Read Caribbean Javanese Wiwitan 14 Bible Online

Wiwitan 14 - Caribbean Javanese bible

Wiwitan 14

¹Waktu jaman Amrafèl, ratu ing Sinéar[3], Ariok ratu ing Elasar, Kédorlaomèr ratu ing Elam lan Tindéal ratu ing Goyim,

²ratu-ratu mau pada perang karo Bera ratuné Sodom lan Birsya ratuné Gomora, Syinab ratuné Adma lan Syemeber ratuné Séboim, lan ratuné Béla, ya kuwi Soar.

³Para ratu kuwi pada bebarengan lan ngumpul ing legokan Sidim ya kuwi segara Uyah.

⁴Rolas taun suwéné enggoné wis pada dikwasani karo ratu Kédorlaomèr, nanging bareng ing telulas tauné terus pada nglawan.

⁵Ing waktu patbelas tauné, ratu Kédorlaomèr karo para ratu sing ngréwangi pada ngalahké bangsa Réfaim ing Asytérot-Karnaim, bangsa Suzim ing Ham, bangsa Enim ing Syawé-Kiryatim

⁶lan bangsa Hori sing manggon ing pegunungan Seir, nganti tekan ing El-Paran, pinggiré ara-ara samun.

⁷Sakwisé kuwi terus pada bali tekan ing En-Mispat, ya kuwi Kadès lan ngwasani kabèh panggonané bangsa Amalèk, mengkono uga bangsa Amori sing manggon ing Haséson-Tamar.

⁸Ratuné Sodom, ratuné Gomora, ratuné Adma karo ratuné Séboim, ratuné Béla, ya kuwi ing Soar, pada nata para suradadu ing tanah legok Sidim, arep pada perang

⁹nglawan Kédorlaomèr, ratuné Elam, Tindéal, ratuné Goyim, Amrafèl, ratuné Sinéar lan Ariok, ratuné Elasar, ratu papat merangi ratu lima.

¹⁰Ing bawah Sidim kuwi okèh sumur aspal. Bareng ratu Sodom lan Gomora pada mblayu terus ketyemplung ing kono lan sing liyané pada mblayu nylametké uripé menyang pegunungan.

¹¹Bandané wong Sodom lan Gomora, kabèh barang panganan pada dirampas karo mungsuhé, terus mungsuhé pada lunga.

¹²Uga Lot ponakané Abram lan kabèh bandané ya katut digawa mungsuh, awit manggon ing Sodom.

¹³Terus ana sakwijiné wong sing mblayu ngomongi marang Abram wong Ibrani kuwi, sing manggon tyedak karo alas terbantin ing panggonané wong Mamré, wong Amori seduluré Eskol lan Anèr sing pada kekantyan karo Abram.

¹⁴Waktu Abram krungu yèn ponakané ditawan, terus nglumpukké para wong sing bisa perang ya kuwi para wong-wong sing lairé ing omahé, tyatyahé 318, terus nguber mungsuhé nganti tekan ing Dan.

¹⁵Lan ing wantyi mbengi wong-wong terus dipérang-pérang, ya kuwi Abram lan para abdiné mau; mengkono enggoné arep merangi mungsuhé, terus bisa ngalahké lan ngoyak mungsuhé nganti tekan ing Hoba, ing sisih loré kuta Damaskus.

¹⁶Bandané kabèh sing dirampok bisa direbut menèh, uga Lot ponakané lan bandané kabèh digawa mulih menèh, mengkono uga para wong wadon lan wong-wong liyané.

¹⁷Sakwisé Abram mulih sangka ngalahké ratu Kédorlaomèr lan para ratu sing pada mbélani, terus ratuné Sodom metuki dèkné ing legokan Syawé, ya kuwi legokan Ratu.

¹⁸Mèlkisèdèk ratuné Salèm, nggawa roti lan anggur. Dèkné imamé Gusti Allah sing Mahaluhur.

¹⁹Lan mberkahi Abram, tembungé: “Diberkahi Abram karo Gusti Allah sing Mahaluhur sing nggawé langit lan bumi.

²⁰Lan pinujia Gusti Allah sing Mahaluhur, wis masrahaké mungsuhmu ing tanganmu.” Terus Abram masrahaké sak prasepuluhé barang kabèh mau.

²¹Ratuné Sodom terus ngomong marang Abram: “Kèkna waé wong-wongé kuwi marang kula, lan banda kabèh kuwi jikuken kanggo sampéyan.”

²²Nanging Abram ngomong marang ratuné Sodom: “Kula sumpah kanggo GUSTI, Gusti Allah sing Mahaluhur, sing nggawé langit lan bumi,

²³yèn kula ora bakal njupuk apa-apa sing dadi duwèkmu, senajana mung bolah sakeler utawa taliné sepatu, supaya sampéyan ora bisa ngomong: ‘Aku sing nyugihké Abram.’

²⁴Yèn kula, aja pisan-pisan! Mung apa sing wis dipangan karo para abdiku lan uga sing dadi bagéané wong-wong sing perang bareng karo kula, ya kuwi Anèr, Eskol karo Mamré, bèn njupuk bagéané déwé-déwé.”