Read Car_Nicobarese 1 SAMUĔL 22 Bible Online

1 SAMUĔL 22 - Car_Nicobarese bible

1 SAMUĔL 22

¹Lökten ang Tāvit nö ṙā-ang umuh nö kiröönngöre, el ök kinluhu ngaich i Atulam nö öt kô-òng vah; ngaich hē yik mak alaha ò tö yip aṅ patī öp yöng ò inrē nö hāngö e, yihtöre ngaich cha-a nö in ò nö umuh.

²Ṙòkhöre ngaich nö hamūlöre nö in ò yik tökihngen, töhötṙehevö yik tökihngen ellōn inrē; ngaich anga-aṅ nö yöngkūö cha: fënòng yik tarik in ò nö umuh.

³Ngaich ṙā-ang umuh ang Tāvit nö chuh Mispeh i Mô-āp; ngaich ngö ṙô anga aṅ tök rācha aṅ Mô-āp, Vë-ekūö meh chin hökngen ngòh yöng chu man kikōnyö tö ngòh yöng chu kikānö inrē nö yih,nö in meh, hanöng saha mikahlōn chu min tö tī ngam Tēv tö chu.

⁴Ngaich kēten cha anga-aṅ nö i kūö ök rācha aṅ Mô-āp: ngaich cha-a nö iyöng in ò irô-òten Tāvit nö el ök kinluhu.

⁵Ngaich ngö ṙô ök pròfët Kāt tö Tāvit, Uh man höng ngöh el ap kinluhu; kiröönngöre man, kē-ĕngre ip panam Yūtā. Kiröönngöre ngaich Tāvit, ngaich yih nö el inchōn i Hērĕt.

⁶Ngaich Sôl nö hāngö Tāvit nö kôti, tö yip hol ò inrē tarik: höng ūichhaka ang Sôl nö i Kīpiā el katòh ök tamaris chōn i Rāma, nö āṅhaṅv eltī tö vöi re, ṙòkhöre yik tarik ò nö sökhaka nö havīlen ò.

⁷Ngö ṙô ngaich Sôl tö yik tarik re yik mahavīlen ò nö sökhaka, Hangihtöre yin, yī-ö aṅ Penyamin; kö kē-ĕkūö yīö öp min kūön Yēsi tö taṙeū yīö tö panô-òṅ vāin inrē, vīlöng öi min tö ò öi yöngṙen tököṅnyu yöngṙen töṙôngu inrē;

⁸Töp lökten yīö hamūlngöre lā-al chu, ngaich öt hĕng tak öp vamë-eny nang chu tö öp kūön chu nö hamūltöre nö ip kūön Yēsī, öt hĕng tak tö yīö inrē töhaṙivlōn tö chu, hēk mahameukhömat chu töp kūön chu nö haruhlö inlahen öp tarik chu nö lā-al chu, nö hayūnö chu, sā ngih töngamuh?

⁹Sapnyôre ngaich Tôek ök aṅ Itöm, ök samökhaka nö in yik tarik Sôl, nö ngö ṙô, Meuk öp kūön Yēsī chin chū-ö nö yih nö i Nòp, nö in Ahimelek ök kūön Ahitöp.

¹⁰Ngaich anga-aṅ nö kūö ò nö hatöntöre nö im Mā Tēv, ngaich kē tö nyā-aṅkūö ò, kē-ĕkūö ò inrē tök tachôi fël Kōliāt ök Filistain.

¹¹Ngaich ök rācha nö tīnngö mahavëken Ahīmelek ök kūönṙô, kūön Ahitöp, ṙòkhöre inrē yik aṅ patī ök yöng ò yik kūönṙô mi-ī Nòp: ṙòktöre cha-a ngaich nö yih nö ik rācha.

¹²Ngö ṙô ngaich ang Sôl, Hangihtöre man më-en kūön Ahitöp. Mā chu, ihih chini, ngö anga-aṅ nö sap ṙô ò.

¹³Ngö ṙô ngaich Sôl tö ò, Kūöyòh öi yī-ö hamūl ellōnre lā-al chu, më-eṅ töp kūön Yēsī inrē, öm kē-ĕkūö ò tö nyā-aṅkūö, tök tachôi fël inrē, ngaich kūö ò më-eṅ nö hatöntöre nö im Tēv, pòn hōtu anga-aṅ nö choholre nö lā-al chu, nö hayūnö chu, sā ngih töngamuh?

¹⁴Sap ṙô ök rācha ngaich Ahimelek nö ngö ṙô, Achīö ap nö i vē tarik meh nö ṙòkhöre tösā kanô-en Tāvit, öp köinykūön ngam rācha, ök tökēhĕtvö inrē nö in meh i inlēnö, öp tö-ineū-euvö inrē nö el patī meh?

¹⁵Ngaich öich töngamuh kaknyöre hatön ngam Tēv tö pòkūö ò? Marôvat an yēḵ angū-ö tö chu: Uh an yĕh ngam rācha nö kētö fēlen ngòh tarik re, un rēhĕn nö kētu fālen vē aṅ patī ök yöng chu; tön öt akahalōn ön ngòh tarik meh tö u nö ṙòkhöre, tö tökūöṅnen hēk töpōyen.

¹⁶Ngö ṙô ngaich ök rācha tö Ahimelek, Kumpāhaivah man, ṙòkhöre inrē yip aṅ patī öp yöng meh.

¹⁷Ngö ṙô ngaich ök rācha tö yik amahati yik tösökhak nö havīlen ò, Havöölökūöre, fëlngö më kūönṙô ngam Mā Tēv: pò minë eltī cha inrē nö in Tāvit, pò cha inrē nö akahalōn tö ò nö falngöre, ngaich öt hameuktö e nö in chu. Hö-ö, pöri yik tarik ngam rācha nö hōḵ nö kētö tīre nö in yik kūönṙô ngam Mā Tēv.

¹⁸Ngö ṙô ngaich ök rācha tö Tô-ek; Havöölö kūöre man më-eṅ, afuktöre ngaich i më kūönṙô. Havöölökūöre ngaich Tô-ek ök aṅ Itöm, afuktöre ngaich anga-aṅ nö in yik kūönṙô hëvhör anāi taneui tak ngaich yik tarik töfëliyö tö ò yik tö inyuttö linen sörplis, ik sakāmö angū-ö.

¹⁹Keuheūtngöre vah tī anga-aṅ nö aṅtī tö tachôi fël nö fëlngö yik kūönṙô ik elpanam Nòp, hĕnghöre kikōnyö kikānö, nyīö töṙòngmö pōḵ inrē, kōiny nuā, köttö, sīṅp inrē, nö aṅtī tö tachôi fël.

²⁰Hĕng tak ök töt kô-òngvah aṅ in yik kūön Ahimelek ök kūön Ahitöp, ang Apīatör, falngöre anga-aṅ nö in Tāvit.

²¹Vë-eny nang Tāvit ngaich Apīatör tö tī Sôl nö fëlngen yik kūönṙô ngam Mā Tēv.

²²Ngaich ngö ṙô Tāvit tö Apīatör, Akahalōn chin ik sakāmö angū-ö hē Tô-ek nö umuh ök aṅ Itöm, tö ò nö öthō nö öt vë-eny nang Sôl: ngaich chin pô-òvkūö tö kinpaha yik tarik nö ṙòkhöre aṅ patī ök yöng meh.

²³Höngngöh man ngaich in chu, um pa-ekūö; pò öp chamöh ngih nômö chu nö chamöh ngam nômö meh: in chu man min lanakluvö.