Read Car_Nicobarese 1 SAMUĔL 24 Bible Online

1 SAMUĔL 24 - Car_Nicobarese bible

1 SAMUĔL 24

¹Ngaich hē Sôl nö havan nö ṙā-ang i linū-u yik filistain, ngaich vënyu angū-ö nö in ò, nö ngö, Yĕh meuk, el tönyalnyi ap Tāvit i Engkēti.

²Lūöi köṅny kahë ngaich Sôl tö yip tökatöllöng tarik aṅ Israĕl, kiröönngöre ngaich nö chöhö Tāvit tö yik tarik ò inrē nö i kui nup ihong chūök nup hanchōn pököre.

³Ngaich sölta anga-aṅ nö ik kinlōngö sīṅp el talöökö, chūök ök töhĕng kinluhu; kuhēthötre ngaich Sôl nö ël e nö kahumngö kunröönre. Ngaich pöri Tāvit tö yik tarik ò inrē nö lātuhēt takô nö el ngam kinluhu.

⁴Ngaich ngö ṙô yik tarik Tāvit tö ò, Yĕh meuk, tö ngam sakāmö ṙô ngam Mā Tēv tö meh nö ngö ṙô, Yĕh meuk, kētö öp tökunyaha elmat chin min tö meh nö eltī meh, ngaich më-eṅ min tinī-iv tö ò sā öp tölöök lōn meh. Choholre ngaich Tāvit, ngaich kötngö taseū ök tökiröng inyut Sôl nö ulāikö tī re.

⁵Ngaich unôichngöre Tāvit nö tarūka nômö pò ò nö kötngö taseū ök inyut Sôl.

⁶Ngaich ngö ṙô anga-aṅ tö yik tarik re, Sōtu chin ngatī tī tö ngam Mā Tēv im mā chu ngam töhachāmö kui tö ngam Mā Tēv, öich hanyāknyö kël re lā-al ò, pò ò nö töhachāmö kui tö ngam Mā Tēv.

⁷Anū-ö ṙô Tāvit nö tahngen yik tarik, öt halöngten cha nö choholre nö lā-al Sôl. Choholre ngaich Sôl nö ṙā-ang el ök kinluhu, ngaich kiröönngöre.

⁸Chōholre inrē Tāvit nö unôich, ngaich kunyī-inyre nö ṙā-ang el ök kinluhu, ngaich hūḵngörit Sôl, nö ngö ṙô, Mā rācha chu. Ngaich hē Sôl nö tēk uk re, sōntöre ngaich Tāvit nö el tumlat nö salāman.

⁹Ngaich ngö ṙô Tāvit tö Sôl, Kūöyòh ömeh höng hang ṙô tarik tö ngö ṙô, Yĕh meuk, lukkenre öp Tāvit nö hòṅ chökhuti tö meh?

¹⁰Yĕh meuk, ngaich nun minë mat meh töngamuh nö meuk tī ngam Mā Tēv nö kēten meh taheui eltī chu el ngam kinluhu: rīkre inrē yip tamölṙô chu fëlngen meh: aṙēlen meh pöri në mat chu; ngaich ngö ṙô chū-ö, Hö-ö chin hòṅ lūöl tö tī re lā-al ngam mā chu; pò ò nö töhachāmö kui tö ngam Mā Tēv.

¹¹Hēk inrē, kayöngö, meuk, hôṅ meuk ngam taseū ngam inyut meh eltī chu: höng kötngö ngam taseū inyut meh öt fëlngen meh, ngaich akahalōn më-eṅ meuk inrē tö chu öt aṅhaṅv eltī tö tötlöök öt rēhĕn tanôichngen, hö-ö chin köölö fālen in meh, pòrô më-eṅ chöh ngih nômö chu öm hòṅ kē-ĕ e.

¹²Ihôi chu an ngam Mā Tēv tö meh inrē nö akah fālen, havahlö vah chu an ngam Mā Tēv nö in meh: hö-ö pöri në kël chu nö lūöltörenö in meh.

¹³Sā ṙô ngam inchō-oṙô mā misī, Löknyö imtötlöök an nö yih ngam ötlanöökö: hö-ö pöri në kël chu min nö lūölken meh.

¹⁴Achīö ap tölū-u tö ngam rācha Israĕl nö kunyī-inyre? Achīö ap tölū-u tö meh? Tökapah hòng am, mirötö ṙöng.

¹⁵Lökten an ngam Mā Tēv nö akah fālen, sācha ihôi chu tö meh, ngëicha inrē, ve-elkui chu, ṙānyen chu inrē ṙā-ang eltī meh.

¹⁶Ngaich, hē Tāvit nö keuheūtöṙô tö në ṙô nö in Sôl, ngö ṙô ngaich ang Sôl, Ṙô meh ap umuh, më-eṅ kūön chu Tāvit? Ngaich Sôl nö pōitô nö peuiny.

¹⁷Ngö ṙô ngaich anga-aṅ tö Tāvit, Mötlö lanöökö man më-eṅ tö chu: pò meh kētö tölöök in chu, ngaich chū-ö kētö tötlöök in meh.

¹⁸Ngaich man yih ṙô-òv töngamuh tö re ngaich löökö tī in chu: tö ngaich chin kētu eltī meh tö ngam Mā Tēv, ngaich öt fëlngen chu më-eṅ.

¹⁹Yē öp tarik nö kôtökūö töp lā-al re, hökiṙen öp öre tö lööken nö kiröönngöre? Lökten an ngam Mā Tēv nö reushen meh tö tölöök kūö ngam tīmeh in chu taheui.

²⁰Yĕh meuk, ngaich chin akahalōn töngamuh tö meh min kô-en öm rācha, tö ngam pūlngö Israĕl min inrē nö eltī meh nö haköpiyö.

²¹Lökten man tö ngamuh im Mā Tēv chūöku ṙô, tö meh min öt rökngen öp kūön chu unôichrit chu, tö meh min inrē öt piyāingö mine-eny chu ṙā-ang i patī öp yöng chu.

²²Chūöku ṙô ngaich Tāvit nö kilēḵngôre nö in Sôl. Chuh patī re ngaich Sôl; ngaich pöri Tāvit tö yik tarik ò inrē nö chuh ik kinluhu.