Read Car_Nicobarese 1 SAMUĔL 25 Bible Online

1 SAMUĔL 25 - Car_Nicobarese bible

1 SAMUĔL 25

¹a Kapah ngaich ang Samu-ĕl: hamūlöre ngaich yik aṅ Israĕl nö ṙòkhöre ngaich harāman yik tarik, lāpngen ò ngaich i patī ò i Rāma. Choholre ngaich Tāvit, ngaich chuh el ök tönyalnyi i Paran.

²Ngaich hĕng taka ök tarik aṅ Ma-òn, öp tö-inlīnuṙen nö i Kārmel; tökôlò nö tarik, lūöi köṅny nuk sīṅp ò, hĕng köṅny nuk pököre: ngaich anga-aṅ nö kamöpngö sanôi nuk sīṅp nö Kārmel.

³Nēpòl ök minënyö ök tarik; Apīkēl minënyi ök pīhö ò: tö-akaha elmat ök kikānö, tövāyö arëkūö inrē: töt akahaṙa pöri ök kikōnyö töchōichö la-en inrē; aṅ patī Kalĕp ök anga-aṅ.

⁴El tönyalnyi ang Tāvit nö hang tö Nēpòl nö kamöpngö sanôi sīṅp re.

⁵Söm tak yik ṙāl tarik tötīni tö Tāvit, nö ngö ṙô ang Tāvit tö yik ṙāl tarik, Chuh Kārmel yin, chuh in Nēpòl salāman i minë-eny chu:

⁶Ngö ṙô pöichö min tö ò, öp tökôlò, Lanāmö yēḵ in meh, lanāmö inrē i patī meh, lanāmö inrē i nup inlānen meh inrē nö ṙòkhöre.

⁷Hang chin ngaich töngamuh tö meh aṅhaṅv in tö yip kammöpngö sanôi sīṅp: höng holtöṙah ih yip yōm pököre meh, ngaich īhö öt chökhuṙen tö cha, öt rēhĕn nö hĕng hang nòng nup in cha töchatngen i rô-òten cha nö i Kārmel.

⁸Hatön yip ṙāl tarik re man, vë-eny nang meh yip min: lökten hökngen më ṙāl tarik nö aheukhuvö nö i kūö meh; tön yih in ngaich i tölöök sakāmö: vë-ekūö meh chin, kētö ap töng lamöö eltī re man i vē tarik, ip kūön meh inrē Tāvit.

⁹Ngaich hē yik ṙālö tarik Tāvit nö yih, vë-ekūö Nēpòl cha-a ngaich nöng asā nuk ṙô mö i më-eny Tāvit, ngaich hangihtöre.

¹⁰Sap ṙô yik tarik Tāvit ngaich ang Nēpòl nö ngö ṙô, Achiāp Tāvit? Achīö ap inrē kūön Yēsī? Pōyen yin vē tarik i në sakāmö töngamuh lumtòkngöre nö ṙā-ang i yöngṙen re.

¹¹Ngaich hòng chū-ö min kē öp nyā-aṅ kūöre, öp mak chu inrē, tö nup alaha nup töṙatnyu likeun nö nyā-aṅ kūö yip kammöp sanôi, ngaich kēten u i tarik yip töt mikahkūö chu tö ṙeūngö cha?

¹²Ngaich yik ṙāl tarik Tāvit nö havöökūöre ngaich havanngöre, ngaich yih, vë-eny nang ò ngaich nöng asā në ṙô.

¹³Ngö ṙô ngaich Tāvit tö yik tarikre, Kö hīötlöre yin tö sanët re. Kö hīöltre ngaich yik tarik tö sanët re; hīötlöre inrē Tāvit tö sanët re: ngaich lohten nö fënòng yik tarik tamömrit Tāvit; nëtòng yik tö ngöh nö i nuk chehen.

¹⁴Ngaich hĕng tak ök ṙāl tarik vamë-eny nang Apikēl ök pīhö Nēpòl nö ngö ṙô, Yĕh meuk, tīntö tarik öp taheui Tāvit nö ṙā-ang el tönyalnyi nö salām öp yöng hī; ngaich anga-aṅ nö kësen tö cha.

¹⁵Löökenṙen pöri nö in ih yip tarik, öt chanöökuvö īhö, öt rēhĕm nö hĕng hang nòng töchatngen, i rô-òten ih akahakūö tö cha, hē ih öi el kahôiyö:

¹⁶Kinlonglen ih cha-a, tö el hatööm sakāmö inrē, irô-òten ih in cha aṅ tö në sīṅp.

