Read Caribbean Javanese Wiwitan 6 Bible Online

Wiwitan 6 - Caribbean Javanese bible

Wiwitan 6

¹Nalika manungsa wis wiwit tambah-tambah ing bumi lan pada nduwé anak wadon,

²para anak Gusti Allah bareng weruh anaké wadon para manungsa kuwi pada ayu-ayu, banjur pada ngepèk bojo karo endi sing disenengi.

³Ing kono tembungé GUSTI: “Roh-Ku ora bakal selawasé manggon karo manungsa, awit uripé mung nuruti daging, mulané sak terusé umuré mung bakal 120 taun.”

⁴Waktu semono ing bumi ana bangsa sing pawakané gedé duwur; sakwisé kuwi ya ana, para anak Gusti Allah pada nuroni anaké wadon para manungsa lan kuwi pada nduwé anak, ya kuwi para wong sing gagah rosa-rosa ing jaman mbiyèn sing jenengé kesuwur.

⁵Bareng GUSTI ngerti yèn gedé dosané para manungsa ing bumi, lan sak obahé atiné sakjeké urip mung ala waé,

⁶ing kono GUSTI getun nggawé manungsa ing bumi lan nyedihké ati-Né.

⁷Tembungé GUSTI: “Manungsa sing wis Tak gawé kuwi bakal Tak entèkké sangka lumahé bumi, manungsa kabèh kéwan-kéwan ingon-ingon, uga kéwan-kéwan mbrangkang, lan manuk ing awang-awang pisan; awit Aku getun enggon-Ku nggawé.”

⁸Nanging Noah kuwi olèh kawelasan ing ngarepé GUSTI.

⁹Iki sejarahé Noah. Noah kuwi wong bener tanpa tyiri ing antarané para wong sak jamané. Uripé mbangun turut marang Gusti Allah.

¹⁰Noah nduwé anak lanang telu: Sèm, Ham lan Yafèt.

¹¹Bumi kuwi ing ngarepé Gusti Allah kétok wis rusak lan kebak penggawé ala.

¹²Gusti nyawang bumi, tenan-tenan wis rusak banget, awit sak rupané sing urip wis pada mblarah mlakuné ing bumi.

¹³Gusti terus ngetokké tembung marang Noah: “Aku wis mutusi bakal mungkasi kabèh sing urip, lan kabèh manungsa awit bumi wis pada dikebaki penggawé ala; mulané bakal Tak entèkké bareng karo bumi.

¹⁴Kowé nggawéa kapal kanggo kowé, sing digawé sangka kayu gofir, kapalé gawénen singget-singgetan, lan ing njabané lan njeruhné osèrana aspal sing kentel.

¹⁵Enggonmu nggawé kuwi mengkéné: dawané kapal telung atus éluh, ambané sèket éluh, duwuré telung puluh éluh.

¹⁶Kapalé dikèki tyendéla mubeng, leté sak éluh sangka payoné, lawangé sèlèhna ing awaké kapal. Enggonmu gawé kapal sungsun-sungsun, ngisor, tengah lan nduwur.

¹⁷Awit Aku bakal nekakké banjir sing ngelepi bumi, kanggo ngentèkké sak rupané sing urip lan nyawa ing sak ngisoré langit; sak kabèhé ing bumi bakal mati.

¹⁸Nanging karo kowé Aku gelem nggawé perjanjian-Ku, kowé bakal mlebu ing kapal kuwi, lan anakmu, bojomu lan bojoné anak-anakmu.

¹⁹Uga samubarang sing urip, sak rupané daging, kuwi gawanen mlebu ing kapal sak jodo-sak jodo, supaya pada bisa urip bareng karo kowé; lanang lan wédok.

²⁰Werna-werna manuk lan kéwan-kéwan nusoni, uga werna-werna kéwan-kéwan sing mbrangkang ndlosor lan nggremet ing bumi, kuwi saben sak jodo sing bakal nekani kowé supaya bisa urip.

²¹Sak terusé kowé nglumpukna samubarang sing kena dipangan, digawé kanggo panganmu lan pangané kéwan-kéwan kuwi mau kabèh.”

²²Noah terus nandangi kabèh, manut apa préntahé Gusti Allah.