Read Caribbean Javanese Wiwitan 4 Bible Online

Wiwitan 4 - Caribbean Javanese bible

Wiwitan 4

¹Manungsa kuwi terus nuroni Eva, bojoné, terus meteng lan nglairké Kain, tembungé Eva: “Aku wis olèh anak lanang sangka pitulungan GUSTI.”

²Sakwisé kuwi terus nglairké Abel, adiké Kain; Abel mau dadi pangon wedus lan Kain dadi wong tani.

³Ing sakwijiné waktu Kain masrahaké kurban marang GUSTI rupa pametuné bumi;

⁴uga Abel ya masrahaké kurban rupa kéwan mbarep sing apik déwé. GUSTI seneng marang Abel lan kurbané,

⁵nanging Kain lan kurbané ora diajèni Gusti. Jalaran sangka kuwi atiné Kain panas banget lan peteng praupané.

⁶GUSTI terus ngetokké tembung marang Kain: “Kenèng apa atimu panas lan kenèng apa praupanmu peteng?

⁷Yèn kowé gawé apik praupanmu bakal padang? Nanging yèn kowé ora gawé apik, dosa wis ngintyeng ing ngarep lawang lan banget enggoné nggoda kowé, nanging kowé kudu bisa menangké.”

⁸Kain terus ngomong marang Abel adiké: “Hayuk kita pada menyang ara-ara kana.” Nanging bareng tekan ing ara-ara, Kain terus ngantem Abel lan dipatèni.

⁹GUSTI terus takon marang Kain: “Abel, adikmu ana ngendi?” Semauré: “Kula ora ngerti, apa kula sing momong adik kula?”

¹⁰Tembungé GUSTI: “Penggawé apa sing kok lakoni? Getihé adikmu Abel sambat marang Aku sangka bumi.

¹¹Saiki kowé kena paukuman dibuwang adoh sangka bumi sing wis mangap tyangkemé nadahi getihé adikmu sangka tanganmu.

¹²Yèn kowé ngolah bumi, pametuné ora bakal sak mestiné, kowé bakal kaya wong mblayu lan nglembara ing bumi.”

¹³Kain terus ngomong marang GUSTI: “Paukuman kula kuwi gedé banget nganti kabotan kula nyangga.

¹⁴Gusti saiki wis nundung kula sangka kéné, lan kula bakal ketutupan sangka mripaté Gusti, kula bakal dadi wong sing mblayu lan nglembara ing bumi; kula terus bakal dipatèni karo sapa waé sing kepetuk karo kula.”

¹⁵Nanging tembungé GUSTI: “Babar pisan ora! Sapa sing matèni Kain, bakal kewales tikel pitu.” Kain terus dikèki tenger karo GUSTI supaya aja nganti dipatèni karo sapa waé sing metuki.

¹⁶Kain terus lunga sangka ngarepé GUSTI, lan manggon ing negara Nod, wétané Eden.

¹⁷Kain nuroni bojoné, terus meteng, lan nglairké Hénokh; sakwisé mengkono Kain terus mbangun kuta, kuta mau dijenengaké Hénokh, kaya jenengé anaké.

¹⁸Hénokh nurunké Irad, Irad nurunké Mekuyaèl, Mekuyaèl nurunké Métusalah. Métusalah nurunké Lamèk.

¹⁹Lamèk nduwé bojo loro, sing siji jenengé Ada, sijiné Sila.

²⁰Ada nglairké Yabal, kuwi dadi leluhuré wong sing pada manggon ing tarup lan ngingu kéwan-kéwan.

²¹Adiké jenengé Yubal, kuwi dadi leluhuré para siter lan suling.

²²Sila uga nglairké anak ya kuwi Tubal-Kain, leluhuré para tukang tembaga lan pandé wesi, lan adiké Tubal-kain mau wadon, jenengé: Naama.

²³Lamèk mau ngomong marang bojoné loro: “Ada karo Sila, rungokna tembungku, hé bojoné Lamèk, rungokké omongku iki: Wong sing natoni aku wis tak patèni, mengkono uga wong nom sing natoni aku.

²⁴Awit yèn Kain kudu diwaleské tikel pitu, Lamèk kudu diwaleské tikel pitung puluh pitu.”

²⁵Adam nuroni bojoné menèh, terus nglairké anak lanang sing dijenengaké Sèt, awit tembungé: “Gusti Allah wis ngekèki anak lanang liyané kanggo gantiné Abel, sing wis dipatèni Kain.”

²⁶Sèt uga nduwé anak lanang, dijenengaké Enos. Wiwit waktu kuwi wong pada wiwit nyebut asmané GUSTI.