Read Car_Nicobarese 1 SAMUĔL 6 Bible Online

1 SAMUĔL 6 - Car_Nicobarese bible

1 SAMUĔL 6

¹Sat chumngëṅtö ngam kasòng ngam Mā Tēv nö i panam yik Filistain.

²Ngaich yik Filistain nö havëtö yik kūönṙô tö yik chamòng alaha, ngaich ngö ṙô, Sitih inlahen tī öi min tö ngam kasòng ngam Mā Tēv? Hameukhömat ih töp hol e min nö söömtu nö ip chūökre.

³Ngaich ngö ṙô cha-a, Yē yīö tīnngö ngam kasòng ngam Tēv Israĕl, uh an nöng chanlööp nö tīni; havanten e pöri nö holtö tökētu kūö tökööl, ngaich yī-ö min lööken, ngaich yī-ö min akahalōn tö lökten ngam kël ò nö öt ke-ĕyö nö ṙā-ang in yīö.

⁴Ngaich ngö ṙô cha-a, Asuh ap min kūö tökööl tökētu nö hol e nö havantu nö in ò? Ngaich ngö ṙô cha-a, Taneui nup humlum insā tö aṅ alaha, taneui humlum kumit, sā tumtak yip mā i Filistain: pòn hĕng tölëngökūö invah in cha nö ṙòkhöre, in yip mā yīö inrē.

⁵Lökten yin vī insā nup anaha alaha yīö, insā nup kumit yīö inrē nup mahachök ngam panam; ngaich yī-ö inrē ha-öiny ngam Tēv Israĕl: amahtuṙen an min nö ṙā-angtīre nö in yīö, ṙā-ang i nup tēv yīö, ṙā-ang im panam yīö inrē.

⁶Kūöyòh ṙöng öi hangëṅngö ellōnre, sā yip aṅ Aikup, Fërō inrē nö hangëṅngö ellōnre? Hē ò nö tītö pinngangkūö nö in cha, ngaich röh hòng cha-a nö hökngen yik tarik nö kiröönngöre, ngaich kiröönngöre cha-a?

⁷Lökten yin kēḵ halēn tufömngöre inrē inröl, nët nòng töcheūchö kan nuā, nup tö-öl nö hakeunlöng tö kaneun inröl, kapòk tö nup kan nuā inrē im inröl, kētö nup kūön u i patī nö ṙā-ang in u:

⁸Ngaich kēḵ ngam kasòng ngam Mā Tēv, chaplö e el ngam inröl; ngaich chaplö nup yanöṅtö humlum, nup havantö yīö in ò tökētu kūö tökööl, nö el kasòng nö i kaha e; tīnngen e ngaich, hòṅ e nö kiröönngöre.

⁹Ngëichkö e yĕn kiröönngöre nö el talöökö nöng kanahngenre ip kūöngö panam i Petsimes, ngaich anga-aṅ tö tī-iv nö in hī tö ngih yöng tötlöök: ngaich yĕn öt angū-ö pöri, ngaich ayī-ö akahalōn min tö e nö öt ngam kël ò famëlö hī; ngaich höng lanôtökūö angū-ö nö famuk in hī.

¹⁰Ngaich ngatī yik tarik; ngaich nët nòng kahë tö töcheūchö kan nuā, kapòktö u ngaich nö ik inröl, öpngökūö nuk kūön u ngaich nö i patī:

¹¹Chaplö ngam Mā cha-a nö el inröl, tök kasòng inrē chūök nuk humlum kumit tö nuk insātö-aṅ alaha.

¹²Hachip ta-löököre ngaich nuk kan nuā nö kū-ötö Petsimes lök ël ök tökiröng talöökö anū-ö, öt kānköre nö lahāmö hēk lātāvē: tömkörit u yik mā aṅ Filistain nö tölngö ik kūöngö panam i Petsimes.

¹³Ngaich yik aṅ Petsimes nö ṙònghöchṙen nö uvòhlö vīt nö el achāṙö: chingòhlö kūö re cha-a, ngaich meuk ök kasòng, ngaich ṙāmölōn nö meūkö e.

¹⁴Yihtöre ök inröl nö el panô-òṅ Yôsuā ök aṅ Petsimes, sökhak ngaich nö umuh i chūök ök tökiröng ihong: ngaich cha-a nö fung nuk chōn ök inröl, ngaich kētö nuk kan nuā nö töföngö tökētu nö im Mā Tēv.

¹⁵Ngaich yik Lēvi nö ṙātö ngam kasòng ngam Mā Tēv, tök kasòng hol e inrē, tö-aṅhaṅv tö nuk yanöṅtö humlum, ngaich ṙātö u nö i kui ök tökiröng ihong: ngaich yik aṅ Petsimes tarik nö kētö töföngö tökētu ane inrē im sakāmö angū-ö nö kētö tökētu nö im Mā Tēv.

¹⁶Ngaich hē yik mā tö taneui tak aṅ Filistian nö meūkö e, havantöre cha-a ngaich nö i Ēkròn ik sakāmö angū-ö.

¹⁷Në nun humlum tö-aṅhaṅ alaha në havantö yik aṅ Filistain nö im Mā Tēv tökētu kūö tökööl; hĕng nòng tī Astòt, hĕng nòng tī Kāsa, hĕng nòng tī Askēlòn, hĕng nòng tī Kāt, hĕng nòng tī Ēkròn;

¹⁸Në humlum kumit inrē, sā tūmö nuk elpanam yik mā tö taneui tak aṅ Filistain, hĕnghöre tö kinlōngu elpanam tuhēt inrē i tavat: sölngö ip tökiröng ihong öp chūök tī cha nö ṙātö ngam kasòng ngam Mā Tēv, ōtre ap ihong töngamuh el panô-òṅ Yôsuā ök aṅ Petsimes.

¹⁹Ngaich anga-aṅ nö fëlngö yik tarik aṅ Petsimes, pò cha nö hatīönkö ngam kasòng ngam Mā Tēv, uroh anga-aṅ nö fëlngö yik tö taneui anāi köṅny sat anāi tarik: haṙivlōn ngaich yik tarik, pò ngam Mā Tēv nö fëlngö yik tarik nö pōihangvah.

²⁰Ngaich ngö ṙô yik tarik aṅ Petsimes, Achiāp tökô nö sökhaka nö i kūö ngam Mā Tēv, ngòh töhet Tēv? Löö in chīö angvöh min nö ṙā-ang in hī?

²¹Ngaich cha-a nö tīnngö ma-ahānga nö in yip aṅ Kiriatyēarim nö ngö ṙô, Kētu an nö hēk ngih kahòng ngam Mā Tēv tö yip aṅ Filistain; yih yin ta-a, kē-ĕren e nö chuh in yīö.