Read Caribbean Javanese Wiwitan 49 Bible Online

Wiwitan 49 - Caribbean Javanese bible

Wiwitan 49

¹Sakwisé mengkono Yakub terus nyeluk para anaké lan ngomong: “Pada nglumpuka, kowé arep tak omongi apa sing bakal kok alami mbésuk sing bakal kelakon.

²Pada nglumpuka lan rungokna, hé para anaké Yakub, rungokna tembungé Israèl bapakmu.

³Rubèn, kowé kuwi mbarepku, kekuwatanku lan wiwitan kekuwatanku, sing luwih ing kaluhuran, sing luwih ing kapinteran,

⁴sing mbludak kaya banyu, nganti wurung enggonmu dadi sing gedé déwé, awit kowé wis ngunggahi peturoné bapakmu; waktu kuwi kowé ngrusak kesutyiané. Peturonku diunggahi.

⁵Siméon lan Lévi kuwi pada sedulur, gamané kanggo gawé meksa.

⁶Nyawaku aja nganti katut ing rembukané, atiku aja mèlu marang paguyupané, awit sangka nesuné, nganti pada matèni wong lan sangka ngamuké pada ngetoki ototé dengkulé sapi.

⁷Nesuné kenaa ing bebendu, awit nesuné kuwi kebangeten, kenaa ing bebendu brangasané, awit kuwi tanpa guna. Pada arep tak pentyar ing antarané turunané Yakub lan tak sebar ing antarané turunané Israèl.

⁸Yéhuda, kowé kuwi bakal dilem karo sedulur-sedulurmu, tanganmu bakal nyekeli gitoké mungsuhmu, anak-anaké bapakmu bakal pada mbungkuk ing ngarepmu.

⁹Yéhuda kuwi kaya anak singa, sakwisé nubruk memangsané, terus munggah ing panggonan sing duwur, anakku! Ijik ndekem lan njerum kaya anak singa lanang utawa kaya singa wadon, sapa sing wani nangèkké?

¹⁰Tekené kraton bakal ora ngalih sangka Yéhuda, utawa lambangé pemrintahan sangka antarané sikilé, nganti tekané Silo, sing bakal disujuti bangsa-bangsa.

¹¹Kimaré bakal dityentyang ing wit anggur lan kimaré ing wit anggur pilihan. Sandangané dikumbah nganggo anggur lan jubahé ing abangé woh anggur.

¹²Mripat abang karo kekuwatané anggur lan untuné putih karo kekuwatané mèlek.

¹³Sébulon bakal manggon ing pinggir segara, bakal dadi pelabuhané kapal, tapel watesé ing panggonané Sidon.

¹⁴Isakar kuwi kaya kimar sing kuwat balungé, sing ndekem diapit ing momotané,

¹⁵bareng weruh yèn panggonan lèrèné kepénak lan negarané nyenengké, terus dipapanké gegeré terus nggawa momotan, sak terusé dadi wong sing kena ing penggawéan peksa.

¹⁶Dan kuwi bakal ngadili bangsané kaya salah sijiné taler Israèl.

¹⁷Supaya Dan kuwi kaya ula ing dalan, kaya ula upas ing dalan sing nyokot tungkaké jaran, nganti sing numpak tiba nggeblak.

¹⁸Duh GUSTI, kula njagakké keslametan sing sangka Panjenengan.

¹⁹Gad kuwi bakal diserang karo grombolan, nanging bakal gentèn nyerang tungkaké.

²⁰Kanggo Asyèr kuwi pangané bakal lubèr-lubèr, malah bakal ngladèni pangané ratu-ratu.

²¹Naftali kuwi kaya kidang wadon alasan, kuwi bakal nglairké tetembungan sing apik-apik.

²²Yosèf kuwi kaya wit wowohan sing nom, wit wowohan sing nom ing pinggir sumber. Pangé pada ngungkuli pager témbok.

²³Senajan panah-panahé nggoda, pada manah lan nyerang,

²⁴nanging panahé tetep kentyeng, lan tangané pada tetep tyepet awit sangka pitulungan Sing Mahakwasa, Kekuwatané Yakub, awit sangka pangoné Gunung Watu Israèl,

²⁵awit sangka Gusti Allahé bapakmu sing bakal mitulungi kowé, lan awit sangka Sing Mahakwasa sing mberkahi kowé, karo berkah sing lubèr sangka langit nduwur, berkah sangka telengé segara sing ana ngisor, berkah sangka susu lan weteng.

²⁶Berkahé bapakmu kuwi ngungkuli berkahé gunung-gunung wiwit jaman mbiyèn, ya kuwi sing luwih karo sedepé ing puntuk-puntuk sing wis pirang-pirang abad anané; kabèh mau bakal mudun ing sirahé Yosèf, ing embun-embunané wong sing gedé ing antarané para seduluré.

²⁷Bényamin kuwi kaya asu alasan nubruk, ing wantyi ésuk mangan memangsané lan ing wantyi soré ngedum rayahané.”

²⁸Kuwi kabèh taleré Israèl, tyatyahé rolas; lan ya kuwi mau sing diomong karo bapaké, waktu pada diberkahi; siji-siji dikèki berkah déwé-déwé.

²⁹Sakwisé mengkono Yakub terus meling marang para anak putuné: “Yèn aku wis diklumpukké karo para leluhurku, aku kuburen tyampur karo para leluhurku ing guwa ing ara-ara duwèké Efron wong Hèt,

³⁰guwa ing ara-ara Mahpéla wétané Mamré ing negara Kanaan, sing wis dituku karo Abraham sangka Efron wong Hèt mau, kanggo kuburan duwèké.

³¹Ya ing kono dikubur Abraham lan Sara bojoné, ya ing kono dikubur Isak lan Ibuné Ribka bojoné,

³²lan uga ing kono enggonku ngubur Léa. Ara-ara kabèh guwané ing kono kuwi wis dituku sangka wong turunané Hèt.”

³³Sakwisé Yakub rampung enggoné meling marang para anaké, terus ngunggahké sikilé ing ambèné, terus mati, diklumpukké karo para leluhuré.