Read Caribbean Javanese Wiwitan 35 Bible Online

Wiwitan 35 - Caribbean Javanese bible

Wiwitan 35

¹Gusti terus ngetokké tembung marang Yakub: “Tata-tataa lan lungaa menyang Bétel, manggona ing kono lan nggawéa mesbèh kanggo Gusti sing wis ngétok marang kowé, waktu kowé mblayu sangka ngarepé Esau kakangmu!”

²Yakub terus ngomongi brayaté lan wong sing mèlu dèkné kabèh: “Pada singkirna sakkèhé brahala ing tengahmu, sutyèkké uripmu lan salina sandangan!

³Hayuk pada tata-tataa lan budal menyang Bétel, ing kono aku arep nggawé mesbèh kanggo Gusti, sing wis nulungi aku ing dina kangèlanku, lan wis nunggal karo aku ing dalan sing tak lakoni.”

⁴Wong-wong terus masrahaké marang Yakub kabèh retya sing diduwèni, mengkono uga anting-anting ing kupingé, lan terus dipendem karo Yakub ing ngisoré wit gedé sak tyedaké Sikem kono.

⁵Sakwisé mengkono terus pada budal. Kuta-kuta ing sak ubengé kono pada didadèkké wedi karo Gusti Allah, dadiné pada ora ngoyak anak-anaké Yakub.

⁶Yakub terus tekan ing Lus ing negara Kanaan, ya kuwi Bétel; dèwèké lan sak kabèhé wong-wong sing pada mèlu;

⁷lan terus ngedekké mesbèh ing kono, lan panggonan kuwi dijenengaké El-Bètel, awit ing kono Gusti enggoné ngétokké Panjenengané piyambak marang dèwèké, waktu mblayu sangka ngarepé kakangé.

⁸Ing kono Debora sing ngemong Ribka ninggal ndonya, terus dikubur ing Bétel bawah ngisor ing sak ngisoré wit gedé, sing diarani: Wit Gedé Petangisan.

⁹Sak mulihé Yakub sangka Padan-Aram, Gusti ngétok menèh lan mberkahi.

¹⁰Tembungé Gusti marang Yakub mengkéné: “Jenengmu Yakub, wiwit saiki jenengmu ora Yakub menèh, nanging Israèl, kuwi dadia jenengmu.” Mengkono enggoné Gusti ngekèki jeneng dèkné Israèl.

¹¹Lan diomongi menèh karo Gusti mengkéné: “Aku iki Gusti Allah sing Mahakwasa, kowé tambah-tambaha lan tangkar-tumangkara; siji bangsa, malah kumpulan bangsa-bangsa sing bakal dadi sangka kowé, lan bakal ana ratu-ratu sing asal-usulé sangka kowé.

¹²Uga negara sing wis Tak wènèhké marang Abraham lan marang Isak, kuwi Tak wènèhké marang kowé lan marang turunanmu.”

¹³Gusti terus ninggalké Yakub sangka panggonan enggoné ngetokké tembung mau.

¹⁴Yakub terus ngedekké tugu ing panggonan kono ya kuwi tugu watu lan masrahaké kurban ombèn lan ngesokké lenga ing sak nduwuré watu mau.

¹⁵Panggonan enggoné dèkné diomongi Gusti mau dijenengaké Yakub: “Bétel”.

¹⁶Sakwisé mengkono terus pada budal sangka Bétel. Bareng mlakuné tekan sak tyedaké Efrat, Rahèl nglairké bayi, enggoné nglairké anak kuwi rekasa banget.

¹⁷Bareng enggoné nglairké anak nganti rekasa kuwi, dukuné bayi terus ngomong: “Sampéyan aja wedi, awit sampéyan bakal nduwé anak lanang menèh.”

¹⁸Waktu sak durungé ninggal ndonya, awit pungkasané ninggal ndonya anaké mau dijenengaké Bèn-Oni, nanging bapaké njenengaké Bényamin.

¹⁹Mengkono enggoné Rahèl ninggal ndonya, terus dikubur ing pinggir dalan sing nuju nang Efrata, ya kuwi Bètléhèm.

²⁰Yakub ngedekké tugu ing kuburané, ya kuwi tengerané kuburané Rahèl nganti sepréné.

²¹Sakwisé kuwi Israèl terus budal lan masang tarupé ing sabrangé Migdal-Eder.

²²Waktu Israèl manggon ing kono, kelakon Rubèn tyampur turu karo Bilha, wayuhé bapaké, perkara kuwi dikrungu Israèl. Anak-anaké Israèl rolas.

²³Anaké Léa ya kuwi Rubèn mbarepé Yakub, terus Siméon, Lévi, Yéhuda, Isakar lan Sébulon.

²⁴Anaké Rahèl: Yosèf lan Bényamin.

²⁵Anaké Bilha baturé wadon Rahèl: Dan lan Naftali.

²⁶Anaké Silpa baturé wadon Léa: Gad lan Asyèra. Kuwi kabèh anaké lanang Yakub sing dilairké ing Padan-Aram.

²⁷Yakub terus nemoni Isak, ana Mamré ing sak tyedaké Kiryat-Arba, ya kuwi Hébron, panggonan tarupé Abraham lan Isak enggoné pada dadi wong mantya.

²⁸Umuré Isak nyandak 180 taun.

²⁹Isak terus ninggal ndonya, terus dikumpulké karo para leluhuré; wis tuwa lan tentrem uripé, terus dikubur karo Esau lan Yakub.