Read Caribbean Javanese Wiwitan 46 Bible Online

Wiwitan 46 - Caribbean Javanese bible

Wiwitan 46

¹Israèl terus budal uga sak duwèké kabèh, bareng mlakuné tekan ing Bèrsyéba terus masrahaké kurban sing dibelèh marang Gusti Allahé bapaké Isak.

²Gusti Allah ngetokké tembung marang Israèl sak njeruhné weweruh ing wantyi mbengi, préntahé: “Yakub, Yakub!” Semauré: “Kula iki, kula.”

³Tembungé Gusti Allah: “Aku iki Gusti Allah, ya Gusti Allahé bapakmu, kowé aja wedi lunga menyang Egipte, awit ing kana kowé bakal Tak dadèkké bangsa sing gedé.

⁴Aku déwé sing ngantyani mlakumu menyang Egipte lan uga sing bakal nuntun mlakumu bali menèh, uga tangané Yosèf sing bakal nutupké mripatmu.”

⁵Yakub terus lunga sangka Bèrsyéba, lan para anaké Israèl sing ngejak Yakub bapaké, kabèh brayaté déwé-déwé numpak kréta kirimané Parao sing dienggo mapak.

⁶Uga ya pada nggawa ingon-ingoné lan barang duwèké, olèh-olèhé ing negara Kanaan. Terus kabèh pada tekan ing negara Egipte, ya kuwi Yakub lan turunané kabèh, pada bebarengan karo dèkné.

⁷Para anak lan putuné lanang lan wadon, turunané kabèh pada diboyong menyang negara Egipte.

⁸Iki jenengé para anaké Israèl sing pada teka ing Negara Egipte, ya kuwi Yakub lan para turunané: Anak mbarepé Yakub kuwi Rubèn.

⁹Anak-anaké Rubèn: Hénokh, Palu, Hèsron lan Karmi.

¹⁰Anak-anaké Siméon: Yemuèl, Yamin, Ohad, Yakin lan Sohar, lan Saul anaké wong wadon Kanaan.

¹¹Anak-anaké Lévi: Gèrson, Kéhat lan Mérari.

¹²Anak-anaké Yéhuda: Er, Onan, Sela, Pèrès lan Serah, nanging Er lan Onan wis pada mati ing negara Kanaan; lan anak-anaké Pèrès ya kuwi: Hèsron lan Hamul.

¹³Anak-anaké Isakar: Tola, Puah, Ayub lan Simron.

¹⁴Anak-anaké Sébulon ya kuwi: Sered, Elon lan Yahléèl.

¹⁵Kuwi mau para turunané Ibuné Léa patutan sangka Yakub ing Padan-Aram, semono uga Dina anaké wadon. Dadi anak putuné lanang wadon kuwi gunggungé kabèh telung puluh telu.

¹⁶Anak-anaké Gad ya kuwi: Sifyon, Hagi, Syuni, Esbon, Eri, Arodi lan Arèli.

¹⁷Anak-anaké Asyèra ya kuwi: Yimna, Yiswa, Yiswi lan Beria, lan seduluré wadon jenengé: Sérah. Anak-anaké Beria ya kuwi: Hèbèr lan Malkièl.

¹⁸Kuwi mau anak lanang Silpa, wayuh enggoné ngekèki Laban marang anaké wadon Léa; dadi Silpa enggoné patutan karo Yakub kuwi gunggungé nembelas.

¹⁹Anaké Rahèl bojoné Yakub, ya kuwi: Yosèf lan Bényamin.

²⁰Yosèf ing Egipte nduwé anak Manasé lan Efraim, patutan karo Asnat anaké wadon Potifera imam ing On.

²¹Anak-anaké Bényamin ya kuwi: Béla, Beker, Asybèl, Géra, Naaman, Eki, Ros, Mupim, Hupim lan Ared.

²²Kuwi para anaké Rahèl patutan sangka Yakub, kabèh gunggungé jiwa patbelas.

²³Anaké Dan: Husim.

²⁴Anak-anaké Naftali ya kuwi: Yahzéèl, Guni, Yézèr lan Silèm.

²⁵Kuwi anak putuné Bilha, ya kuwi wayuh enggoné ngekèki Laban marang Rahèl, anaké wadon; dadi Bilha olèhé patutan karo Yakub kuwi gunggungé pitu.

²⁶Sakkèhé wong sing mèlu Yakub menyang Egipte, ya kuwi para anaké, kejaba bojoné para anaké, kabèh gunggungé suwidak enem jiwa.

²⁷Uga anaké Yosèf sing lair ing negara Egipte kuwi tyatyahé loro. Dadi brayaté Yakub sing teka ing negara Egipte kuwi kabèh gunggungé pitung puluh jiwa.

²⁸Yéhuda diutus karo Yakub ndisiki terus nemoni Yosèf, supaya Yosèf nemoni bapaké ing negara Gosèn. Terus mlakuné pada tekan ing negara Gosèn.

²⁹Yosèf terus ngongkon ngrakit krétané lan lunga metuk Israèl menyang Gosèn. Bareng wis ketemu karo bapaké, terus ngrangkul guluné lan nangis ing tangané Yakub.

³⁰Israèl terus ngomong marang Yosèf: “Wis, saiki aku trima mati, awit wis bisa nyawang kowé lan weruh yèn kowé ijik urip.”

³¹Yosèf terus ngomong marang para seduluré lan marang brayaté bapaké: “Aku tak ngadep marang Parao, ngekèki weruh: Seduluré kula lan brayaté bapak kula, sing manggon ing negara Kanaan, wis pada teka ing panggonan kula.

³²Wong-wong kuwi penggawéané pada angon wedus, awit pada ngingu kéwan-kéwan, lan wedusé sapiné, lan kabèh barang duwèké wis pada digawa.

³³Ya mengkono kuwi yèn kowé dityeluk Parao lan ditakoni: Penggawéanmu apa?

³⁴Kowé kudu ngomong: Abdimu iki pada ngingu kéwan-kéwan wiwit tyilik nganti saiki, ya kula, ya para leluhuré kula. Kuwi supaya kowé pada dililani manggon ing lemah Gosèn. Awit wong Egipte kuwi nganggep ora apik marang kabèh pangon wedus.”