Read Caribbean Javanese Wiwitan 25 Bible Online

Wiwitan 25 - Caribbean Javanese bible

Wiwitan 25

¹Abraham njupuk bojo menèh jenengé Ketura,

²kuwi nglairké anak: Simri, Yoksan, Medan, Midian, Isybak lan Suah.

³Yoksan nduwé anak Syéba lan Dédan, turunané Dédan ya kuwi bangsa Asyur lan bangsa Letusim lan bangsa Leum.

⁴Anaké Midian ya kuwi: Efa, Efer, Hénokh, Abida lan Elda, kuwi kabèh turunané Ketura.

⁵Abraham ngekèkké bandané kabèh marang Isak.

⁶Nanging para anak sing patutan sangka bojo wayuh mau pada dikèki berkah, lan terus dikongkon lunga, waktu dèkné ijik urip, pisah sangka Isak, menyang Negara Wétané.

⁷Umuré Abraham kuwi 175 taun,

⁸Abraham terus ninggal ndonya, waktu wis okèh umuré, wis putih rambuté, terus diklumpukké karo para leluhuré.

⁹Terus dikubur karo Isak lan Ismaél ing guwa Mahpéla ing lemahé Efron anaké Sohar wong Hèt ing sisih wétané Mamré,

¹⁰lemah sing dituku Abraham sangka wong turunané Hèt; ya ing kono Abraham lan Sara pada dikubur.

¹¹Sakwisé Abraham ninggal ndonya Gusti mberkahi Isak, anaké lanang lan Isak manggon ing sak tyedaké sumur Lahai-Roi.

¹²Iki turun-turunané Ismaél anaké Abraham, sing lair sangka Hagar wong Egipte, baturé Sara, patutan karo Abraham.

¹³Iki jenengé para anaké Ismaél, manut urutané lairé: Nébayot, Kedar, Adbeel, Mibsam,

¹⁴Misyma, Duma, Masa,

¹⁵Hadad, Tema, Yetur, Nafisi lan Kedma.

¹⁶Kuwi kabèh para anaké Ismaél, lan jenengé kuwi manut panggonané lan tarupé, ratu rolas déwé-déwé manut taleré.

¹⁷Umuré Ismaél kuwi: 137 taun, terus ninggal ndonya, diklumpukké karo para leluhuré.

¹⁸Panggonané turun-turunané mau wiwit sangka Hawila nganti tekan bawahé ing Sur, sisih wétané negara Egipte ing uruté Asyur. Enggoné pada mapan ing ngarepé para seduluré.

¹⁹Turunané Isak anaké Abraham. Abraham nduwé anak Isak.

²⁰Lan Isak umuré patang puluh taun waktu njupuk bojo Ribka anaké Bétuèl wong Aram sangka Padan-Aram, seduluré Laban wong Aram.

²¹Isak ndongakké bojoné marang GUSTI, awit bojoné kuwi gabuk; lan GUSTI nuruti penjaluké, banjur Ribka bojoné terus meteng.

²²Bareng bayiné pada suk-sukan ing wetengé, Ribka ngomong: “Yèn kaya mengkéné kenèng apa aku urip?” Terus lunga njaluk pinuntun marang GUSTI.

²³GUSTI terus ngomongi: “Bangsa loro ing wetengmu, bangsa loro sing bakal pada pisahan wiwit sangka wetengmu; sing siji bakal luwih kuwat tenimbangané sijiné lan sing tuwa bakal dadi baturé marang sing tyilik.”

²⁴Bareng tekan ing waktuné nglairké, pantyèn kembar metengé;

²⁵sing lair ndisik kétok wuluné abang, sak kojur kaya dibuntel wulu, mulané dikèki jeneng Esau.

²⁶Sakwisé mengkono adiké terus lair tangané nyekel tungkaké Esau, kuwi dikèki jeneng Yakub. Isak umuré 60 taun waktu duwé anak loro mau.

²⁷Anak loro mau mundak gedé: Esau dadi wong sing pinter beburon, seneng manggon ing ara-ara, nanging Yakub kuwi wong sing meneng, sing seneng ing tarup.

²⁸Isak kuwi trésna marang Esau, awit seneng mangan daging kéwan-kéwan beburon, nanging Ribka trésna Yakub.

²⁹Sakwijiné dina waktu Yakub ijik masak, Esau teka beburon sangka ara-ara, kétok keselé.

³⁰Esau terus nembung Yakub: “Mbok aku wènèhana mangan sing abang kuwi ta, awit aku kesel.” Ya iki jalarané jenengé dityeluk: Edom.

³¹Nanging Yakub nyauri: “Hakmu dadi anak mbarep kuwi dolen ndisik marang aku!”

³²Semauré Esau: “Sedéla engkas aku bakal mati, apa kanggoné nduwé wibawa anak mbarep kuwi?”

³³Semauré Yakub: “Sumpaha marang aku ndisik!” Esau terus sumpah, lan hak anak mbarep didol marang Yakub.

³⁴Yakub terus ngekèki roti lan masakan katyang abang marang Esau; lan terus mangan lan ngombé, sakwisé terus lunga. Mengkono Esau ora ngajèni hak dadi anak mbarep.