Read Car_Nicobarese 1 SAMUĔL 19 Bible Online

1 SAMUĔL 19 - Car_Nicobarese bible

1 SAMUĔL 19

¹Vë-ekūö ök kūönre ngaich Sôl ang Yônatan, yik tarik ò inrē nö ṙòkhöre, nö hōten cha nö fëlngen Tāvit.

²Ngaich pöri ök kūön Sôl ang Yônatan nö pōyen kumchiklōn nö in Tāvit. Vë-eny nang Tāvit ngaich Yônatan, nö ngö ṙô, Lukkenre ap yöng chu nö hòṅ fëlngen meh ang Sôl: vë-ekūö meh chin lökten tö meh öm haṙēmngenre ip peuheū, ngöh inrē më-eṅ i chūökö tönyatngö, öm hayungöre:

³Töich kiröönngöre chū-ö öich sökhaka ip yöng re el kahôyö ip chūök meh, ngaich vë-ekūö öp yöng re chū-ö min tö inlahen meh; ngaich vë-eny nang meh chū-ö min tö nup tö töng ṙô ò.

⁴Ngaich Yônatan nö löökö ṙô tö Tāvit nö ik yöng re ang Sôl, nö ngö ṙô tö ò, Uh an yēḵ ngam rācha nö fāluṙen tö tökööl nö ip tarik re in Tāvit; tön rö-ö ap anga-aṅ nö fāluṙen tö tökööl nö in meh, kūö nup la-en ò inrē nö lā in meh nö tölngö tölöök:

⁵Pò ò nöng eltī re tī tö nômö re. Fëlngö ök Filistain inrē ngaich tī tö tökiröng minhôiṅyö nö lā in Israĕl: meūkö e man ngaich, ngaich öm ṙāmölōn: sitih ṙöng öm min fāluṙen tö tökööl öm i mahām töt fāluṙen, öm fëlngen Tāvit nöng öt löknyu chööḵnyi?

⁶Hang ṙô Yônatan ngaich ang Sôl: chūökuṙô ngaich Sôl nö kilēḵngôre, nö ngö, Sā ngam Mā Tēv nö tö-aṅ, hö-ö ap min nö kumpahaivah.

⁷Havëten Tāvit ngaich Yônatan, ngaich hamukhömat ò tö u nö ṙòkhöre. Ngôṅten Tāvit ngaich Yônatan nö in Sôl, i kūö ò ngaich anga-aṅ, sā re tö lā urĕh.

⁸Ngaich kinyūngö ök umuh nö hēk: kiröönngöre ngaich Tāvit, ngaich kiyung yik filistain, pōi hang vah tī inrē nö fëlngen cha, falngöre cha-a ngaich nö ṙā-ang in ò.

⁹In Sôl ngaich ök tötlöök ma-alaha, hē ò nö ūichhaka nö el patī re nö aṅ eltī tök vöire; röng ngaich ang Tāvit.

¹⁰Lukkenre ngaich Sôl nö hòṅ fëlngen Tāvit nö hòṅ tamten ò nö i kaha patī nö aṅtī tök vöi; tilīöngöre pöri anga-aṅ nö ṙā-ang i kūö Sôl, ngaich anga-aṅ nöng tam kaha patī nö aṅtī tök vöi re: falngöre ngaich Tāvit, nö öt kô-òng vah ik hatööm.

¹¹Ngaich Sôl nö tīnngö chamöha nö i patī Tāvit, nö höngan, ngaich fëlngen ò ip peuheū: vënyö nang Tāvit ngaich ök pīhö ò ang Maiköl, nö ngö ṙô, Yē meh öt hayööken ngam nômö re ing hatööm, huṙöich man min fëliyö.

¹²Ngaich Maiköl nö hayôkten Tāvit nö löktö kūö inkūp lökhöt kuföt: kiröönngöre ngaich anga-aṅ, falngöre inrē ngaich öt kô-òngvah.

¹³Kē ök Taraf ngaich ang Maiköl haṙōlngen ò ngaich nö el chamam, ṙāḵtö tanômö kui ò ngaich tök sanôi pököre, kahumngen ò ngaich tö hilā.

¹⁴Ngaich hē Sôl nö tīnngö chamöha nö kē-ĕ Tāvit, ngaich ngö ṙô anga-aṅ, Vahav öni.

¹⁵Tīnngö chamöha ngaich Sôl nö ngëichken Tāvit, nö ngö ṙô, Kēten ò in chu nöng el chamam, hòṅ chu fëlngen ò.

¹⁶Ngaich hē yik chamöha nö yih, Yĕh meuk ök taraf nö el chamam tanômu kui tök sanôi pököre.

¹⁷Ngaich ngö ṙô Sôl tö Maiköl, Kūöyòh öm ngatī hapūten chu, öm hökngörit ök tökunyaha elmat tö chu, ngaich ök yih nö öt kô-òngvah? Sap ṙô Sôl ngaich ang Maiköl, Ngö ṙô ök taheui tö chu, Hökngen chu kiröönngöre; Kūöyòh ṙöng öich min fëlngen meh?

¹⁸Falngöre ngaich Tāvit, ngaich öt kô-òngvah, yih ngaich nö in Samu-ĕl nö i Rāma, ngaich keuheūtnyöre ṙô nö vë-eny nang ò tö tī Sôl tö ò. Ngaich anga-aṅ tö Samu-ĕl inrē nö kiröönngöre ngaich iyöng Nāyôt.

¹⁹Vënyu angū-ö ngaich nö in Sôl, nö ngö, Yĕh meuk, i Nayôt ap Tāvit i Rāma.

²⁰Tīnngö chamöha ngaich Sôl nö kē-ĕ Tāvit: ngaich hē cha nö meuk yik tömūl pròfĕt nö mikahaten sökhak inrē Samu-ĕl nö yöngṙen cha, teungtöre ngaich ngam ma-alaha aṅ im Tēv nö in yik chamöha tahīnngö Sôl ngaich cha-a inrē nö mikahaten.

²¹Ngaich hē e nö vënyu nö in Sôl, tīnngö tahëng ngaich anga-aṅ chamöha, ngaich cha-a inrē nö mikahaten. Hēk ang Sôl nö tīnngö chamöha im linūöi heuh, ngaich cha-a inrē nö mikahaten.

²²Kiröönngöre anga-aṅ inrē nö chuh Rāma, ngaich sölta nö ik tökiröng tö-ūlö mak i Sēku: ngö ṙô ngaich anga-aṅ nö hatön, Isuh nak nāṅ Samu-ĕl nāṅ Tāvit? Ngaich hĕng tak ök tö ngö ṙô, Yĕh meuk i Nayôt nak i Rāma.

²³Chuh in e ngaich teungtöre ök ma-alaha aṅ im Tēv nö in ò inrē, ngaich anga-aṅ nöng iṙūöhöṙô, nö mumkahten hanöng saha ò nö sölta nö i Nayôt i Rāma.

²⁴Luhngö inyut re inrē anga-aṅ, ngaich i kūö Samu-ĕl inrē nö mikahaten, ngaich ṙōlngöre nöng chumlal nö hĕng sumkam hĕng mitööm inrē. Lökten cha nö ngö ṙô, In yip pròfĕt ang inrē Sôl?