¹⁷Lökten man yēḵ ngaich akahalōn töp tīre; tön töchōich öp ihih lamöö ip yöng hī in yip aṅ patī ò inrē: pò ò nö kūön töt akaha, lökten nö öt hĕng tak tökô nö vë-ekūö ò.

¹⁸Kurāten ngaich Apīkēl, ngaich nëtòng kahë tö rôti, nët inrē nuk pilön vāin, taneui nòng inrē tökeuheūtö lineūchö sīṅp, taneui kinlaha töhanyôṙö piôk, hēngòng mitūmö tönyô angkūr, nëtòng nuk kēk ṙòng anychīr, ṙālö u ngaich nö i uk nuk köttö.

¹⁹Ngaich ngö ṙô anga-aṅ tö yik ṙālö tarik re, Urēhĕkūö chu yin kiröönngöre; Yĕh meuk, ngaich chin unôichrit yīö. Hö-ö pöri anga-aṅ nö ve-eny nang ök pīhöre ang Nēpòl.

²⁰Ngaich ngö inlahen angū-ö, hē ò nö i uk ök köttö, ngaich sölta nö ik kinlīvngö kaha ök rôngö, yĕh meuk, peūtöre ang Tāvit tö yik tarik ò inrē nö asahan; ngaich meuk kūö cha anga-aṅ.

²¹Ngaich ngö ṙô ang Tāvit, Kô-en chin chök alaha aṅtö nup chehen ngòh tarik el tönyalnyi, tö lökten u nö öt hĕng hang nòng töchatngen i nup chehen ò nö ṙòkhöre: ngaich anga-aṅ nö havahal tī chu tö tölöök nö invahlö tö tötlöök.

²²Ngati tī an ngam Tēv nö in yip lā-al Tāvit, mötlö nö kô-òren inrē, yē chu min ṙāḵlö töhĕng tit tak kikōnyö nyīö yip mi-in ò nö ṙòkhöre, ip hanatlö öp peuheū.

²³Ngaich hē Apīkēl nö meūkö Tāvit, kurāten anga-aṅ ngaich, yôkti ngaich nö ṙā-ang i uk ök köttö re, afukngöre ngaich nö i kūö Tāvit, ngaich sōnngöre nö el tumlat.

²⁴Afukngöre inrē nö i röön ò, nö ngö ṙô, Mā chu, i kui chu yēḵ, i kui chu yēḵ öp töchōich: vë-ekūö meh chin, höknyö ṙô ngòh tarik meh kikānö, nö vëhöt el nang meh, ngaich hangihtöre më-eṅ tö nup ṙô ngòh tarik meh kikānö.

²⁵Vë-ekūö meh chin, uh an yēḵ ngam mā chu nö kūötenre tö ngòh töt akahaṙa tarik töng öt kanôlu ṙô, anga-aṅ ngòh Nēpòl: pòn sā ngam minë-eny ò, ngatī anga-aṅ; tökulō-ov tö ngö an ngam minë-eny ò, ngaich in ò ap kumlō-ov: öt meuk yik ṙālö tarik ngam mā chu pöri ngòh taik meh kikānö, yik tö tīntutö meh.

²⁶Mā Lökten mā chu, sā ngam Mā Tēv nö tö-aṅ, sā ngam nômö meh inrē nö aṅ, yĕh tön ngaich an ngam Mā Tēv nö ṙāpö meh i mahām ṙāpö meh inrē i invahalvah re öm hakô tö tī re, yĕh lökten hökngen yip lā-al meh, cha-a inrē yip lamūḵkö tī re tö tötlöök nö im mā chu, nöng sā Nēpòl.

²⁷Yĕh ngaich nun në kum ngòh tarik meh raneushö ngam mā chu, hökngen u nö kētu nö i yip ṙāl tarik tamömkörit ngam mā chu.

²⁸Vë-ekūö meh chin, aṙēlö tökööl ngòh tarik re man kikānö: tön kô-en An min ngam Mā Tēv nö vīlö tököp patī ngam mā chu, pò ngam mā chu nö kiyung kinyūngö ngam Mā Tēv; öt kôti min nup tötlöök nö in meh i ṙô-òten nup sakāmö meh.

²⁹Pòrô tarik nö choholre nö lū-u meh, chöh ngam nômö meh inrē, sön ngam nômö ngam mā chu min nö kitēlhaka nö im nômö ngam Mā Tēv ngam Tēv meh; ngaich nup nômö yip lā-al meh, anū-ö min töfinyöti tö ò höng sā ṙāma-ang el öp chinvil finnyöt.

