Read Car_Nicobarese 1 SAMUĔL 5 Bible Online

1 SAMUĔL 5 - Car_Nicobarese bible

1 SAMUĔL 5

¹Kēḵ ngam kasòng ngam Tēv ngaich yik Filistain, kētö e ngaich nö i Astòt nö ṙā-ang Epenisör.

²Kēḵ ngam kasòng ngam Tēv yik Filitain, ngaich kētö e nö el patī Tēkòn, ngaich ṙātö e nö ranghen Tēkòn.

³Ngaich hē yik aṅ Astòt nö ka-euilökūö nö choholre im huṙöich, yĕh meuk, fāthakkūö nö el tumlat ang Tēkòn nö fukngö nö i kūö ngam kasòng ngam Mā Tēv. Kē-ĕ Tēkòn cha-a ngaich ngaich ha-ūichlen ò nö hēk nö ik chūök ò.

⁴Ngaich hē cha im huṙöich tö peuheū nö ka-euilökūö nö choholre, yĕh meuk, fāthakkūö ang Tēkòn nö fukngö nö el tumlat nö i kūö ök kasòng ngam Mā Tēv: ngaich ök kui Tēkòn tö nuk kintāl eltī ò inrē nö ohngö nö el patī; höng ök kaha Tēkòn tö-ōtren nö in ò.

⁵Lökten söl ing töngamuh öt rēhĕn yip kūönṙô Tēkòn, öt rēhĕn yip töng yamih nö el patī Tēkòn nö kô nö röön kö el chūök Tēkòn i Astòt.

⁶Langan pöri ngam kël ngam Mā Tēv nö i kui cha yip aṅ Astòt, halëlngen cha anga-aṅ, ngaich aṅtī tö anahaṅ alaha nö hachökö cha, yip aṅ Astòt tö yip aṅ kūöngö e inrē.

⁷Ngaich hē yik tarik aṅ Astòt nö meūkö e nö ngatī, ngö ṙô cha-a ngaich, Ötkô an ngam kasòng ngam Tēv Israĕl nöng ngöh nö in hī: pò öp kël ò nö chökhutī tö hī, tö ngam tēv inrē Tēkòn.

⁸Lökten cha nö hamūltö yik mā aṅ Filistain nö in cha, ngaich ngö ṙô Sitih inlahen tī öi min tö ngih kasòng ngam Tēv Israĕl? ngaich ngö ṙô cha-a nö sap ṙô, Hökngen ngam kasòng ngam Tēv Israel nö keuntu nö i Kāt. Keuntö ngam kasòng ngam Tēv Israĕl cha-a ngaich nö in e.

⁹Ngaich hē cha nö keuheūten nö havötkö kūö e ngaich ngam kël ngam Mā Tēv nö lā-al ngam elpanam nö pōihang vah tī tö e nö ötkô: chökhutī anga-aṅ tö yik tarik aṅ ngam elpanam, hĕnghöre tökūöṅnö tökiröng inrē, aṅha alaha cha-a ngaich.

¹⁰Lökten cha nö söömngö ngam kasòng ngam Tēv nö i Ēkròn. Ngaich hē ngam kasòng ngam Tēv nö yih nö i Ēkròn, hūḵa ngaich yik aṅ Ēkròn, nö ngö ṙô, Kētö ngam kasòng ngam Tēv Israĕl yin nö ngaich nö in hī nö famëlngen hī tö vē tarik hī inrē.

¹¹Lökten cha nö tīnngö mahamūltö yik mā aṅ Filistain, ngaich ngö ṙô cha-a, Söömngö ngam kasòng ngam Tēv Israĕl, hökngen e nö hēk nö havan nö ip chūökre, hòṅ e nö öt fëlngen hī tö vē tarik hī inrē; pò nup elpanam nö ṙòkhöre nö keuheūtngöre chūök nö ötkô tö ngam kinpaha; langan ngam kël ngam Mā Tēv nö umuh.

¹²Ngaich yik tarik tötkapah nö lökö tö ngam anahaṅ alaha: söllö ngaich nö el halīöngö ök ṙô ngam elpanam nö peuiny.