Read Caribbean Javanese Wiwitan 13 Bible Online

Wiwitan 13 - Caribbean Javanese bible

Wiwitan 13

¹Abram terus lunga sangka Egipte menyang Negeb karo bojoné lan bandané kabèh, lan Lot ya mèlu.

²Abram kuwi sugih banget, okèh banget ingon-ingoné, slaka lan emas.

³Dèkné mlaku terus sangka panggonan siji menyang panggonan liyané, sangka Negeb nganti tekan ing sak tyedaké Bétel; ing panggonan tarupé sing ndisik, ing tengahé Bétel lan Ai,

⁴ing panggonané mesbèh sing digawé mbiyèn, lan ing kono Abram nyebut asmané GUSTI.

⁵Uga Lot sing mèlu Abram ya nduwé wedus, sapi lan tarup.

⁶Nanging negara kono kurang jembar dienggoni bebarengan, awit banda duwèké okèh banget, nganti pada ora bisa nunggal bebarengan;

⁷mulané para pangoné Abram lan Lot pada tukaran. Waktu kuwi bangsa Kanaan lan Fèris uga manggon ing kono.

⁸Abram terus ngomong marang Lot: “Aja ana tukaran ing antarané aku lan kowé uga ing antarané pangonku lan pangonmu, kita ijik pada sedulur.

⁹Negara iki kabèh kebukak ing ngarepmu! Mbok kowé pisah waé sangka aku. Yèn kowé milih ngiwa, aku tak nengen, yèn kowé milih nengen, aku tak ngiwa.”

¹⁰Lot terus nyawang lan weruh yèn negara sak uruté laut Yordan kuwi okèh banyuné. Sak durungé GUSTI ngentèkké Sodom lan Gomora, kaya petamanan GUSTI, ya kaya negara Egipte tekan ing Soar.

¹¹Mulané Lot milih tanah legokan laut Yordan, lan terus budal mengétan; mengkono pada pisahan.

¹²Abram tetep manggon ing tanah Kanaan, lan Lot manggon ing kuta-kuta ing tanah legok sak uruté laut Yordan, lan ngedekké tarupé ing sak tyedaké Sodom.

¹³Wong-wong ing Sodom kuwi pada ala banget kelakuané lan dosané gedé banget ing ngarepé GUSTI.

¹⁴Sakwisé Lot pisah sangka Abram, GUSTI terus ngetokké tembung marang Abram: “Sawangen lan delengen sangka panggonan enggonmu ngadek, ngalor lan ngidul, ngétan lan ngulon.

¹⁵Awit tanah sing kok deleng kuwi kabèh bakal Tak wènèhké kowé lan turunanmu ing selawasé.

¹⁶Lan turunanmu bakal Tak dadèkké dadi kaya lebuné bumi okèhé, dadiné yèn ana sing bisa ngitung lebuné bumi, turunanmu ya bakal bisa diitung.

¹⁷Kowé budala, lakonana negara kuwi miturut dawané lan ambané, awit kuwi bakal Tak wènèhké kowé.”

¹⁸Abram terus ngelih tarupé lan manggon ing sak tyedaké alas terbantin ing Mamré tyedak karo Hébron; ing kono dèkné terus nggawé mesbèh kanggo GUSTI.