Read Caribbean Javanese Wiwitan 15 Bible Online

Wiwitan 15 - Caribbean Javanese bible

Wiwitan 15

¹Sakwisé kuwi mau terus ana tembungé GUSTI marang Abram sak njeruhné weweruh: “Kowé aja wedi Abram, Aku iki tamèngmu, upahmu bakal gedé banget.”

²Semauré Abram: “Duh GUSTI, Gusti Allah, bakal ngekèki apa marang kula? Awit kula bakal ninggal ndonya tanpa anak, mesti Elièser wong Damaskus kuwi, bakal marisi sembarangé kula.”

³Tembungé Abram menèh: “Gusti ora ngekèki turunan marang kula, mulané salah-sijiné abdi kula sing lair ing omah kula sing bakal dadi alur warisku.”

⁴Terus tembungé GUSTI marang Abram, mengkéné: “Duduk wong kuwi sing bakal dadi alur warismu, nanging anak lanangmu sing lair sangka kowé sing bakal dadi alur warismu.”

⁵Terus Gusti nuntun Abram metu menyang njaba lan diomongi: “Kowé ndeloka ing langit lan itungen lintangé, yèn kowé bisa.” Terus tembungé Gusti menèh: “Ya semono okèhé bakalé tyatyahé turunmu.”

⁶Terus Abram pertyaya marang GUSTI, lan perkara kuwi diitung karo GUSTI dadi kabenerané.

⁷Uga tembungé GUSTI marang Abram menèh: “Aku iki GUSTI sing wis nuntun kowé metu sangka Ur-Kasdim; awit bakal Tak wènèhi negara iki dadi duwèkmu.”

⁸Semauré Abram: “Duh GUSTI Allah, kepriyé enggèn kula ngerti, yèn negara iki bakal dadi duwèké kula?”

⁹Terus Gusti ngomongi: “Aku jupukna pedèt wédok sing umur telung taun, wedus sing umur telung taun, wedus gèmbèl lanang sing umur telung taun, manuk deruk siji lan anak dara siji.”

¹⁰Kabèh mau terus pada dijukuk lan pada disigari, sigarané siji lan sijiné disèlèhké adep-adepan, mung manuké sing ora disigari.

¹¹Bareng ana manuk galak pada ngéntyloki sing dibelèh mau, terus pada digusahi karo Abram.

¹²Bareng arep surup, Abram terus turu kepati. Dèkné terus dikwasani ing peteng ndedet sing nggegirisi.

¹³GUSTI terus ngomong marang Abram: “Ngertia ing sak temené, turunanmu bakal dadi wong mantya ing negara sing duduk duwèké, lan bakal pada dadi batur, lan ditindes nganti 400 taun suwéné.

¹⁴Nanging bangsa sing nindes kuwi ya bakal Tak ukum. Sakwisé mengkono bakal pada metu lan nggawa banda okèh banget.

¹⁵Nanging kowé kuwi bakal dadi siji karo leluhurmu nganti slamet rahayu, enggonmu dikubur ing waktu wis okèh umurmu.

¹⁶Sakwisé patang turunan, anak-turunanmu mengko bakal bali mréné, awit Aku ora arep nundung wong Amori, sing ngenggoni negara iki, sak durungé dosané kebek tenan.”

¹⁷Bareng wis surup lan wis peteng, terus kétok ana angklo kemebul lan ontyor murup sing mlaku ing tengahé sigaran-sigaran daging mau.

¹⁸Ing dina kuwi GUSTI nggawé perjanjiané karo Abram, tembungé: “Turunanmu bakal Tak wènèhi negara iki, wiwit sangka kali ing Egipte nganti tekan kali gedé Efrat,

¹⁹ya kuwi negarané wong Kèni, wong Kénas, wong Kadmon,

²⁰wong Hèt, wong Fèris, wong Réfaim,

²¹wong Amori, wong Kanaan, wong Girgasi lan wong Yébus.”