Read Car_Nicobarese 1 SAMUĔL 21 Bible Online

1 SAMUĔL 21 - Car_Nicobarese bible

1 SAMUĔL 21

¹Ngaich yih ang Tāvit nö i Nòp ök kūön ṙô Ahimelek yihtöre ngaich Ahimelek nö höngkūö Tāvit nöng kichëyöre, ngaich ngö ṙô tö ò, Kūöyòh öm höng hĕng tak öm öt hōlu tö tarik?

²Ngaich ngö ṙô Tavit tök kūönṙô ang Ahimelek, Töölô chin töp rācha rācha ip töhĕng la-en, nö ngö ṙô anga-aṅ tö chu, Un hĕng tak tarik tö-akahalōn tö la-en öp tinīnngö meh tö chu, öp tinöölô meh tö chu inrē? Halēnngen yip ṙāl tarik chin nö ip töhĕng chūökö.

³Lökten yĕh asuh ap eltī meh? Kētö eltī chu man yĕh tö rôti taneui, hēk nup töng sitih umuh.

⁴Ngaich sap ṙô Tavit ök kūönṙô nö ngö ṙô, Öt āṅhav eltī chin tö töng rôtiṙa, höng töhet nup umuh rôti; höng yē yip ṙāl tarik pöri nö köhngen tö kikānö.

⁵Ngaich sap ṙô ök kūönṙô ang Tāvit,nö ngö ṙô tö ò, Kô-en in lūöi hang sumkam ngaich öt i kikānö; hē chu kiröönngöre, het nuk chūök nyā-aṅkūö yip ṙāl tarik, pòrô ngih kinröönngö nö töng ha-eh; ngaich nup yih chūök nyā-aṅkūö cha röh töngamuh nö töhet?

⁶Lökten ök kūönṙô nö kē-ĕkūö ò tö töhet rôti: pòn öt rôtiṙuvö umuh höng nuk töhet rôti; nuk tökē-ĕ nö ṙā-ang i kūö ngam Mā Tēv, nö töhaṙāchö rôti im sakamö hē u nö kē-ĕyö.

⁷Ngaich hĕng tak ök umuh tarik mu-umuh hē e aṅ in yik tarik Sôl, töhangöhöyö nö i kūö ngam Mā Tēv; Tô-ek ök minë-eny ò aṅ Itöm, mākūö yik yōm pököre aṅ in Sôl.

⁸Ngaich ngö ṙô Tāvit tö Ahimelek, Öt āṅhav in ömeh inrē ihih tö vöi hēk tachôi fël? Tön öt rēhĕn chin kumtö ök tachôi fël re öt rēnĕn aṅhav in tö aṅtī re, kūö ngam la-en ngam rācha nö tökurāten.

⁹Ngaich ngö ngö ṙô ök kūönṙô, Tachôi fël Kōliat ök ihih ök Filistian, ök fahëlngen meh el achāṙô Elah, yĕh meuk, haṙunghaka ap nö el hilā lā uk ngam sörplis: yē meh hòṅ kē an, ngaich kē an: tön öt tahëngu ihih, höng anga-aṅ. Ngaich ngö ṙô Tāvit, Öt asā-avö ap anga-aṅ; kēten ò in chu.

¹⁰Hōklöre ngaich Tāvit, ngaich falngöre hē e tö pinhe-eṅkūöre tö Sôl, ngaich chuh in Akis ök rācha aṅ Kāt.

¹¹Ngaich yik tarik Akis nö ngö ṙô tö ò, Röh ang kan ngòh nö Tāvit ngòh rācha ngih panam? Röh yik nö tikökngen ò nö i kinṙīömö, nö ngö ṙô; Köṅnyu pôḵ ang Sôl, Ngaich söm köny pôḵ ang Tāvit?

¹²Ngaich ang Tāvit nö haköpngö minë ṙô nö ellōn re, ngaich nö pa-ekūö takô tö Akis ök rācha aṅ Kāt.

¹³Haṙīngö inlahenre ngaich anga-aṅ, nö i kūö cha, ngaich töltöre nö katūöyaṙen nö eltī cha, ngaich kayôt kūö nuk inkūp ök lökhöt, ngaich hökngen pēngöre nö alēngköti nö i sanôi kūö ò.

¹⁴Ngaich, ngö ṙô Akis tö yik tarikre, Yĕh meuk, meuk ngam tarik yin nö tökatūöyaṙen: kūöyòh öi pöken kēten ò in chu?

¹⁵Hāṅten ṙöng öich tö tökatūöyaṙen tarik, töp lökten yīö kēten ngòh tökatūöyaṙen tarik nö i kūö chu nö nyamamkö kūö chu? Hayihtu ang min ngòh tarik nö i patī chu?