Read Car_Nicobarese 1 SAMUĔL 30 Bible Online

1 SAMUĔL 30 - Car_Nicobarese bible

1 SAMUĔL 30

¹Ngaich, hē Tāvit tö yik tarik ò inrē nö yih nö i Siklek, im linūöi sumkam yik aṅ Amelek nö kilöön yik aṅ lā lòhngö, i Siklek inrē, ngaich kiyūngö Siklek, föngtökūö e inrē tö tameūyö;

²Kē-ĕ yik kikānö nö kaitī nö ṙòkhöre yik me-ël e, hĕnghöre tökūöṅnö tökiröng inrē: öt hĕng tak tökumpaha tö cha, höng kē-ĕyö pöri cha-a, ngaich kiröönngöre cha-a.

³Ngaich hē Tāvit tö yik tarik ò inrē nö yih nö im elpanam, yĕh meuk, ṙāpngö angū-ö tökūö tameūyö; ngaich yik pīhö cha, kūön cha kikōnyö, kūön cha kikānö inrē, nö kē-ĕ nö kaitī.

⁴Ngaich Tāvit tö yik tarik ò inrē nö harāmöre nö pōitô peuiny inrē hanöng saha cha nö öt ōtre kumlēḵ tökūö ṙô re nö peuny.

⁵Kē-ĕ inrē nö kaitī nak pīhö Tāvit, Ahīnôam aṅ Yesrīl, Apikēl inrē ök pīhö Nēpòl aṅ Kārmel.

⁶Pōiyen kanihngen ngaich ang Tāvit, pò yik tarik nö vë-ekūöre nö hòṅ kulehan tö ihong, kūö yik tarik nö ṙòkhöre nö haṙīvö ellōn, kö haṙivlōn tö kūönre kikōnyö tö kūönre kikānö inrē: hangë-eṅl alahare pöri Tāvit nö im Mā Tēv ngam Tēv ò.

⁷Ngaich ngö ṙô Tāvit tö Apīātör, ök kūönṙô ök kikōnyö kūön Ahīmalek, Vë-ekūö meh chin, kētö ap sörplis in chu ihih. Ngaich ang Apiātör nö kētö ök sörplis nö in Tāvit nö umuh.

⁸Ngaich hatöntöre ang Tāvit nö im Mā Tēv, nö ngö ṙô, Yē chu lūḵ vē kumyung kôḵlö öich min in cha? Sap ṙô ò ngaich anga-aṅ, Lūḵu cha: öthō man öt kô-òl in cha, öthō inrē öm öt havānö cha nö ṙòkhöre.

⁹Lökten ang Tāvit nö kiröönngöre, anga-aṅ tö yik tarik inrē tö tafūölòng yik mī-in ò, sölta ngaich nö ip töhëm mak Pēsōr, i chūök cha yik töṙā-ai nöng ngöh.

¹⁰Lūḵu cha pöri Tāvit, anga-aṅ tö yik tarik töfënòng: pòn nëtòng yik töng ngöh yik tö takngö tö lökten cha nö ötkô nö havāngngö ök kun töhëm mak Pēsōr:

¹¹Kôtökūö cha-a ngaich nö el ngāṅṙö tök töhĕng tak aṅ Aikup, ha-āṅlen ò cha-a, nyā ngaich anga-aṅ; kētö òk ò cha-a inrē tö mak;

¹²Kē-ĕkūö ò cha-a inrē tö töhĕng mikālö kēk ròng anychīr, nët tum inrē nup tönyô angkūr; ngaich hē ò nö keuheūtökūö nö nyā, yih ngaich ök ma-alaha ò nö hēk nö in ò: pò ò nö lūöi hang sumkam lūöi hang mitööm inrē nö öt nyā, öt rēhĕn nö òk mak.

¹³Ngaich ngö ṙô Tāvit tö ò, Tarik chīö ömeh? Ṙeū-eung yih öm inrē? Ngaich ngö ṙô anga-aṅ, Ṙāl tarik chin aṅ Aikup, tarik öp töhĕng tak aṅ Amelek; ṙā-ai chū-ö tök yöngṙen re, pò chu vahavö lūöi sumkam ngaich.

¹⁴Kilöön yip aṅ lòhngö in i Yerit in nup panam Yūtā inrē, i lā lòhngö inrē tö Kalĕp; haṙāpngen Siklek īhö inrē nö i kūö tameūyö.

