Read Caribbean Javanese Wiwitan 22 Bible Online

Wiwitan 22 - Caribbean Javanese bible

Wiwitan 22

¹Sakwisé lelakon mau Gusti Allah terus njajal pertyayané Abraham. Tembungé mengkéné: “Abraham.” Semauré Abraham: “Kula Gusti.”

²Préntahé Gusti Allah: “Anak lanang sing ora ana tunggalé, sing kok trésnani, ya kuwi Isak, gawanen menyang tanah Moria, ing kono pasrahna digawé kurban obongan ing sakwijiné gunung sing bakal Tak duduhké marang kowé.”

³Esuké mruput Abraham tangi, terus nglapaki kimaré, ngejak abdiné loro lan Isak, anaké; lan nyigari kayu kanggo kurban obongan, terus budal menyang panggonan sing dipréntahké karo Gusti Allah.

⁴Sakwisé telung dina Abraham ndangak lan weruh panggonané sangka kadohan;

⁵lan Abraham ngomong marang abdiné loro: “Kowé karo kimaré pada kèria ing kéné, aku karo anakku arep mbrana perlu sembayang, sakwisé kuwi kita bakal pada mbalèni kowé menèh.”

⁶Abraham terus njupuk kayuné kurban obongan, dipanggulké marang Isak lan nggawa geni lan péso. Mengkono wong loro pada mlaku bareng.

⁷Isak terus takon marang Abraham: “Pak?” Semauré Abraham: “Ana apa anakku?” Tembungé Isak: “Geni lan kayuné wis ana, nanging tyempé sing digawé kurban obongan ana ngendi?”

⁸Abraham nyauri tembungé: “Kanggo tyempé sing bakal digawé kurban obongan kuwi Gusti Allah déwé sing bakal nyawiské, anakku!” Mengkono wong loro terus mlaku bebarengan.

⁹Sakwisé pada tekan ing panggonan sing dipréntahké karo Gusti Allah, Abraham terus nggawé mesbèh ing kono, kayuné terus ditata, Isak dibanda lan ditumpangké ing mesbèh ing sak nduwuré kayu.

¹⁰Abraham terus ngelungké tangané lan njupuk péso, arep mbelèh anaké.

¹¹Nanging mulékaté GUSTI terus mbengok marang Abraham sangka langit: “Abraham! Abraham!” Semauré Abraham: “Kula GUSTI!”

¹²Tembungé mulékat: “Kowé aja matèni anak kuwi, lan aja diapak-apakké! Awit saiki Aku ngerti yèn kowé ngajèni marang Gusti Allah, nganti kowé ora éman masrahaké anakmu lanang sing ora ana tunggalé marang Aku.”

¹³Waktu Abraham nolèh, terus weruh ing mburiné ana wedus gèmbèl lanang sing sunguné ketyantol ing grumbulan, terus dijikuk lan terus dipasrahké dadi kurban obongan ijolé anaké.

¹⁴Panggonan kuwi dijenengké karo Abraham: GUSTI sing nyawiské. Awit sangka kuwi nganti sepréné ana tetembungan: Ing gunungé[6], GUSTI bakal nyawiské.

¹⁵Mulékaté GUSTI mbengok ping pindoné marang Abraham sangka langit,

¹⁶tembungé: “Aku sumpah kanggo AKU déwé, mengkéné tembungé GUSTI, awit kowé nglakoni sing mengkono kuwi, nganti ora éman masrahaké anakmu sing ora ana tunggalé marang Aku,

¹⁷mulané kowé bakal Tak berkahi nganti lubèr lan turunanmu bakal dadi okèh banget nganti kaya lintang-lintang ing langit lan kaya wedi ing pinggiré segara, lan turunanmu bakal ngenggoni kuta-kutané mungsuhé.

¹⁸Uga awit sangka turunanmu kuwi sakkèhé para bangsa ing bumi bakal pada kaberkahan; awit kowé wis ngrungokké tembung-Ku.”

¹⁹Abraham terus bali mbalèni abdiné, terus pada budal bebarengan menyang Bèrsyéba, lan Abraham terus manggon ing Bèrsyéba.

²⁰Sakwisé lelakon kuwi mau, Abraham nampa kabar mengkéné: “Milka wis nduwé anak-anak lanang patutan sangka Nahor seduluré sampéyan.

²¹Sing mbarep Us, adik Bus, terus Kemuèl, bapaké Aram,

²²uga kèsèd, Haso, Pildas, Yidlaf lan Bétuèl.”

²³Bétuèl nduwé anak Ribka. Wong wolu kuwi kabèh anaké Milka patutan karo Nahor, seduluré Abraham.

²⁴Nahor uga nduwé bojo wayuh jenengé Réuma uga nduwé anak, ya kuwi Tebah, Gaham, Tahas lan Maaka.