in ò; eltī ò ök chinvil kunleh ò inrē: haröhtöre ngaich anga-aṅ nö ik Filistain,

⁴¹Yihtöre ngaich ök Filistain ngaich haröhtöre nö in Tāvit; ngaich ök tarik kameunkö ök lanaklö ò nö urēhĕkūö ò.

⁴²Ngaich hē ök Filistain nö chingā-aṅl kūöre, ngaich meūkö Tāvit, ahūöngen ò ngaich anga-aṅ: pò ò nö töng ayal, turë elmat, keuheūtlöre inrē nö vāyö arëkūö.

⁴³Ngaich ök Filistain nö ngö ṙô tö Tāvit, Am öichu, töp lökten meh yihtöre in chu höng tinkūngu? I nup tēvre ṙô ngaich ök Filistain nö rūtngövah Tāvit.

⁴⁴Ngö ṙô ngaich ök Filistain tö Tāvit, Ta-ih hòṅ chu kētö ngam alaha meh i në chehechōn el kuföt, i në töṙeūla inrē el kahôyö.

⁴⁵Ngö ṙô ngaich Tāvit tök Filistian, Yih man më-eṅ in chu öm sanëtu, vöiyu, lanāku elngòh inrē? Yih pöri chū-ö in meh i mine-eny ngam Mā Tēv yip tömaṙôngö, ngam Tēv vē kumyung aṅ Israĕl, vē tömiṙē-ĕyö tö meh.

⁴⁶I ngih sakāmö an min ngam Mā Tēv nö kēten meh eltī chu; ngaich chū-ö min fëlngen meh, kēngö ngam kui meh inrē nö ṙā-ang in meh; kētö nup tökapah alaha yip kumyung aṅ Filistain inrē i ngih sakāmö nö i në chehechōn el kuföt i nup tötainy töṙeūla inrē el ngih tumlat; hòn ṙòkhöre në panam nö akahalōn tö Israĕl nö Tēvu:

⁴⁷Hòṅ vē ihih inrē nö ṙòkhöre tömūlhaka nö akahalōn tö ngam Mā Tēv nö öt aṅtī tö sanët vöi inrē nö hayöölen: pò ngih kinyūngö nö kinyūngö ngam Mā Tēv, ngaich kēten meh min anga-aṅ eltī ih.

⁴⁸Ngaich, hē ngam Filistain nö choholre, yihtöre nö haröhtöre nö höngkūö Tāvit, ka-eūyen ngaich Tāvit, faltöre ngaich nö i yik kumyung nö höngkūö ök Filitain.

⁴⁹Sëphöttīre ngaich Tāvit nö el ök inyulre, hēngö kahënyi ngaich tö ihong, chuvīlö e ngaich, ngaich ök Filistian nö nyāha māl; talöphötvö ngaich ök ihong nö i māl ò, tafahkūö ngaich anga-aṅ nö fukngö nö el tumlat.

⁵⁰Höng aṅtī tö chinvil kunleh ihong inrē ang Tāvit nö mihôiṅ tök Filistain, fël ök Filistian inrē, ngaich kumpahangvah ò; hö-ö pöri Tāvit nö aṅhaṅv eltī tö fël.

⁵¹Faltöre ngaich Tāvit, söklöre ngaich nö i alaha ök Filistain, kē ök fël ò ngaich, ngaich hōknyen ò nö rā-ang el ök inyul ò, kumpahang vah ò ngaich, aṅtīten tö ò inrē nö rökngö ök kui ò. Hē yik Filistain ngaich nö meuk ök nangnyi tökalēḵ kūö cha nö kapah, falngöre cha-a ngaich.

⁵²Ngaich yik tarik Israel tö yik aṅ Yūtā inrē nö choholre, ayôṙa inrē, ngaich lūḵ yik Filistain, hanöng saha sanölta cha nö i Kāt, i nuk inkūp Ĕkròn. Ngaich yik tönyahavö Filistain nö fukngö nö el talöökö chamuh Sa-arēm, söl i Kāt, Ĕkròn inrē.

⁵³Havantöre ngaich yik kūön Issrel nö ṙeū-eung i linū-u yik Filistain, piyāingö ök elyöngö cha ngaich cha-a.

⁵⁴Kē ök kui ök Filistian ngaich ang Tāvit, ngaich kētö e nö i Yērusalem; ṙātu pöri ök lanaklö ò nö el rūkui ò.

⁵⁵Ngaich hē Sôl nö meūkö Tāvit nö lā-al ök Filistain, ngö ṙô ngaich anga-aṅ tö Apnör, ök yöngkūö kumyung, Apnör, kūön chīö ang mgòh tö-ayal? Ngaich Apnör nö ngö ṙô, Sā ngam nômö meh nö tö-aṅ öt huveū-euṙô chin, Ō rācha.

⁵⁶Ngaich ngö ṙô ök rācha, Hatöngtöre man töp tökūönu tö ngòh nyīö.

⁵⁷Ngaich hē invantö Tāvit nö rā-ang finëlngö ök Filistian, kē an ngaich Apnör, ngaich kēten ò nö i kūö Sôl nöng aṅhaṅv eltī tök kui ök Filistain.

⁵⁸Ngaich Sôl nö ngö ṙô tö ò, Kūön chīö öm më-eṅ, me-eṅ ṙāl tarik? Ngaich sap ṙô ò Tāvit, Kūön öp tarikmeh chin Yēsī aṅ Petlihem