Read Car_Nicobarese 1 SAMUĔL 27 Bible Online

1 SAMUĔL 27 - Car_Nicobarese bible

1 SAMUĔL 27

¹Ngaich ngö ṙô Tāvit nö ellōnre, hĕng öp min sakāmö chu ngaich kapah lökngen eltī Sôl: öt tö-ĕhtenvö min nö in chu töp chinūhu panam yip aṅ Filistain hòṅ chu öt kô-òngvah; ngaich ṙā-alre min Sôl tö chu, nö chöhö chu nö hēk nö i kūöngö në panam Israĕl ngaich chū-ö min öt kô-òngvah eltī ò.

²Choholre ngaich Tāvit, hāvāngngöre ngaich, anga-aṅ tö yik tötafūölòng tarik inrē yik mi-in ò, nö in Akis ök kikōnyö kūön Ma-òk, rācha aṅ Kāt.

³Ngaich Tāvit nö iyöng in Akis i Kāt, anga-aṅ tö yik tarik ò inrē, nö kö i mupīhöre, inrē Tāvit tö nak pīhöre, Ahinôam ök aṅ Yesrīl Apikēl inrē ök aṅ Kārmel pīhö Nēpòl.

⁴Vënyu ngaich angū-ö nö in Sôl tö Tāvit nö falngöre nö i Kāt; ngaich öt hēk anga-aṅ nö chöhan.

⁵Ngaich ngö ṙô Tāvit tö Akis, Yē chu aheukhuvö i kūö meh, hökngen cha yēḵ nö kētö chūök chu hĕng i në elpanam ngam panam, hòṅ chu iyöng umuh: kūöyòh ṙöng ang ngòh tarik meh nö uroh nö iyöng elpanam rācha nö in meh?

⁶Kētu ngaich Siklek nö in ò tö Akis ik sakāmö angū-ö: lökten an Siklek nö haköpö tö yik rācha aṅ Yūtā söl ing töngamuh.

⁷Hĕng samyeūheu fën chummngëṅtö nuk sakāmö Tāvit nö iyöng panam yik Filistain.

⁸Kiröönngöre ngaich Tāvit tö yik tarik ò inrē, ngaich yôp yik aṅ Kēsör, aṅ Kīrsi, aṅ Amalek inrē: pòn achā-a aṅ ngam panam, i tö misī, yĕh meh kiröönngöre kū-ötö Sūr, öm chuh panam Aikup inrē.

⁹Ngaich Tāvit nö fëlngö yik aṅ ngam panam, öt rēhĕn nö hayöölen kikōnyö nö aṅ öt rēhĕn kikānö, kēngö nup sīṅp inrē tö nuk kōiny nuā, köttö, ūṅt; hilā inrē: havan ngaich anga-aṅ, ngaich yih nö in Akis.

¹⁰Ngaich ngö ṙô ang Akis, Isuh öi taheui yôp? Ngaich ngö ṙô Tāvit, La-al yip lā lòhngö inrē tö Yerahmīl, lā-al yip aṅ lā lòhngö inrē tö yip Kënāit.

¹¹Öt hayöölen kikōnyö ang Tāvit nö aṅ öt rēhĕn kikānö, ngö ṙô, nö kēten cha nö i Kāt, Hòṅ cha nö öt eūken hī, nö ngö ṙô, Ngö inlahen tī öp Tāvit, ngaich ngatī inlahen inrē irô-òten ò nö iyöng panam yip Filistain.

¹²Ṙātö ellōn re ang Akis nö in Tāvit, nö ngö ṙô, Vīten re an nö hòṅ sa-òkhu tö yip tarik re Israĕl; lökten an min nö urāngen nö tarik chu.