Read Caribbean Javanese Wiwitan 26 Bible Online

Wiwitan 26 - Caribbean Javanese bible

Wiwitan 26

¹Ing negara kono ngalami pailan, iki duduk pailan sing ndisik sing kelakon waktuné jamané Abraham. Isak terus lunga menyang Gérar metuki Abimèlèk ratuné bangsa Filistèn.

²GUSTI terus ngétok marang Isak lan ngetokké tembung: “Kowé aja lunga menyang Egipte, manggona ing negara sing bakal Tak omongké marang kowé.

³Kowé manggona ing negara kéné dadi wong mantya, Aku bakal ngantyani kowé lan kowé bakal Tak berkahi, awit kowé lan turunanmu bakal Tak wènèhi negara iki kabèh, lan Aku bakal netepi sumpah sing wis Tak omongké marang Abraham bapakmu.

⁴Uga menèh Aku bakal ngakèhké turunanmu kaya lintangé langit; lan turunanmu bakal Tak wènèhi negara iki kabèh; lan awit sangka turunanmu sakkèhé bangsa ing bumi bakal kaberkahan.

⁵Awit Abraham wis manut karo tembung-Ku lan netepi sing dadi kuwajipané marang Aku, ya kuwi kabèh pepakon, pernatan lan angger-angger-Ku.”

⁶Dadi Isak tetep manggon ing Gérar.

⁷Waktu wong-wong ing kono pada takon bab bojoné, Isak ngomong: “Iki seduluré kula,” awit wedi ngomong: “Iki bojoku,” awit mikiré: “Bisa uga aku dipatèni karo wong-wong ing kéné jalaran sangka Ribka, awit Ribka kuwi ayu tenan.”

⁸Bareng wis let suwé enggoné manggon ing kono, ing sakwijiné waktu Abimèlèk ratuné wong Filistèn nginguk sangka tyendéla, ngerti Isak ijik seneng-senengan karo bojoné Ribka.

⁹Abimèlèk terus nyeluk Isak lan ngomong: “Sak temené dèkné kuwi bojomu, kepriyé sampéyan kok ngomong: Kuwi seduluré kula?” Tembungé Isak marang ratu: “Awit pikirané atiku: kula bakal dipatèni awit sangka dèwèké.”

¹⁰Nanging Abimèlèk ngomong: “Apa sing sampéyan tindakké marang kita iki? Gampang banget kedadian wong bangsa kéné sing nganti nuroni bojomu, jalaran sangka sampéyan terus nekaké kesalahan marang kita?”

¹¹Abimèlèk terus préntah marang sak bangsané kabèh: “Sapa wong sing ngganggu marang wong iki utawa marang bojoné, mesti diukum pati!”

¹²Isak terus nyebar wiji ing negara kono, olèh-olèhé ing taun kuwi uga nganti tikel 100, awit diberkahi karo GUSTI,

¹³nganti dèkné dadi sugih lan mundak suwé mundak-mundak kasugihané, nganti dadi sugih banget,

¹⁴nduwé kumpulan wedus lan kumpulan sapi, peladèné okèh, nganti wong-wong Filistèn pada mèri.

¹⁵Sakkèhé sumur ing jaman Abraham, bapaké, sing diduduk karo para abdiné bapaké, kuwi pada ditutup lan diuruki lemah.

¹⁶Abimèlèk terus ngomong marang Isak: “Kowé tak kongkon lunga sangka kéné, awit pangwasamu ngungkuli pangwasa kita.”

¹⁷Isak terus lunga sangka kono terus ngedekké tarupé ing bawah Gérar, lan manggon ing kono.

¹⁸Sakwisé terus ngeduk sumur-sumur sing mbiyèn diduduk waktu uripé Abraham, lan wis pada ditutupi karo wong Filistèn sakwisé Abraham ninggal ndonya; sumur-sumur mau pada dijenengaké kaya jenengé sing mbiyèn wis dikèkké karo bapaké.

¹⁹Nalika abdiné bapak Isak pada ngeduki ing panggonan kono, pada nemu sumber sing banyuné mubal-mubal.

²⁰Para pangoné Gérar terus pada tukaran karo para pangoné Isak, tembungé: “Banyu iki duwèké awaké déwé.” Isak ngekèki jenengé sumur mau: Esek, awit ing kono pada tukaran karo dèkné.

²¹Terus pada ngeduk sumur liyané, ya dadi tukaran uga, mulané sumur dikèki jeneng Sitna.

²²Isak terus ngalih sangka kono lan ngeduk sumur liyané, nanging ora nganti dadi tukaran. Sumur kuwi dikèki jeneng: Réhobot, tembungé: “Saiki GUSTI wis ngekèki kelunggaran marang kita, kita pada bisa bebranah turunan ing negara kéné.”

²³Sangka kono Isak lunga menyang Bèrsyéba.

²⁴Ing mbengi kuwi GUSTI ngétok lan ngomong: “Aku iki Gusti Allahé bapakmu Abraham, kowé aja wedi, awit Aku nunggal karo kowé lan kowé bakal Tak berkahi, turunanmu bakal dadi okèh banget, awit sangka Abraham abdi-Ku.”

²⁵Isak terus ngedekké mesbèh lan memuji asmané GUSTI. Ya ing kono enggoné masang tarupé lan para abdiné terus pada ngeduk sumur.

²⁶Abimèlèk teka sangka Gérar metuki Isak ditutké Ahuzat kantyané lan Pikol penggedéné suradadu.

²⁷Isak terus ngomong: “Kenèng apa kowé teka metuki aku, kowé wis sengit karo aku, malah kowé nundung aku sangka negaramu?”

²⁸Tembungé wongé: “Aku wis weruh déwé, yèn GUSTI nunggal karo kowé, mulané aku ngomong: Apik yèn kita pada sumpah, antarané aku lan kowé, apiké aku nggawé perjanjian karo kowé.

²⁹Aja nganti kowé nindakké ala marang aku, kaya aku ora bakal ngganggu kowé, malah aku tansah nindakké sing apik marang kowé, kowé tak lilani lunga karo slamet; nyatané saiki kowé sing diberkahi karo GUSTI!”

³⁰Dayohé terus pada dikèki suguhan, lan pada mangan lan ngombé.

³¹Esuké ijik ésuk terus pada sumpah. Sakwisé mengkono Isak nglilani dayohé mulih terus pada budal ninggalké Isak karo apik.

³²Ing dina kuwi uga para abdiné Isak teka ngomongi kabaré bab enggoné wis pada ngeduk sumur, tembungé: “Kita wis pada nemu banyu.”

³³Sumur kuwi terus dikèki jeneng: Syéba, mulané negara kono diarani Bèrsyéba nganti saiki.

³⁴Waktu Esau umuré patang puluh taun terus rabi karo Yudit, anaké Beeri, wong Hèt, lan Basmat, anaké Elon uga wong Hèt.

³⁵Wong loro kuwi ndadèkké sedihé atiné Isak lan Ribka.