Read Car_Nicobarese 1 SAMUĔL 20 Bible Online

1 SAMUĔL 20 - Car_Nicobarese bible

1 SAMUĔL 20

¹Falngöre ngaich Tāvit nö ṙāngö i Nayôt i Rāma, ngaich yih ngaich ngö ṙô nö i kūö Yônatan, Asuh ap falngen chu? Asuh ap tötlöök in chu? Asuh ap inrē tökööl chu i kūö ap yöng meh, töp lökten ò nö chöh ngih nômö chu?

²Ngaich nö ngö ṙô anga-aṅ tö ò, Sō-oti an ngam Tēv! Öt kapah man min. Yĕh meuk, öt hēngö la-en ap yöng chu tö tökiröng hēk tökūöṅnö, öthō pöri nö öt hameuktö e nö in chu: kūöyòh ṙöng ap yöng chu nö hayunngö e tö chu? Öt ngatī ana.

³Chūöku ṙô inrē Tāvit nö ngö ṙô, Akahalōn ap yöng meh tö chu hanghuṙen tö meh; ngaich ngö ṙô anga-aṅ, Un akahalōn ap Yônatan tö ngih, hòṅ ò nö tö haṙivlōn: tökô-en pöri nö sā ngam Mā Tēv nö tö-aṅ sā ngih nômö chu inrē nö tö-aṅ, höng humengtöre vanāng ap ihôi chu tö ngam kinpaha.

⁴Ngaich ngö ṙô Yônatan tö Tāvit, Öp töng lōn meh, ngaich chööḵnyöten tö meh chū-ö min kēken e.

⁵Ngö ṙô ngaich Tāvit tö Yônatan, Yĕh meuk, ayöö ap chingëṅt huṙöich, ngaich ötkô chū-ö ip nyinā-aṅ öich hol kūö öp rācha: hökngen chu pöri tā-a kiröönngöre, hòṅ chu hayunngöre el kahôyö söl ip linūöi sumkam tö harap.

⁶Yē ap yöng meh min nö öt hööhöng alaha tö chu, ngaich ngö ṙô më-eṅ, Havë-engritre ök Tāvit nö in chu pò ò nö hòṅ fal hë nö chuh Pethlihem ap elpanam ò: pò e nö kinṙeuk samyeūheu nö tökētu nö umuh tö yip mak alaha ò.

⁷Ngaich yē ò nö ngö ṙô, Tölöök an, ngaich ngòh tarik meh min nö lanāmu: yē ò pöri nö tainy, akahalōn më-eṅ töp tötlöök nö lēnngö nö in ò.

⁸Lökten man aṙē-ĕlōn tö ngòh tarik re; tön kētö ngòh tarik re man ngaich nö im kinlēḵngô in meh aṅ im Mā Tēv: yē chu pöri aṅhaṅv in tö tötlöök, fëngen chu yēḵ më-eṅ; kūöyòh ṙöng öm hòṅ kēten chu ip yöng re?

⁹Ngaich ngö ṙô ang Yônatan, Marôvat an yēḵ angū-ö tö meh! Yē chu öre akahalōn töp tötlöök lōn öp yöng re nö yih nö i kui meh, öt vë-eny e öich öre in meh?

¹⁰Ngaich ngö ṙô Tāvit tö Yônatan, Chīap min vamë-eny nang chu yē ap yöng meh min nö amahtuṙen nö kësöṙô nö sap ṙô meh?

¹¹Ngö ṙô ngaich Yônatan tö Tāvit, Tā-a tai kunyī-inyre el kahôyö. Nëtre taka cha-a ngaich nö kunyī-inyre nö el kahôyö.

¹²Ngaich ngö ṙô Yônatan tö Tāvit, Ngam Mā Tēv, ngam Mā Tēv Israĕl, anga-aṅ an yēḵ mameuk; yē chu min keuheūten ahangnyö nang öp yöng re i ngih ṙētak huṙöich, hēk ip linūöi sumkam, yĕh meuk tölöökuvö la-en Tāvit, ngaich öt söömtö e hòng chū-ö min in meh, hameuk tö e inrē in meh?

