Read Caribbean Javanese Wiwitan 29 Bible Online

Wiwitan 29 - Caribbean Javanese bible

Wiwitan 29

¹Yakub nerusaké mlakuné menyang negarané bangsa wétanan.

²Waktu nyawang ngiwa lan nengen, terus weruh ana sumur ing ara-ara, lan ana wedus telung ponta pada njerum ing sak tyedaké sumur mau, awit sumur kuwi panggonané wong pada ngombèkké wedus-wedusé, watu tutupé sumur kuwi gedé,

³dadi yèn sakkèhé rombongan wedus wis digiring nglumpuk mrana, pangon-pangoné terus ngglundungké watuné sangka tyangkemé sumur, lan wedusé diombèni, sakwisé mengkono watuné terus dibalèkaké menèh kaya mauné.

⁴Yakub terus ngaruh-aruhi wong-wong mau: “Para sedulur, sampéyan kuwi sangka ngendi?” Semauré: “Kita sangka Haran.”

⁵Yakub nakoni menèh: “Sampéyan kenal karo Laban, putuné simbah Nahor?” Semauré: “Ya kenal.”

⁶Terus pada ditakoni menèh: “Apa pada slamet?” Semauré: “Ya slamet, lah kaé Rahèl anaké wadon, teka nggiring wedusé.”

⁷Semauré Yakub: “Iki ijik awan, durung waktuné nggiring ta? Mbok wedusé diombèni, terus diengon menèh!”

⁸Nanging semauré sing pada angon: “Kita ora bisa nandangi mengkono yèn kumpulané kéwan durung nglumpuk kabèh; watuné terus diglémpangké sangka tyangkemé sumur, lan wedusé terus pada diombèni.”

⁹Sak njeruhné ijik omong-omongan karo wong-wong kuwi, Rahèl terus teka nggiring wedusé bapaké, awit dèwèké sing dadi pangoné.

¹⁰Bareng Yakub weruh Rahèl, anaké Laban seduluré ibuné, lan wedus-wedusé, Yakub terus nyedaki lan nggolingké watuné sangka tyangkemé sumur, lan ngombèni wedusé Laban seduluré ibuné.

¹¹Sakwisé mengkono Yakub terus ngambungi Rahèl lan nangis banter.

¹²Yakub terus nyritakké yèn ijik pernah ponakané bapaké, anaké Ribka. Rahèl terus mblayu ngomongi marang bapaké.

¹³Bareng Laban krungu kabar yèn Yakub kuwi anaké seduluré, terus mblayu metuk, Yakub dirangkul lan diambungi terus diajak mlebu ing omahé. Yakub terus nyritakké lelakon kabèh marang Laban.

¹⁴Semauré Laban: “Sak temené kowé kuwi ijik kulit dagingku déwé.” Yakub manggon ing omahé Laban wis genep sesasi.

¹⁵Sakwisé kuwi Laban ngomong marang Yakub: “Apa awit kowé kuwi ijik sanak karo aku, enggonmu nyambutgawé ing kéné iki tanpa bayaran? Mbok diomongi aku, kowé njaluk upah apa?”

¹⁶Laban mau nduwé anak wadon loro, sing tuwa jenengé Léa lan sing tyilik jenengé Rahèl.

¹⁷Léa kuwi mripaté ora bening, nanging Rahèl kuwi luwes lan ayu rupané.

¹⁸Dadiné sing ditrésnani Yakub kuwi Rahèl, mulané tembungé: “Kula gelem kerja marang sampéyan pitung taun suwéné, supaya kula olèh Rahèl anak sampéyan ragil.”

¹⁹Semauré Laban: “Pantyèn luwih apik tak wènèhaké kowé tenimbangané tak wènèhaké wong liyané; tetepana mèlu aku!”

²⁰Yakub kerja kanggo Rahèl kuwi suwéné pitung taun. Nanging waktuné mau sawangané kaya mung pirang dina waé, awit sangka katrésnané marang Rahèl.

²¹Sakwisé mengkono Yakub terus ngomong marang Laban: “Tyalon bojo kula sampéyan kèkké, awit waktu sing ditemtokké wis entèk, supaya kula terus bisa omah-omah karo Rahèl.”

²²Laban terus nglumpukké wong panggonan kono lan nganakké pésta.

²³Nanging bareng mbengi Léa anaké sing tuwa sing ditemokaké karo Yakub. Yakub ya terus nuroni Léa.

²⁴Laban ya nggawani Silpa abdiné wadon marang Léa anaké, dadi abdiné.

²⁵Bareng ésuk konangan yèn kuwi Léa. Yakub terus ngomong marang Laban: “Kepriyé kok sampéyan nindakké mengkéné marang kula? Kula kerja marang sampéyan iki supaya olèh Rahèl, kenèng apa sampéyan ngapusi kula?”

²⁶Semauré Laban: “Miturut adat ing panggonanku kéné, ora lumrah ngomah-omahké adiké ndisik tenimbang yuné.

²⁷Pitung dina engkas enggonmu bebrayatan karo Léa, sakwisé kuwi kowé ya tak wènèhi sijiné kanggo upahé, angger kowé saguh kerja marang aku pitung taun menèh.”

²⁸Yakub ya terus nglakoni mengkono, nutukké bebrayatané karo Léa nganti pitung dina; bareng wis genep pitung dina terus ya diwènèhké Rahèl anaké, dadi bojoné.

²⁹Laban nggawani anaké mau abdi wadon jenengé Bilha, dadi abdiné.

³⁰Yakub ya terus nuroni Rahèl, malah enggoné nrésnani Rahèl ngungkuli katrésnané marang Léa. Kaya mengkono Yakub terus kerja marang Laban pitung taun menèh.

³¹GUSTI ngerti yèn Léa ora ditrésnani, mulané dibukak wetengé, nanging Rahèl gabuk.

³²Léa terus meteng lan nglairké anak lanang, sing dijenengaké Rubèn, semauré: “Sak temené GUSTI wis weruh kasangsaranku, saiki aku mesti ditrésnani bojoku.”

³³Terus meteng menèh lan nglairké anak lanang, semauré: “GUSTI ngerti yèn aku ora ditrésnani, mulané aku dikèki anak menèh.” Botyahé dijenengaké: Siméon.

³⁴Sakwisé mengkono Léa terus meteng menèh lan nglairké anak lanang, semauré: “Saiki bojoku bakal luwih tyedak marang aku, awit aku wis nglairké anak lanang nganti telu.” Mulané anaké dijenengaké: Lévi.

³⁵Dèkné meteng menèh lan nglairké anak lanang, semauré: “Saiki aku bakal memuji GUSTI.” Mulané anaké dijenengaké: Yéhuda. Sakwisé kuwi mandek enggoné nglairké anak.