Read Car_Nicobarese 1 SAMUĔL 28 Bible Online

1 SAMUĔL 28 - Car_Nicobarese bible

1 SAMUĔL 28

¹Ngaich i nuk sakāmö anū-ö, yik Filistain nö hamūl yik kumyung in cha nö i kinyūngö nö lā-al yik Israĕl nö kiyung. Ngaich ngö ṙô Akis tö Tāvit, Kô-en öm akahalōn tö re öm in chu kiröönngöre in yip kumyung, më-eṅ tö yip tarik meh inrē.

²Ngaich Tāvit nö ngö ṙô tö Akis, Lökten man min akahalōn tö tī ngòh tarik meh min. Ngaich ngö ṙô Akis tö Tāvit, Lökten chin min vīlen meh örheūheu yōm ngih kui chu.

³Hē e ngaich Samuĕl nö kapah, ṙòkhöre ngaich yik aṅ Israĕl nö harāman, lāpngen ò inrē nö i Rāma, nö ik elpanam ò. Ngaich Sôl nö fëlngö yik mameuk ma-alāha, tö yiktömilūönö inrē, nö ṙāngö ngam panam.

⁴Hamūlöre ngaich yik Filistain, ngaich yih nö vītö chūök re nö i Sunem; hamūl yik aṅ Israĕl inrē Sôl, vītö chūök re cha-a inrē nö i Kilpūa.

⁵Ngaich hē Sôl nö meuk yik kumyung aṅ Filistain, pa-ekūö ngaich anga-aṅ, ngaich ök ellōn ò nö kiröngö kinchëyö re.

⁶Ngaich hē Sôl nö hatöntöre nö i ngam Mā Tēv, öt sap ṙô ò ngam Mā Tēv, öt rēhĕn nö lökten i heūvö, öt rēhĕn nö lökten Urim, öt rēhĕn nö lökten i pròfĕt.

⁷Ngaich ngö ṙô Sôl tö yik tarik re; Chöhtö kikānö yin hĕng tak in chu öp mameuk ma-alaha, hòṅ chu chuh in ò, ngaich hatöntöre in ò. Ngaich ngö ṙô yik tarik ò tö ò, Yĕh meuk hĕng tak öp kikānö i Entōr mameuk ma-alaha.

⁸Harīkngöre inlahen ngaich Sôl, hayutlö tahëng inyut re inrē, kiröönngöre ngaich anga-aṅ tö nak tönët tak tarik hol ò, yihtöre cha-a ngaich tö hatööm nö ik kikānö: ngaich ngö ṙô anga-aṅ, Vë-ekūö meh chin, milūöntö öp ma-alaha man in chu öp töng vënyu minë-eny min tö chu nö in meh.

⁹Ngaich ngö ṙô ök kikānö tö ò, Yĕh meuk akahalōn man tö tī Sôl nö rökngen yik mameuk ma-alaha, yik tömilūönö inrē, nö ṙā-ang ing panam. Kūöyòh ömeh ṙātö tinngöp ngih nômö chu öm hōten chu kapah?

¹⁰Chūöku ṙô ngaich Sôl tö ò nö im Mā Tēv, nö ngö ṙô, Sā ngam Mā Tēv nö tö-aṅ, öthō man min sāchavö tökūö ngih.

¹¹Ngaich ngö ṙô ök kikānö, Achīö ap min kahëlö chu in meh? Ngaich ngö ṙô anga-aṅ, Kēlen Samuĕl man in chu.

¹²Ngaich hē ngam kikānö nö meūkö Samuĕl, ayôṙa ngaich anga-aṅ nö pōitô; ngaich vë-ekūö Sôl ök kikānö, nö ngö ṙô, Kūöyòh öm hachīlö chu? Yē meh öm më-eṅ Sôl.

¹³Ngaich ngö ṙô ök rācha tö ò, Un pa-ekūö: suh ṙöng ap maheuṅk meh? Ngaich ngö ṙô ök kikānö tö Sôl, Meuk tēv chin nö meutlö nö ṙā-ang el tumlat.