¹⁵Ngaich ngö ṙô Tāvit tö ò, Hō ömeh kēten chu in yip kumyung? Ngaich ngö ṙô anga-aṅ, Chūöku ṙô man im Tēv in chu, tö re min öt fëlngen chu, öt rēhĕn kēten chu eltī öp yöngṙen chu, ngaich kēten meh chū-ö min in yip kumyung.

¹⁶Ngaich hē ò nö kēten ò, yĕh meuk, keuheūtngöre chūök cha-a nö parāta, nyā-aṅvkūö òk inrē hakô-òngkūöre inrē nö nyā, kūö nup töpōyen pôḵ cha kahë cha aṅ i panam Filistain, aṅ i panam Yūtā inrē.

¹⁷Fëlö cha ngaich Tāvit löktökūö ngam piṙūöi söl harap ngam tahëng sakāmö: ngaich öt hĕng hang tak töt kô-òngvah tarik aṅ in cha, höng yik töfënòng ṙāl tarik, yik mi-i-uk ūṅt nö falngöre.

¹⁸Ṙòkhöre havan ngaich Tāvit tö nuk kahë yik aṅ Amelek: kôti tī inrē Tāvit tö nak pīhöre.

¹⁹Öt hĕng tak anātökūö in cha, ötrēhĕn tökūöṅnö öt rēhĕn tökiröng, ötrēhĕn nyīö kikōnyö öt rēhĕn nyīö kikānö, öt rēhĕn nup pôḵ öt rēhĕn nuk kahë cha: ṙòkhöre nö havānö tö Tāvit.

²⁰Kē-ĕ ngaich tö Tāvit nö ṙòkhöre nuk nuā pököre inrē, nuk tö-ahōṙö tö cha nö urēhĕkūö u nuk tahëng nuā, pôḵ Tāvit nun anū-ö ngö ṙô cha-a.

²¹Yih ngaich Tāvit nö in yik tarik tönëtòng, yik tö takngö tö lökten cha nö ötkô nö tömrit Tāvit, yik töhōtu tö cha inrē nö höngngöh nö ik töhëm mak Pēsōr: kiröönngöre cha-a inrē nö höngkūö Tāvit, nö höngkūö yik hol ò inrē tarik: ngaich hē Tāvit nö röhta nö in yik tarik, salāmö cha ngaich anga-aṅ.

²²Ngaich ṙòkhöre ṙô yik tötlöök tarik yik sāṙen inrē tarik, aṅ in yik kumröönngöre nö hol Tāvit, nö ngö ṙô, Pò chān öt kiröönngöre nö in hī, hö-ö in hòṅ kē-ĕkūö cha tö aṅ i nup pôḵ hī nup töhavānö tö hī, höng öp pīhö öp tarik tö yip kūön ò inrē, hòṅ chān hachōḵūö cha, ngaich kiröönngöre.

²³Ngaich ngö ṙô Tāvit, Hol chu, uh yin ngatī, i në kahëtö ngam Mā Tēv nö in hī, ngam lamaklen hī, kamëtö yik kumyung inrē nö eltī hī yik lā-al hī.

²⁴Achīö ap min töhō nö hang ṙô yīö in ngih inlahen? Pòn sā minchöḵö ngam tökô-òngröön nö kiyung ngatī minchöḵö min ngam töngöh nö i nup chehen: hĕngren minchöḵö cha-a min.

²⁵Ngaich ngatī angū-ö hēten tök sakāmö angū-ö söl môkö, anga-aṅ nö vīten e nö chöngö in Israĕl,

²⁶Ngaich hē Tāvit nö yih nö i Sikelek, söömngö nuk pôḵre anga-aṅ nö in yik mā i Yūtā, yik hol ò, nö ngö ṙô, Yĕh meuk në raneushö yīö aṅ i nuk pôḵ yik aṅ in yik tökunyaha elmat tö ngam Mā Tēv;

²⁷Löö in cha yik aṅ Pētĕl, löö in cha inrē yik aṅ Ramôt aṅ lā Nīkep, löö in cha inrē yik aṅ Yattir;

²⁸Löö in cha inrē yik aṅ Arō-er, löö in cha inrē yik aṅ Sifmôt, löö in cha inrē yik aṅ Estamuā

²⁹Löö in cha inrē yik aṅ Rakāl, löö in cha inrē yik aṅ nuk elpanam i Yērahmīl, löö in cha inrē yip elpanam i Kēn;

³⁰Löö in cha inrē yip aṅ Hôrma, löö in cha inrē yip aṅ Pòrashan, löö in cha inrē yip aṅ Atāk;

³¹Löö in cha inrē yip aṅ Hepròn, i nup chūökö inrē chūök elyöngö Tāvit ṙung tö yik tarik ò inrē.