Read Caribbean Javanese Wiwitan 20 Bible Online

Wiwitan 20 - Caribbean Javanese bible

Wiwitan 20

¹Abraham terus budal sangka kono menyang ing negara Negeb, lan manggon ing antarané kuta Kadès lan Sur, dadi wong mantya ing Gérar.

²Awit Abraham ngomongké yèn Sara, bojoné: Kuwi sedulurku, mulané Abimèlèk ratu ing Gérar kongkonan njupuk Sara.

³Nanging Gusti Allah nekani marang ratu Abimèlèk ing sak njeruhné impèn lan ngetokké tembung: “Kowé mesti bakal mati awit sangka wong wadon sing kok jupuk kuwi, awit kuwi wis nduwé bojo.”

⁴Ratu Abimèlèk durung tau nuroni Sara, mulané terus ngomong: “Duh Gusti, apa Gusti bakal matèni bangsa sing ora kesalahan?

⁵Apa duduk wongé déwé sing tyerita marang kula: Iki seduluré kula. Lan sing wadon déwé uga ngomong: Dèkné seduluré kula. Enggèn kula nandangi mengkono kuwi karo atiku sing bener lan tangan sing resik.”

⁶Gusti Allah terus ngetokké tembung menèh marang ratu Abimèlèk sak njeruhné impèn mau: “Aku ngerti yèn enggonmu nglakoni kuwi metu sangka atimu sing jujur, lan ya Aku déwé sing menggak kowé supaya aja nganti nggawé dosa marang Aku. Mulané kowé ora Tak lilani nuroni wong wadon kuwi.

⁷Saiki, wong wadon kuwi balèkna marang bojoné, awit Abraham kuwi nabi, lan dèkné bakal ndongakké kowé, supaya kowé bisa tetep urip; nanging yèn wong wadon mau ora mbok balèkké, ngertia yèn kowé mesti bakal mati, kowé lan kabèh wongmu.”

⁸Bareng ésuké mruput Abimèlèk tangi lan nyeluk abdiné kabèh, dityritani bab tembungé mau, sak nalika wong kabèh pada wedi banget.

⁹Abimèlèk terus kongkonan nyeluk Abraham, terus diomongi: “Apa sing sampéyan tindakké marang kula iki lan kula kesalahan apa marang sampéyan, nganti sampéyan kok nekakké dosa gedé marang kula lan kraton kula? Sing sampéyan tindakké marang kula iki ora pantes banget.”

¹⁰Abimèlèk ngomong menèh marang Abraham: “Karep sampéyan iku apa, nganti nandangi kaya mengkéné iki?”

¹¹Abraham nyauri tembungé: “Pikirané kula, mesti ing kéné babar pisan ora ana wong sing wedi marang Gusti Allah, mulané kula mesti bakal dipatèni awit sangka bojo kula.

¹²Karo menèh iki ya sedulurku tenan, dèkné anaké bapak kula, nanging duduk anaké emak kula, lan terus dadi bojo kula.

¹³Waktu kula dikarepké karo Gusti Allah supaya ninggalké omahé bapakku, kula terus nglembara, bojoku, kula omongi mengkéné: ‘Mbok kowé nindakké katrésnan marang aku mengkéné: Ing panggonan ngendi waé sing bakal kita parani, kowé ngomonga kanggo aku mengkéné: Iki seduluré kula!”

¹⁴Abimèlèk terus njupuk wedus lan sapi, batur lanang lan wadon, pada dikèkké marang Abraham; uga Sara bojoné dibalèké marang dèkné.

¹⁵Tembungé Abimèlèk: “Negara kula kebukak ing ngarepé sampéyan, kono kula lilani manggon ing ngendi waé sing sampéyan karepaké.”

¹⁶Lan terus ngetokké tembung marang Sara: “Lan kula wis ngekèki seduluré sampéyan 1000 sèkel slaka, kanggo bukti kesutyiané sampéyan ing ngarepé kabèh wong, sing bareng karo sampéyan, nganti sampéyan bener ing kabèh perkara.”

¹⁷Abraham terus ndedonga marang Gusti Allah, lan Gusti Allah terus marakké Abimèlèk, karo bojoné lan para abdiné wadon, terus pada bisa nduwé anak.

¹⁸Awit mauné GUSTI ndadèkké ora bisa meteng ing saben wong wadon ing kratoné Abimèlèk, awit sangka Sara bojoné Abraham.