Read Car_Nicobarese 1 SAMUĔL 18 Bible Online

1 SAMUĔL 18 - Car_Nicobarese bible

1 SAMUĔL 18

¹Ngaich, hē ò nö keuheūtô nö ve-ekūö Sôl, ngaich ök ellōn Yônatan nö mūlta nö i ellōn Tāvit, hangenlōn ngaich Yônatan tö ò sā hanāngenlōn ò tö re.

²Kē an ngaich Sôl ik sakāmö angū-ö, ngaich öt hòṅ halöngngen ò nö kiröönngöre nö chuh patī ök yöng re.

³Kūöre ngaich Yônatan nö hāngenlōn tö ò nö sālōn retöre, vī kinlēḵngôre ngaich anga-aṅ nö in Tāvit inrē.

⁴Luhngö ök tö-aṙū inyut re ngaich Yônatan ök mī-i alaha ò, ngaich kēten e nö in Tāvit, tök tökiröng inyut ò inrē, tök sanët ò, tök linreny ò, tök inmöpṙat ò inrē.

⁵Kiröönköre ngaich Tāvit ip töng kū-ö tī Sôl nö tīnngen ò, akahaṙa inlahen inrē: asöklöng anga-aṅ inrē tö Sôl nö i kui yik tarik kumyung, ngaich tölöök angū-ö nö i kūö yik tarik nö ṙòkhöre, i kūö yik tarik Sôl inrē.

⁶Ngaich ik yanīhi cha, hē Tāvit nö havan nö ṙā-ang i finëlngö ök Filistian hē yik kikānö aṅ ël nuk elpanam Israĕl nö kunyī-inyre, tikökṙôre kiṙīöm inrē, nö höngkūö ök rācha Sôl, nö holtö timpröl, holtö ṙanāmölōn, holtö nup ranöng inrē.

⁷Sap ṙô höö yik kikānö nö tikökṙôre ik minyamre, nö ngö ṙô, Köṅnyu pô an Sôl, ngaich Tāvit nö söm köṅny pô.

⁸Līn ngaich ang Sôl kunyahalōn inrē tö ngih ṙô; ngaich ngö ṙô anga-aṅ, Eū-eu Tāvit yin nö söm köṅny pô, eū-eu chu pöri cha-a höng köṅnyu pô: sitih ang anga-aṅ nö pōi höiny ngaich an yih nöng ngam pūlngö?

⁹Hē ten tö e angū-ö sakāmö iṙūöhen inrē ang Sôl nöng mathanga tö Tēvit.

¹⁰Ngaich ik huṙöich, ök tötlöök ma-alaha ṙameū-eung im Tēv nö kalē-ĕ taneungti nö in Sôl, ngaich anga-aṅ nö katūöyaṙen nö el ngam patī; röng ngaich ang Tāvit, sā ò i tö ṙunghöre: aṅhaṅv eltī ang Sôl tök vöi re.

¹¹Tamtökūö ök vöi ngaich ang Sôl; pò ò ngö ṙô, Tāmö Tāvit chin min nö tufūni i kaha patī. Ngaich nët heuh ang Tāvit nö hakūnngö elmat ò.

¹²Pa-ekūö ang Sôl tö Tāvit, pò ngam Mā Tēv nö in ò, ngaich nö kē-ĕngre nö ṙā-ang in Sôl.

¹³Lökten Sôl nö ṙūöngen ò nö ṙā-ang in ò, vīlen ò ngaich nö yöngkūö töhĕng köṅny; havötköre ngaich anga-aṅ yih inrē nö i kūö yik tarik.

¹⁴Ngaich Tāvit i nup talöökö ò nö ṙòkhöre nö lēnö inlaha; in ò inrē ngam Mā Tēv.

¹⁵Ngaich hē Sôl nö meūkan nö lēnö inlaha, vöö ngaich anga-aṅ nö sökhak nö in ò.

¹⁶Ṙòkhöre pöri yik Israĕl tö Yūtā inrē nö hāngenlōn tö Tāvit; pò ò nö havötköre yih inrē nö in cha.