¹⁴Ngaich ngö ṙô anga-aṅ tö ò, Sā yòh inlahen apa? Ngaich ngö ṙô anga-aṅ, Hĕng tak öp tököiny tarik mameutlö kahūmö ök inrē tö tökiröng inyut. Akahalōn ngaich Sôl tö ò nö Samuĕl, sōntökūöre ngaich anga-aṅ nö el tumlat, ngaich salāman.

¹⁵Ngaich ngö ṙô Samuĕl tö Sôl, Kūöyòh ömeh piyôken chu, öm hachohken chu? Ngaich Sôl nö ngö ṙô nö sap ṙô, Kiröngö kanihngen chin; pò yip Filistain nö kiyung nö lā-al chu, ngaich ṙāngen chu ngam Tēv, öt ngöhören nö sap ṙô chu, öt rēhĕn nö lökten i pròfĕt, öt rēhĕn nö lökten i heūvö: lökten chin havëken meh, hòṅ meh mikahtölōn chu töp inlahen chu min.

¹⁶Ngaich ngö ṙô Samuĕl, Kūöyòh öm vë-ekūö chu, yē ngam Tēv nö ṙāngen meh, ngaich vītöre nö lā-al meh?

¹⁷Keuheūten an ngam Mā Tēv nö in re, sā ṙô ò nö in chu: ngaich an ngam Mā Tēv nö tikachngö ngam pūlngö nö ṙā-ang eltī meh, ngaich kēten e nö ip hol meh, in Tāvit.

¹⁸Pò meh öt hang ṙô ngam Mā Tēv, öt hateungngö ngam tanānyö lanīnö ò inrē in yip aṅ Amelek, lökten an ngam Mā Tēv töngamuh nö ngatī tī nö in meh.

¹⁹Hēk inrē ngam Mā Tēv min nö kēten Israĕl nö eltī yip Filistain nö holten meh: ngaich huṙöich më-eṅ min tö yip kikōnyö kūön meh inrē öi holtöṙah chu: kēten yip kumyung An min inrē ngam Mā Tēv aṅ Israĕl nö eltī yip aṅ Filistain.

²⁰Ilööṙen ngaich Sôl nö fukngö nö teuthaka nö el tumat, nö kirööngen pinhë-eṅkūö, tökūö minë ṙô Samuĕl: öt kunlē-ĕv anga-aṅ ngaich nö in re; pòn hĕng sumkam nö öt nyā-aṅvkūö, öt rēhĕn tö hatööm.

²¹Yihtöre ngaich ök kikānö nö in Sôl, ngaich meūkan nö pōyen kanihngen, ngö ṙô ngaich tö ò, Yĕh meuk, ngaich ön ngòh tarik meh kikānö nö hang ṙô meh, ngaich inrē öich kētö ngih nômöre nö eltī re, ngaich hang minë ṙô meh minë ṙô meh tö chu.

²²Lökten yĕh, vë-ekūö meh chin, hang ṙô ngòh tarik re man kikānö më-eṅ inrē, hökngen chu ṙātö töhĕng hanam nyā-aṅkūö i kūö meh; nyā më-eṅ ngaich, hòṅ meh öm kalēḵ alaha, yē meh min kiröönngöre, el talöököre.

²³Sōḵ pöri anga-aṅ, nö ngö ṙô, Sōḵ chin nyā. Ngaich pöri nak tarik ò, nö holre tök kikānö, nö līpan; hang ṙô cha ngaich anga-aṅ. Choholre ngaich anga-aṅ nö ṙā-ang el tumlat, ngaich ūichlöre nö el chamanre.

²⁴Hĕng nòng ök tö-alahav kun nuā; ka-eūyen ngaich anga-aṅ, ṙatnyö likeun ò ngaich; kē atra anga-aṅ inrē, kirāchö e ngaich, ngaich vī tötaföhlöng rôti nö in e;

²⁵Kētö e anga-aṅ ngaich nö i kūö Sôl, i kūö nak tarik ò inrē; nyā cha-a ngaich. Möl cha-a ngaich nö choholre, ngaich kiröönngöre ik hatööm angū-ö.