Read Caribbean Javanese Wiwitan 45 Bible Online

Wiwitan 45 - Caribbean Javanese bible

Wiwitan 45

¹Yosèf wis ora kuwat ngempet rasané atiné ing ngarepé para seduluré. Mulané wong-wong pada dikongkon metu sangka kamar kono supaya bisa ngomong blaka waé karo sedulur-seduluré mau.

²Bareng para abdi wis pada metu Yosèf terus nangis banter banget, nganti wong Egipte pada krungu, lan ngomongké marang Parao.

³Tembungé Yosèf marang para seduluré: “Aku iki Yosèf, bapak apa ijik urip?” Nanging para seduluré pada ora bisa nyauri tembungé, awit sangka wedi lan geter ing ngarepé.

⁴Yosèf terus ngomong menèh marang para seduluré: “Pada majua ta, nyedaka mréné!” Terus pada maju. Lan diomongi menèh: “Aku iki Yosèf adikmu, sing pada kok edol menyang negara Egipte.

⁵Nanging saiki aja pada susah lan aja nggetuni penggawému, awit sangka enggonmu wis ngedol aku mréné, awit Gusti Allah sing ngutus aku ndisiki kowé supaya mitulungi neruské urip.

⁶Awit negara kéné iki enggoné katekan pailan wis rong taun, nanging bakalé ijik limang taun menèh ora ana wong ngluku utawa panèn.

⁷Mulané Gusti Allah ngutus aku ndisiki kowé, supaya turunanmu bisa tetep ing bumi iki lan supaya kowé ketulungan uripmu, dadiné brayatmu sak bagéan gedé bisa ketulungan.

⁸Dadiné duduk kowé sing ngongkon aku mréné, nanging Gusti Allah, ya Panjenengané sing mernahké aku dadi bapaké Parao, lan ngrumat sak kraton kabèh uga ngwasani negara Egipte kabèh.

⁹Gelisa pada bali menyang ngarepé bapak, lan ngomonga mengkéné: ‘Pawelingé anakmu Yosèf ngéné: Gusti Allah wis ngangkat kula dadi sing ngwasani sak tanah Egipte kabèh, saiki kula njaluk teka menyang panggonan kula, aja ngentèni apa-apa.

¹⁰Bapak kula njaluk manggon ing negara Gosèn tyedak karo kula, ya bapak uga anak putuné, wedusé lan sapi lan kabèh duwèké bapak.

¹¹Kula sing bakal nyukupi kabèh kebutuhané bapak, awit pailan iki ijik limang taun menèh suwéné, supaya bapak sak brayat aja nganti tiba dadi mlarat, uga kabèh wong sing mèlu bapak.

¹²Kowé lan adikku Bényamin wis pada weruh déwé, yèn sing ngomongi kowé kabèh iki aku déwé.

¹³Awit sangka kuwi bapakku omongana bab kaluhuranku ing negara Egipte kéné, lan sembarang sing wis pada kok deleng terus gelisa bapakku gawanen mréné!”

¹⁴Adiké Bényamin terus dirangkul guluné karo nangis, lan Bényamin ya nangis ing tangané Yosèf.

¹⁵Yosèf terus ngambungi lan ngrangkuli para seduluré karo nangis. Sakwisé mengkono para seduluré ijik pada gunemané karo Yosèf.

¹⁶Waktu ing kratoné Parao krungu kabar, yèn seduluré Yosèf pada teka, ditampa apik karo Parao lan para pegawéné.

¹⁷Parao terus ngomong marang Yosèf: “Ngomonga marang para sedulurmu, pada nandangi mengkéné: Kéwan-kéwanmu pada momotana lan terus muliha menyang negara Kanaan,

¹⁸bapakmu lan brayatmu pada boyongen lan digawa mréné, aku bakal ngekèki apa sing apik déwé ing negara Egipte, kowé bakal pada ngrasakaké kemakmurané negara kéné.

¹⁹Sak terusé kowé nampa préntah supaya kongkona mengkéné marang wong-wong mau: Pada nglakoni mengkéné: Nggawaa kréta sangka negara Egipte kanggo anak-anakmu lan bojomu, bapakmu kowé mapakka mbrana, lan terus tekaa mréné!

²⁰Uga menèh kowé aja pada éman ninggal barang-barangmu, awit apa sing apik déwé ing negara Egipte iki bakal dadi duwèkmu.”

²¹Para anaké Israèl terus pada nglakoni mengkono, lan pada dikèki kréta lan Yosèf manut préntahé Parao, uga pada dikèki sangu kanggo ing dalan.

²²Uga menèh siji-sijiné dikèki sandangan sak pasang lan Bényamin dikèki duwit slaka 300 lan sandangan limang pasang.

²³Kejaba kuwi bapaké ya dikirimi kimar lanang sepuluh, dimomoti barang-barang sing apik déwé ing Egipte, uga kimar wédok sepuluh, dimomoti gandum, roti lan sangu liyané kanggo bapaké ing dalan.

²⁴Seduluré terus pada dililani budal, lan diweling mengkéné: “Ing dalan aja pada tutuh-tutuhan!”

²⁵Kaya mengkono enggoné pada budal sangka negara Egipte terus tekan ing negarané Kanaan, ing ngarepé Yakub bapaké.

²⁶Terus pada tyrita, tembungé: “Yosèf ijik urip, malah dadi penggedé ngwasani sak tanah Egipte kabèh!” Nanging Yakub ora ngrèwès, awit ora ngandel karo tembungé para anaké.

²⁷Nanging bareng wis dikèki sakkèhé pawelingé Yosèf, lan bareng weruh kréta kirimané Yosèf kanggo metuk, semangaté Yakub, bapaké dadi pulih menèh.

²⁸Israèl terus ngomong: “Wis tyukup, anakku Yosèf ijik urip! Aku arep budal lan kepéngin ketemu sak durungé aku mati.”