³⁰Ngaich mīnö angū-ö yē ngam Mā Tēv nö keuheūtö tī nö im mā chu nö sā nup tölöök nup ṙô ò nö in meh, ngaich vīlen meh inrē min rācha i kui Israĕl:

³¹Ngaich angū-ö min ngih nö öt miṙivlōn nö in meh, öt rēhĕn nö kumnyahlōn nö im mā chu, tö mahām, hēk tö ngam mā chu nö havahalre: ngaich hē ngam Mā Tēv min nö löökötī nö im mā chu, köpölōn pömchö tö ngòh tarik re kikānö.

³²Ngaich ngö ṙô Tāvit tö Apīkēl, Tökôlò an yēḵ ngam Mā Tēv, ngam Tēv Israĕl, ngam tamīnten meh töngamuh höngkūö chu:

³³Tökôlò an yēḵ ngam mikah meh Tökôlò yēḵ inrē më-eṅ, öm lamak tī chu töngamuh i finëlö tarik i invahalvah re inrē öich hakôtö tīre.

³⁴Pòn kô-en takô, sā ngam Mā Tēv nö tö-aṅ, ngam Tēv Israĕl, ngam ṙamāpö chu in inchöökö meh, yē meh öre ötkurāten öm yih höngkūö chu, öt hĕng öre tö ōtre in Nēpòl nö söl hanatlö peuheū öt rēhĕn öre nö hĕng tit tak nyīö kikōnyö.

³⁵Lökten Tāvit nö kētī ò tö nuk kum ò nö in ò; ngaich ngö ṙô anga-aṅ tö ò, Ngaich man kuṙòh chuh patī re im kumchikṙen; yĕh meuk, ngaich chin hang ṙô meh, ngaich hō-en meh inrē.

³⁶Yih ngaich Apīkēl nö in Nēpòl; ngaich, yĕh meuk, ha-āṅhal anga-aṅ nö el patī re, sā nahlö rācha. Ngaich ang Nēpòl nö ṙāmölōn nö ellōn re, pò ò nö hiyōi takô; lökten anga-aṅ nö öt ṙô-òv nö in ò, tö törahëchyen hēk töpōyen, hanöng saha hanatlö peuheū.

³⁷Ngaich im peuheū, hē ök vāin nö ngaich nö meutnyi nö ṙā-ang in Nēpòl, ök pīhö ò nö vë-eny nang ò tö në, ngaich ök ellōn ò nö kapah nö in ò, vītöre ngaich anga-aṅ nöng sā ihong.

³⁸Ngaich unôichrit tösöm sumkam, ngam Mā Tēv nö fëlö Nēpòl, ngaich kapah anga-aṅ.

³⁹Ngaich hē Tāvit nö hāngö Nēpòl nö kapah, ngö ṙô ngaich anga-aṅ, Tökôlò An yēḵ ngam Mā Tēv, ngam vamë-elkui minṙēngö chu ṙā-ang eltī Nēpòl, ngaich inrē nö lakngen ngòh tarik re nö im tötlöök; ngaich An ngam Mā Tēv nö havan tö ngam tötlöök tī Nēpòl nö i kui ò. Söömngö ṙô ngaich Tāvit nö in Apīkēl, nö hòṅ kē an nö pīhöre.

⁴⁰Ngaich hē yik tarik Tāvit nö yih nö in Apīkēl i Kārmel, ngö ṙô ngaich cha-a nö vë-ekūö ò, Tīntu in tö Tāvit in meh, öi kē-ĕ meh öm pīhö ò.

⁴¹Choholre ngaich anga-aṅ sōnngöre ngaich nö kū-ö tö el tumlat, ngaich ngö ṙô, Yĕh meuk, tarik meh ön ngòh kikānö samöich röön yip tarik öp mā chu.

⁴²Kurāten ngaich ang Apikēl, choholre ngaich, ngaich i uk ök köttö, holtö yik tötaneui tak kikānö tarik ò yik tamömkörit ò; ngaich kiröönngöre anga-aṅ nö tömrit yik tahīntö Tāvit, pīhö ò ngaich anga-aṅ.

⁴³Kē-ĕ Ahīnō-am inrē Tāvit ök aṅ Yesrīl; ngaich cha-a nö nëtre taka nö pīhö ò.

⁴⁴Ngaich Sôl nö kēngö ök kikānö kūön re ang Maiköl, ök pīhö Tāvit nö in Paltī ök kikōnyö kūön Lā-is, ök aṅ Kālim: