Read Caribbean Javanese Wiwitan 16 Bible Online

Wiwitan 16 - Caribbean Javanese bible

Wiwitan 16

¹Sarai, bojoné Abram kuwi ora nduwé anak. Dèkné nduwé batur wadon bangsa Egipte jenengé Hagar.

²Sarai ngomong marang Abram: “Sampéyan ngerti, GUSTI ora ngekèki aku nglairké anak, saiki sampéyan tyampur turu karo réwang wadon kula iki, menawa kula olèh anak sangka dèkné.” Abram setuju karo tembungé Sarai,

³lan Sarai bojoné Abram terus njupuk Hagar baturé wadon, wong Egipte mau; kelakoné perkara kuwi waktu Abram wis manggon sepuluh taun ing negara Kanaan, terus ngekèkné Hagar marang Abram supaya dadi bojoné.

⁴Abram terus tyampur turu karo Hagar, lan Hagar terus meteng. Nanging bareng rumangsa yèn wis meteng, terus nyepèlèkké nyonyahé.

⁵Sarai terus ngomong marang Abram: “Bab anggèné nglarakké atiku iki, sampéyan sing tanggung jawap, kula wis ngekèkké batur wadon iki marang sampéyan, nanging saiki bareng rumangsa meteng, kok terus nyepèlèkné kula. GUSTI bèn tenan dadi rèkter ing antarané kula lan sampéyan.”

⁶Abram terus ngomong marang Sarai: “Baturmu kuwi ing pangwasamu, tindakna apa sing kok rasa apik.” Sarai terus nindes marang Hagar, lan dèkné terus minggat.

⁷Nanging Mulékaté GUSTI terus nemoni Hagar ing sak tyedaké sumur ing ara-ara samun, ya kuwi sumur ing dalan sing menyang Sur.

⁸Terus diomongi: “Hagar, baturé Sarai, kowé kuwi sangka ngendi lan paranmu menyang ngendi?” Semauré Hagar: “Kula minggat sangka ngarepé nyonyah kula Sarai.”

⁹Mulékaté GUSTI terus ngomong marang Hagar: “Kowé balia marang nyonyahmu lan manuta marang pangwasané.”

¹⁰Uga diomongi menèh karo Mulékaté GUSTI mengkéné: “Turunanmu bakal Tak dadèkké okèh banget, nganti ora bisa diitung, awit sangka akèhé.”

¹¹Mulékaté GUSTI terus ngomongi menèh: “Kowé kuwi ijik meteng lan bakal nglairké anak lanang, kuwi jenengna Ismaél, awit GUSTI wis krungu kasangsaranmu.

¹²Anak lanang mau bakal kaya kimar alasan, tangané bakal nglawan saben wong lan ya bakal gentèn dilawan karo saben wong, lan ing panggonané bakal nantang marang para seduluré.”

¹³Hagar terus ngarani asmané GUSTI sing ngomong mau diarani: “Sampéyan kuwi El-Roi.” Awit tembungé dèkné: “Apa aku ing kéné, wis weruh Gusti sing nggatèkké aku?”

¹⁴Mulané sumur mau dijenengaké: sumur Lakai-Roi iku ana antarané Kadès lan Bered.

¹⁵Hagar terus nglairké anak lanang sangka Abram. Lan Abram njenengaké anaké sing lair sangka Hagar mau: Ismaél.

¹⁶Abram umuré wolung puluh nem taun, waktu Hagar nglairké Ismaél kanggo dèkné.