¹³Ngati tī an yēḵ ngam Mā Tēv tö Yônatan, mötlö inrē yē e nö lōn öp yöng chu nö chōchö tī nö in meh, yē chu öt hameuktö e in meh, ngaich tīnngörit meh inrē, hòṅ meh kiröönngöre im kumchikṙen; in meh an yēḵ inrē ngam Mā Tēv, nö sā ò nö ip yöng chu.

¹⁴Ngaich uh më-eṅ inrē höng i saha chu aṅ öm hameuktö neūkölōn ngam Mā Tēv, hòṅ chu öt kapah.

¹⁵Uh pöri më-eṅ inrē rökngö neūkölōnre öm örheūheu i patī chu: hö-ö, yē ngam Mā Tēv nö keuheūtngöre vah tī nö rökngen yip tökunyaha elmat tö Tāvit.

¹⁶Vī kinlēḵngô ngaich ang Yônatan nö i patī Tāvit, nö ngö ṙô, Ngaich ngam Mā Tēv min nö hòṅ havëkö e nö ṙā-ang eltī yip tökunyaha elmat tö Tāvit.

¹⁷Ngaich Yônatan nö hōten Tāvit nö kilēḵngôre nö hēk, nö ip hanāngenlōnre tö ò; pòn hāngenlōn anga-aṅ tö ò nö sā hanāngenlōnre tö nômö re.

¹⁸Ngaich ngö ṙô Yônatan tö ò, Huṙöich öp chingëṅt nö ayöö: ngaich hö-övö min më-eṅ, pò ngam anūchö meh min nö öt aṅhavö.

¹⁹Ngaich yē meh lūöi hang sumkam hangöhngöre, ngaich ka-eūyen pömchö kiröönngöre, yih ip chūökö öp chūök meh hayunngöre ik hē ngih la-en nö ṙòngmö eltī, ngaich höngngöh ip ihong Esel.

²⁰Lūöi nòng lirenyngö chū-ö min tö chòk i kaha e öich sā kamlahngö kūö chòk re.

²¹Ngaich, yĕh meuk, tīntö öp ṙāl tarik chū-ö min, öich ngö ṙô, Kuṙòh, chöh nup chòk. Yē chu min ngö ṙô töp ṙāl tarik, Yĕh meuk, lā hih nup chòk tö meh: kē-ĕ u, ngaich yihtöre; pò ngam kumchikṙen nö in meh öt chanökhuṙen, sā ngam Mā Tēv nö tö-aṅ.

²²Yē chu pöri ngö ṙô töp nyīö, Yĕh meuk, lā muh nup chòk tö meh: kiröönngöre më-eṅ ngaich; tön ngaich man tīni rit tö ngam Mā Tēv.

²³Ip ṙô hā pöri vë-ekūöre ngaich, yĕh meuk, örheūheu An ngam Mā Tēv nö ihôi meh tö chu.

²⁴Ngaich hayunngöre Tāvit nö el kahôyö ngaich hē ngam chingëṅt nö yih nö ayöö, ūichngöre ngaich ngam rācha nö nyā nö el anūchö re,

²⁵Ngaich ngam rācha nö el anūchö re, sā re i tö ṙung; nö el ök anūchö i kaha patī; söklöre ngaich Yônatan ngaich ūichngöre Apnör nö lā in Sôl: öt āṅhavkūö pöri ök chūök Tāvit.

²⁶Hö-ö pöri Sôl nö ṙô-òv hē e: pòn ngö lōn anga-aṅ Yô-òv öp lāinyngen ò, öt het apa; kô-en ap nö öthet.

²⁷Ngaich im huṙöich unôichrit ngam ayöö chingëṅt, ngam innëtö sakāmö, öp chūök Tāvit nö öt aṅhavkūö: ngaich ngö ṙô Sôl tö Yônatan, öp kūön ò, Kūöyòh ök kūön Yēsī nö öt yih nö nyā, öt rēhĕn vahë öt rēhĕn tö taheui?