¹⁷Ngö ṙô ngaich Sôl tö Tāvit, Meuk ngam maṙöinylö kikānö kūön chu Mërap, kēten ò chin min nö pīhö meh: höng chööḵ nyen tö chu më-eṅ um pa-ekūö kiyung i kinyūngö ngam Mā Tēv inrē. Pò Sôl nö ngö ṙô, Uh an yēḵ ngam kël chu nö fuk in ò hökngen ngam kël yip Filistain pöri nö fuk in ò.

¹⁸Ngaich ngö ṙô Tāvit tö Sôl, Achīö öich chū-ö, asuh öng inrē ngih nômö chu, hēk asuh ap mupīhö ap yöng chu nö i Israĕl, töp lökten chu min köinykūön ngam rācha?

¹⁹Ngaich pöri hē Mërap ök kikānö kūön Sôl nö kētu lang nö in Tāvit, ngaich kē-ĕyö nö in Etrīel ök aṅ Mehōlat nö pīhö ò.

²⁰Ngaich pöri Maiköl ök kikānö kūön Sôl nö hangenlōn tö Tāvit: ngaich cha-a nö ve-eny nang Sôl, ṙāmölōn ngaich Sôl tö e.

²¹Ngö ṙô ngaich Sôl, Hòṅ kēten ò chin in ò, hòṅ ò nö tinngöp ò, hòṅ ngam kël yip Filitsain inrē nö lā-al ò. Lökten Sôl nö ngö ṙô tö Tāvit, Köinykūön chu man min töngamuh nö innët heuh.

²²Kētö chöngö yik tarik re ngaich Sôl, nö ngö ṙô, Ulāikôre yin in Tāvit, öi ngö ṙô, Yĕh meuk, ṙāmölōn öp rācha nö in meh, hāngenlōn inrē tö meh yip tarik ò nö ṙòkhöre: lökten man yĕh ngaich köinykūön öp rācha.

²³Ve-eny nang Tāvit ngaich yip tarik Sôl tö në ṙô. Ngaich ngö ṙô Tāvit, Töng höhövṙen öng angū-ö tö elmat yīö yĕi köinykūön rācha, yĕh meuk tö chu yāich tarik, töng höhöv hananghuṙen?

²⁴Ngö ṙô ngaich yik tarik Sôl nö ve-eny nang ò, Ngö inlahen ṙô ap taheui Tāvit.

²⁵Ngö ṙô ngaich ang sôl, Ngö ṙô yin tö Tāvit, Rö-ö ap rācha nö hōtö ṙāi pīhö meh, höng hēngòng pöri laneūichlö yip aṅ Filistain, nö invahalah ap rācha nö i yip lā-al ò. Tö lōnten Tāvit pöri Sôl nö fuk eltī yip Filistian.

²⁶Ngaich hē yik tarik Sôl nö ve-eny në ṙô nö in Tāvit, ṙāmölōn ngaich Tāvit, ṙāmölōn ngaich Tāvit tö re nö köinykūön ök rācha. Ngaich öl nuk sakāmö nö keuheūt;

²⁷Hōklöre ngaich Tāvit nö kiröönngöre, anga-aṅ tö yik tarik ò, nëtòng fahëlngö ngaich tö yik tarik Filistain; kum tö nuk laneūchlökūö chehen cha ngaich Tāvit, ngaich kēten u nö ik rācha nö kaheūkö, pòn hòṅ köinykūön ngam rācha anga-aṅ nö ngaich. Ngaich Sôl nö kēten Maiköl nö pīhö ò ök kikānö kūön ò.

²⁸Ngaich Sôl nö meuk akahalōn inrē tö ngam Mā Tēv nö in Tāvit; hāngenlōn inrē Maiköl tö ò ök kikānö kūön Sôl.

²⁹Ṙūhölre pinhë-eṅkūö ngaich Sôl tö Tāvit; ngaich Sôl nö iṙūöhen nö lamā-al Tāvit.

³⁰Ngaich yik mā yip Filistain nö kiröönngöre; ngaich i tum heuh cha nö kiröönngöre, höng lēnö inlahen Tāvit nö mötlö tö yik tarik Sôl; pòn hōtök minë-enyre nö löök.