Read Caribbean Javanese Wiwitan 12 Bible Online

Wiwitan 12 - Caribbean Javanese bible

Wiwitan 12

¹GUSTI ngetokké tembung marang Abram: “Kowé lungaa sangka negaramu, kulawargamu lan omahé bapakmu, menyang negara sing bakal Tak duduhké marang kowé.

²Kowé bakal Tak dadèkké bangsa sing gedé lan Tak berkahi, lan jenengmu Tak luhurké, lan kowé bakal dadi berkah.

³Sapa sing mberkahi kowé bakal Tak berkahi, sing nyepatani kowé bakal Tak sepatani, lan sangka kowé para bangsa ing sak lumahé bumi pada kaberkahan.”

⁴Abram terus budal nuruti apa sing diomongké karo GUSTI, lan Lot mèlu. Abram umuré pitung puluh lima taun waktu budal sangka Haran.

⁵Abram ngejak Sarai bojoné lan Lot, ponakané, uga bandané kabèh lan para abdi sangka Haran, terus budal menyang tanah Kanaan, lan kelakon teka ing tanah Kanaan.

⁶Abram terus ndlajahi tanah kono nganti tekan ing panggonan sak tyedaké Sikem, ya kuwi sak tyedaké wit terbantin ing Moré. Waktu semono sing ngenggoni tanah kono bangsa Kanaan.

⁷GUSTI terus ngétok marang Abram lan ngomong: “Turunanmu bakal Tak wènèhi tanah iki.” Abram terus nggawé mesbèh kanggo GUSTI sing wis ngétok marang dèkné.

⁸Sangka kono dèkné ngalih menyang gunungan sak wétané Bétel, lan ngedekké tarup ing antarané Bétel ing sisih kulon lan Ai ing wétané; ing kono Abram nggawé mesbèh kanggo GUSTI, lan nyeluk asmané GUSTI.

⁹Sakwisé mengkono Abram nerusaké mlakuné mundak adoh menyang tanah Negeb.

¹⁰Bareng ing tanah kono katekan pailan, Abram lunga menyang Egipte, manggon ing kono dadi wong mantya, awit pailané abot banget.

¹¹Bareng waktu wis tyedak Egipte, Abram terus ngomong marang bojoné Sarai: “Runggokké ta, aku ngerti yèn kowé wong wadon sing ayu,

¹²ing waktu wong Egipte weruh sliramu, mesti ngomong: Kowé kuwi bojoku, aku mesti terus dipatèni lan kowé dijarké urip.

¹³Ngomonga ta yèn kowé adikku, supaya aku ditampa apik awit sangka kowé, lan nyawaku urip awit kowé.”

¹⁴Kadung Abram wis mlebu ing Egipte, wong Egipte pada weruh yèn wong wadon kuwi ayu banget,

¹⁵lan bareng para penggedé-penggedéné Parao pada weruh Sarai, terus ngelem-elem ing ngarepé Parao, sak nalika Sarai digawa menyang palèsé Parao.

¹⁶Abram ditampa apik karo Parao awit sangka Sarai, lan terus dikèki wedus, sapi lan kimar lanang, batur lanang lan wadon, uga kimar wédok lan unta-unta.

¹⁷Nanging GUSTI nekaké memala sing abot banget marang Parao uga kabèh marang sak isiné palèsé awit sangka Sarai, bojoné Abram kuwi.

¹⁸Parao terus nyeluk Abram lan ngomong: “Apa sing kok tandangi marang aku? Kenèng apa kowé ora ngomongi marang aku, yèn wong wadon kuwi bojomu?

¹⁹Kenèng apa kowé ngomong: Dèkné adikku, nganti tak jikuk dadi bojoku? Wis, kuwi bojomu, jukuken lan lungaa!”

²⁰Parao terus mréntah marang abdiné supaya ngeterké Abram lunga barengan karo bojoné uga bandané kabèh.