Read Car_Nicobarese 1 SAMUĔL 3 Bible Online

1 SAMUĔL 3 - Car_Nicobarese bible

1 SAMUĔL 3

¹Ngaich ngam nyīö Samu-ĕl nö ikūö Ēli nö meukṙen ngam Mā Tēv. I nuk sakāmö anū-ö ök ṙô ngam Mā Tēv nö öt ṙöpen; tö töngālnyivö inmeukhömat.

²Ngaich ik hē e, hē Ēli nö ṙōlhaka nö el chūökre, (Paṙeūma nup mat ò, lökten ò nö ötkô nö meuk:)

³Öl ök ëāṅvö ngam Tēv nö nyangngö, ṙōlngöre ngaich Samu-ĕl nö haṙòh, nö el patī ngam Mā Tēv, i chūök ök kasòng chöngö ngam Tēv;

⁴Havëken Samu-ĕl ngaich ngam Mā Tēv: Ihih chīni, ngö ṙô anga-aṅ.

⁵Fal-töre ngaich Samu-ĕl nö in Ēli, ngaich ngö ṙô, Ihih chin; pò meh taheui havëken chu, Ngaich ngö ṙô anga-aṅ, Hö-ö chin havëḵa; ṙōlngöre man hēk. Kiröönngöre ngaich anga-aṅ, ngaich hulalngöre.

⁶Samu-ĕl, ngöṙô hēk ngam Mā Tēv nö havëḵa. Choholre ngaich Samu-ĕl ngaich chuh in Ēli, Ihih chīni, ngö anga-aṅ; pò meh taheui havëken chu. Kakūönö, rö-ö chin havëḵa, ngö ṙô anga-aṅ nö sap ṙô; ṙōlngöre man hēk.

⁷Hē e Samu-ĕl nö öl nö akahakūö tö ngam Mā Tēv, öl nö rēhĕn ngam ṙô ngam Mā Tēv nö hameuktu nö in ò.

⁸Hēk ngam Mā Tēv nö havëken Samu-ĕl im linūöi heuh, Choholre ngaich anga-aṅ nö chuh in Ēli, ngaich ngö ṙô, Ihih chīni; pò meh taheui havëken chu. Ngaich akahalōn Ēli tö ngam Mā Tēv nö havëkö ngam nyīö.

⁹Lökten Ēli nö ngö ṙô tö Samu-ĕl, Kuṙòh, ṙōlngöre man: ngaich mīnö yē ò nö havëken meh, ngaich ngö ṙô pömchö, Mā Tēv, ṙô-òv man yēḵ; tön hangihtöre ön ngòh tarik meh, Kiröönngöre ngaich Samu-ĕl ngaich hulalngöre nö el ök chūök re.

¹⁰Yih ngaich ngam Mā Tēv, söktöhëchṙen ngaich, ngaich sāre i nuk tahëng hē nö havëḵa, Samu-ĕl, Samu-ĕl nö ngö. Ngaich ngö ṙô ang Samu-ĕl, Ṙô-òv man yēḵ; tön hangihtörën ngòh tarik meh.

¹¹Ngaich ngö ṙô ngam Mā Tēv tö Samu-ĕl, Yĕh meuk, la-evṙen chin min in Israĕl, töp tö-āṅngöre lā kanātnyi tī tö elnang yip hamang min.

¹²Ip sakāmö chin angū-ö min lā-al Ēli tö nuk ṙô chu ip patī ò, löktökūö ip ranehelrit söl ip manāngen.

¹³Pò chu ngāichö ṙô in ò tö chu min örhēuheu akah fālen öp patī ò, tökūö öp mikahlōn ò tökööl, Pò nap kūön ò kikōnyö nö kētö kuire tö rinūtngövah, ngaich rö-ö anga-aṅ nö tumālö cha.

¹⁴Löḵten chin ngaich chūökuṙô i patī Ēli tö öp tökööl i patī Ēli min nö öt tö inlööklu tökētu, nöng örheūheu.

¹⁵Hulalngöre ngaich Samu-ĕl hanöng saha ap peuheū, löpnyökūö nuk inkūp ngam patī ngam Mā Tēv ngaich. Ngaich pa-ekūö ang Samu-ĕl nö hameuktö ök maheuṅkre nö in Ēli.

¹⁶Havëken Samu-ĕl ngaich Ēli, nö ngö ṙô, Kakūönö, Samu-ĕl, ngaich ngöṙô anga-aṅ, Ihih chīni.

¹⁷Ngaich ngö ṙô anga-aṅ, Asuh ök ṙô ngam Mā Tēv nö in meh? Ve-ekūö meh chin un hayūni angū-ö nö in chu: ngati tī An ngam Tēv nö in meh, hēk mötlö inrē yē meh hayunnguvö in chu tö nup taṙòkhöre ṙô ò nö in meh.

¹⁸Keuheūtnyöre ṙô ngaich Samuĕl nö vë-enynang ò, öt hēngö hanyatngö nö in ò. Ngaich ngö ṙô anga-aṅ, Anga-aṅ An Mā Tev: hökngö tī ò tö nup tölöök nö lōn ò.

¹⁹Pōyö ngaich ang Samu-ĕl, in ò inrē ngam Mā Tēv, ngaich öt hĕng nup ṙô ò töhökiṙen nö suktöre nö el tumlat.

²⁰Löktökūö Tën söl Pīrsīpa yik Israĕl nö ṙòkhöre nö akahalōn tö Samu-ĕl nö hameuktu nö ngaich nö pròfĕt ngam Mā Tēv.

²¹Meūkö hēk ngam Mā Tēv nö i Sailō: pò ngam Mā Tēv nö hameuktöre nö in Samu-ĕl nö i Sailō nö lökten i ṙô ngam Mā Tēv.