Read Caribbean Javanese Wiwitan 40 Bible Online

Wiwitan 40 - Caribbean Javanese bible

Wiwitan 40

¹Sakwisé lelakon mau, juru ombèn lan juru panganan ratuné Egipte pada nggawé kliru marang ratu, ya kuwi ratu ing Egipte mau.

²Nganti banget nesuné Parao marang pegawéné kraton mau, marang juru ombèn lan juru panganan kuwi.

³Loro-loroné pada diukum ing omahé penggedéné suradadu ing tunggal pakunjara karo Yosèf.

⁴Penggedéné suradadu mau terus ngangkat Yosèf ngladèni wong paukuman loro mau. Kaya mengkono wong loro mau enggoné diukum nganti rodok suwé.

⁵Ing sakwijiné mbengi wong loro mau pada ngimpi, impèné déwé-déwé, ya kuwi juru ombèn lan juru panganan ratuné Egipte sing pada diukum ing pakunjara kono, enggoné ngimpi tunggal sewengi, lan tegesé impèn ya béda-béda.

⁶Waktu ésuké Yosèf teka mrana, terus weruh yèn loro-loroné ijik pada sedih atiné.

⁷Yosèf terus takon marang pegawéné Parao sing pada diukum tunggal sak pakunjara karo dèwèké ing omahé bendarané kuwi, tembungé: “Kenèng apa dina iki sampéyan kok pada kétok sedih ngono?”

⁸Semauré wong loro mau: “Awaké déwé pada ngimpi, nanging ora ana wong sing bisa nerangaké tegesé.” Tembungé Yosèf marang wong-wong mau: “Sing bisa nerangaké impèn kuwi mung Gusti Allah? Tyritakké, impèn kuwi marang kula!”

⁹Juru ombèn terus nyritakké impèné marang Yosèf, omongé: “Ing sak njeruhné impèn aku weruh wit anggur ana ngarepku.

¹⁰Wit anggur kuwi ana pangé telu, ijik waé enggoné semi, terus ya metu kembangé lan dompolané pada ngetokké woh sing mateng-mateng.

¹¹Lan gelas ngombéné Parao ing tanganku, woh anggur mau terus tak jupuk lan tak peres ing gelas ngombéné Parao lan gelasé terus tak suguhké ing tangané Parao.”

¹²Tembungé Yosèf: “Tegesé impèn iki ngéné: Pangé telu kuwi telung dina,

¹³ing njeruhné telung dina kuwi Parao bakal ngluwari sampéyan, lan mbalèkké penggawéan sampéyan sing mbiyèn, nganti sampéyan bakal ngladèkké gelas ombèn marang Parao kaya mbiyèn, nalika sampéyan kerja dadi juru ombèn.

¹⁴Nanging, éling marang kula yèn sampéyan wis olèh kepénak, supaya gelem ngétokké matur kesuwunmu marang kula, karo tyara nyritakké perkara kula iki marang Parao, lan njaluk tulung supaya kula ditoké sangka omah iki.

¹⁵Awit kula iki dityolong ditawan ngono waé sangka negarané wong Ibrani, lan ing kéné kula ora naté nandangi apa-apa, sing njalari kula pantes dilebokké ing omah tutupan iki.”

¹⁶Juru tukang panganan bareng krungu yèn enggoné negesi apik, terus ngomong marang Yosèf: “Aku ya uga ngimpi, kétoké aku nyunggi tampah susun telu isi panganan.

¹⁷Tampah sing nduwur isi panganan werna-werna kanggo Parao, sing diolah tukang masak; nanging tampah sing tak sunggi mau isiné terus dipangani manuk.”

¹⁸Yosèf terus nyauri: “Mengkéné tegesé impèn iki! Tampah susun telu ya telung dina.

¹⁹Ing njeruhné telung dina iki Parao bakal ngunggahké sampéyan menyang panggonan sing duwur, sampéyan bakal digantung ing tyagak, lan manuk-manuk bakal mangan daging sampéyan.”

²⁰Bareng telung dina, waktu dina lairé Parao, dèkné nganakké pésta kanggo para pegawéné, kabèh juru ombèn lan juru panganan pada diluhurké ing sak tengahé para abdi.

²¹Juru ombèn dibalèkaké pangkaté sing lawas, dadi kelakon masrahaké gelas ombèn marang tangané Parao menèh.

²²Nanging juru panganan digantung, tyotyok kaya enggoné negeské Yosèf marang para juru mau.

²³Nanging juru ombèn kuwi ora kèlingan marang Yosèf, nanging lali.