²⁸Ngaich sap ṙô Sôl ang Yônatan, Havë-engritre ök Tāvit nö in chu nö chuh Petlihem:

²⁹Nö ngö ṙô, vë-ekūö meh chin, hökngen chu kiröönngöre; pò yip aṅ patī ih nö kētö tökētu nö elpanam; ngaich öp mëm chu nö chuh umuh; yē chu aṙētuvö tö meh, hökngen chu kiröönngöre, vë-ekūö meh chin, öich chônghörekūö yip mëm re. Lökten öku nö öt yih nö im mīs ngam rācha.

³⁰Hūlö kūö tanānyö ngaich Sôl nö in Yônatan, ngaich nö ṙô tö ò, Më-eṅ kūön kikānö töngë-eṅ ellōn ma-ahôngö chö-ngö, öt akahalōn öich kaneh tö meh atöllö öp kūön Yēsī nö minṙēngö meh, minṙēngö linchôyö öp kikānö yöng meh inrē?

³¹Pòn irô-òten öp kūön Yēsī nö iyöng i kūö ngih tumlat, hö-ö min më-eṅ köp, öt rēhĕn ngam pūlngö meh. Lökten man tīnngö kamëten ò nö in chu, tön hòṅ hakô-òivah ap min nö kapah.

³²Ngaich sap ṙô ök yöng re Yônatan ang Sôl, nö ngö ṙô tö ò, Kūöyòh ap min nö kumpaha? Asuh ap falngen ò?

³³Kusat tök vöi ngaich ang Sôl nö in ò nö tāman: angū-ö lökten Yônatan nö akahalōn tök yöng ò nö kalē-ĕlōn nö hòṅ kumpahang vah Tāvit.

³⁴Choholre ngaich yônatan nö ṙā-ang ik mīs nö tainy, ngaich öt nyā im innëtö sakāmö ngam chingëṅt: pò ò nö haṙivlōn tö Tāvit, kūö ök yöng ò nö miṙēngen ò.

³⁵Ngaich im peuheū, ang Yônatan nö kiröönngöre nö el kahôiyö ik hē ṙētak ṙô ò tö Tāvit, hĕng tak ök kun ṙāl tarik hol ò.

³⁶Ngaich ngö ṙô anga-aṅ tök ṙāl tarik, Fal man chöh nup chòk linrenyngö chu. Ngaich hē ngam ṙāl tarik nö fal, hĕng nòng lirenyngö ngaich anga-aṅ tö chòk nö havāngngö kui ò.

³⁷Ngaich hē ök ṙāl tarik nö sölta nö ik chòk ök lirenyngö Yônatan, ngaich hūḵngörit ök ṙāl tarik ang Yônatan, nö ngö ṙô, Röh öp chòk nö lā muh tö meh?

³⁸Hūḵngörit ök ṙāl tarik Yônatan, nö ngö, Ka-eūyen, um höngngöh. Ngaich ök ṙāl tarik Yônatan nö hamūl nuk chòk, yihtöre ngaich nö ik yöngṙen re.

³⁹Öt akahalōn pöri ök ṙāl tarik tö yô-òv: höng nā Yônatan nā Tāvit tö akahalōn tö e.

⁴⁰Kētö nuk chehetī re ngaich Yônatan nö ik ṙāl tarik ngaich ngö ṙô tö ò, Kuṙòh, kumten u chuh elpanam.

⁴¹Ngaich höng feus hë ngam ṙāl tarik choholre ngaich Tāvit nö ṙā-ang ik chūökre lā lòhngö, fātngökūöre ngaich nö el tumlat, lūöi heuh inrē nö sōnngöre: kö hāmkūö höö cha-a ngaich kö peunyhökūö höö inrē, hanöng saha Tāvit nö cheingö.

⁴²Ngaich ngö ṙô Yônatan tö Tāvit, Ngaich man im kumchikṙen mötö hā nëtre taka kilēngôre i minē-eny ngam Mā Tēv, ai ngö ṙô, Örheūheu An min ngam Mā Tēv nö ihôi chu tö meh, ihôi öp kūön chu inrē tö öp kūön meh. Choholre ngaich anga-aṅ nö kirööngöre: ngaich Yônatan nö chuh elpanam.