Read Caribbean Javanese Wiwitan 11 Bible Online

Wiwitan 11 - Caribbean Javanese bible

Wiwitan 11

¹Wong sak jagat kuwi pada tunggal basané lan tunggal tembungé.

²Bareng pada mlaku mengétan, terus weruh ara-ara jembar ing negara Sinéar, terus pada manggon ing kono.

³Terus pada ngomong: “Hayuk kita pada nyitak bata lan diobong sing mateng.” Batané kanggo watu pasangan lan sing digawé mlèster aspal.

⁴Tembungé menèh: “Hayuk pada nggawé kuta, nganggo menara sing putyuké sundul langit, supaya jenengé kita dadi kesuwur lan kita aja nganti pating slebar ing sak lumahé bumi.”

⁵GUSTI terus medun gelem weruh kuta lan menara sing ijik dibangun karo para anak-anaké manungsa mau;

⁶lan tembungé GUSTI: “Wong-wong kuwi pada tunggal bangsa lan tunggal basané; iki ijik wiwitan kekarepané, mengko pikirané bakal ora kena dipenggak apa sing dadi karepé.

⁷Mula hayuk, Kita pada medun lan mbingungké basané, supaya siji lan sijiné aja nganti ngerti basané.”

⁸Mengkono dadiné GUSTI mbubarké wong-wong mau sangka kono menyang ing sak lumahé bumi, sak nalika pada mandek enggoné pada nggawé kuta.

⁹Tilasé mau dijenengké: Babèl, awit ing kono GUSTI enggoné mbingungké basané wong-wong ing sak lumahé bumi, lan sangka kono GUSTI mbuyarké wong-wong mau menyang sak lumahé bumi.

¹⁰Iki turunané Sèm. Sèm waktu umur 100 taun, nduwé anak Arpaksad, sakbaré rong taun banjir gedé.

¹¹Sakwisé nduwé anak Arpaksad, ijik nduwèni umur 500 taun menèh, lan nduwé anak lanang lan wadon.

¹²Arpaksad waktu umur 35 taun, nduwé anak Sela.

¹³Sakwisé nduwé anak Sela, Arpaksad mau ijik nduwèni umur 403 taun menèh, lan nduwé anak lanang lan wadon.

¹⁴Sela waktu umur 30 taun, nduwé anak Ebèr.

¹⁵Sakwisé nduwé anak Ebèr, Sela ijik nduwèni umur 403 taun menèh, lan nduwé anak lanang lan wadon.

¹⁶Ebèr waktu umur 34 taun, nduwé anak Pèlèg.

¹⁷Sakwisé nduwé anak Pèlèg, Ebèr mau nduwèni umur 430 taun menèh, lan nduwé anak lanang lan wadon.

¹⁸Pèlèg waktu umur 30 taun, nduwé anak Réhu.

¹⁹Sakwisé nduwé anak Réhu, Pèlèg ijik nduwèni umur 209 taun menèh, lan nduwé anak lanang lan wadon.

²⁰Réhu waktu umur telung puluh loro taun, nduwé anak Séruk.

²¹Sakwisé anak Séruk, Réhu mau ijik nduwèni umur 207 taun menèh, lan nduwé anak lanang lan wadon.

²²Séruk waktu umur telung puluh taun, nduwé anak Nahor.

²³Sakwisé nduwé anak Nahor, Séruk mau ijik nduwèni umur 200 taun menèh, lan nduwé anak lanang lan wadon.

²⁴Nahor waktu umur 29 taun, nduwé anak Térah.

²⁵Sakwisé nduwé anak Térah, Nahor mau ijik nduwèni umur 119 taun menèh, lan nduwé anak lanang lan wadon.

²⁶Térah waktu umur pitung puluh taun, nduwé anak Abram, Nahor lan Haran.

²⁷Iki turunané Térah. Térah nduwé anak Abram, Nahor lan Haran, lan Haran nduwé anak Lot.

²⁸Haran ninggal ndonya ndisiki Térah bapaké, ing negara kelairané, ya kuwi negara Ur-Kasdim.

²⁹Abram lan Nahor pada omah-omah, bojoné Abram jenengé Sarai lan bojoné Nahor jenengé Milka, anaké Haran, bapaké Milka lan Yiska.

³⁰Sarai mau gabuk ora nduwé anak.

³¹Térah terus ngajak Abram lan Lot putuné, anaké Haran, uga Sarai bojoné Abram, budal sangka negara Ur-Kasdim karepé menyang negara Kanaan; bareng mlakuné tekan negara Haran, terus pada manggon ing kono.

³²Umuré Térah kuwi 205 taun, terus ninggal ndonya ing Haran kono.