Read Caribbean Javanese Wiwitan 21 Bible Online

Wiwitan 21 - Caribbean Javanese bible

Wiwitan 21

¹GUSTI ngélingi marang Sara, kaya sing wis diomongké lan GUSTI nindakké marang Sara kaya sing wis dijanjèkké.

²Sara terus meteng lan nglairké anak lanang patutan sangka Abraham waktu Abraham wis tuwa, ing waktu sing wis ditetepaké, tyotyok karo tembungé Gusti Allah marang dèkné.

³Anaké sing entas lair, sangka Sara, dikèki jeneng Isak karo Abraham,

⁴lan Abraham terus nyunati anak lanang Isak, waktu umuré wolung dina, kaya sing dipréntahké Gusti Allah marang dèkné.

⁵Abraham umuré 100 taun dongé anak Isak mau lair.

⁶Sara terus ngomong: “Gusti Allah nggawé aku ngguyu, sapa sing krungu bab iki, mesti bakal ngguyu awit sangka aku.”

⁷Lan menèh tembungé: “Mbiyèn sapa sing bisa ngomongi marang Abraham: Sara nyusoni anak? Nanging aku wis nglairké anak lanang, waktu dèkné wis tuwa banget.”

⁸Lan anak mau saya mundak gedé, terus disapih. Abraham nganakké pésta gedèn waktu dina Isak disapih mau.

⁹Waktu kuwi Sara weruh anaké Hagar wong Egipte patutan karo Abraham moyoki marang Isak,

¹⁰terus ngomong marang Abraham: “Batur wadon kuwi uga anaké dèkné, kongkon lunga sangka kéné, awit anaké lanang batur wadon iki ora bakal mèlu olèh warisan karo anak lanang kula Isak.”

¹¹Tembungé mengkono kuwi ndadèkké nyusaké atiné Abraham, awit sangka anaké.

¹²Nanging tembungé Gusti Allah marang Abraham: “Aja nganti dadi nyusaké atimu awit sangka botyahé lan baturmu; apa penjaluké Sara marang kowé kuwi turutana, awit turunané sangka Isak kuwi sing bakal disebut turunanmu.

¹³Senajan mengkono anaké baturmu kuwi ya bakal Tak dadèkké bangsa gedé, awit kuwi ya anakmu.”

¹⁴Esuké mruput Abraham, njupuk roti lan banyu sak kantong, dikèkké marang Hagar lan ditumpangké ing pundaké, mengkono uga botyahé, sakwisé terus dikongkon lunga. Hagar terus budal, nanging mlakuné kesasar ing ara-ara samun Bèrsyéba.

¹⁵Bareng banyuné ing kantong wis entèk, botyahé terus disèlèhké ing sak ngisoré grumbulan.

¹⁶Hagar terus njagong rodok adoh kira-kira sak pemanah, tembungé dèkné mengkéné: “Aku ora tegel weruh botyahé enggoné arep mati.” Sakwisé mapan lungguh, terus nangis karo swara banter.

¹⁷Gusti Allah krungu sambaté botyahé, mulékaté Gusti Allah terus mbengok marang Hagar sangka langit, tembungé: “Hagar apa sing kok susahké? Aja wedi, awit Gusti Allah wis ngrungokké sambaté botyahé ing panggonané ngglétak.

¹⁸Ngadeka! Botyahé tangèkna, tuntunen awit bakal Tak dadèkké bangsa gedé.”

¹⁹Gusti Allah terus mbukak mripaté Hagar, terus dèkné weruh ana sumur, terus diparani lan kantongé diisèni banyu lan botyahé diombèni.

²⁰Gusti Allah ana karo botyahé, sak nalika saya mundak gedé lan panggonané ing ara-ara samun dadi tukang manah.

²¹Panggonané ing ara-ara samun Paran, lan digolèkké bojo karo ibuné sangka negara Egipte.

²²Ing sakwijiné dina Abimèlèk karo Pikol penggedéné suradadu ngomong marang Abraham, tembungé: “Gusti Allah wis nunggal karo sampéyan ing kabèh perkara sing sampéyan nandangi.

²³Mulané saiki kula jaluk sampéyan sumpah marang kula ing jenengé Gusti Allah ing kéné, yèn sampéyan ora bakal mblénjani marang kula, utawa marang anak-anak kula lan uga turun-turunané kula; sampéyan nindakké sing apik marang kula uga marang negara sing sampéyan panggoni dadi wong mantya iki, kaya enggèn kula wis nindakké sing apik marang sampéyan.”

²⁴Tembungé Abraham: “Ya kula sumpah!”

²⁵Nanging Abraham nggresula marang Abimèlèk, perkara sumur sing direbut karo para abdiné.

²⁶Tembungé Abimèlèk: “Kula ora ngerti, sapa sing nandangi kuwi, lan sampéyan uga ora ngekèki ngerti marang kula, kabar iki kula ijik krungu dina iki.”

²⁷Abraham terus njupuk wedus gèmbèl lan sapi terus dikèkké Abimèlèk, lan wong loro pada nggawé perjanjian.

²⁸Nanging Abraham misahké tyempé gèmbèl wédok pitu sangka panta mau.

²⁹Abimèlèk terus ngomong marang Abraham: “Tyempé gèmbèl pitu sing sampéyan pisahké kuwi, apa tegesé?”

³⁰Semauré Abraham: “Tyempé gèmbèl pitu kuwi supaya sampéyan tampani déwé sangka tangan kula, kanggo tanda yèn kula sing ngeduk sumur kuwi.”

³¹Mulané panggonan kuwi dijenengké Bèrsyéba, awit ing kono wong loro mau pada sumpah.

³²Sakwisé nggawé perjanjian kaya mengkono ing Bèrsyéba, Abimèlèk lan Pikol penggedéné suradadu, terus mulih menyang negarané wong Filistèn.

³³Abraham ing Bèrsyéba mau nandur wit tamariska, lan nyeluk asmané GUSTI, Gusti Allah sing langgeng.

³⁴Abraham enggoné manggon dadi wong mantya ing negarané wong Filistèn kuwi nganti suwé banget.