Read Caribbean Javanese Wiwitan 7 Bible Online

Wiwitan 7 - Caribbean Javanese bible

Wiwitan 7

¹Sakwisé mengkono GUSTI terus ngetokké tembung marang Noah: “Kowé lan brayatmu kabèh pada mlebua ing kapal, awit kowé kuwi sing Tak sawang ketemu resik ing antarané wong jaman iki.

²Sak rupané kéwan-kéwan sing halal njupuka pitung jodo, lanang lan wédok, kéwan-kéwan sing ora halal kuwi mung sak jodo, lanang lan wédok.

³Uga manuk ing awang-awang ya pitung jodo, lanang lan wédok, supaya kena kanggo bibit ing sak lumahé bumi.

⁴Awit pitung dina engkas, Aku bakal nekakké udan ing bumi suwéné patang puluh dina patang puluh mbengi, lan kabèh sing Tak gawé bakal Tak entèkké sangka sak lumahé bumi.”

⁵Noah terus nandangi apa préntahé GUSTI kabèh.

⁶Waktu tekané banjir gedé sing ngelepi bumi, umuré Noah 600 taun.

⁷Noah terus mlebu ing kapal bareng karo anak-anaké, lan bojo uga bojoné para anaké, awit sangka tekané banjir mau.

⁸Kéwan-kéwan sing halal lan sing ora halal uga manuk lan kabèh sing mbrangkang, ndlosor lan nggremet ing bumi,

⁹kuwi pada mara nekani Noah ing kapal sak jodo-sak jodo, kaya sing dadi préntahé Gusti Allah marang Noah.

¹⁰Sakwisé pitung dina mau, banyuné banjir gedé ngelepi bumi.

¹¹Waktu umuré Noah wis nyandak 600 tauné, ing sasi kaping pindo tanggal pitulas, sakkèhé sumberé sak ngisoré bumi pada bedah lan jendélané langit pada mbukak,

¹²terus kelakon udan deres banget ing bumi suwéné patang puluh dina patang puluh mbengi.

¹³Ing dina kuwi uga Noah karo Sèm, Ham lan Yafèt para anaké, bojoné Noah lan bojoné para anaké pada munggah ing kapal,

¹⁴wong kuwi kabèh uga sakkèhé kéwan-kéwan werna-werna, kéwan-kéwan ingon-ingon lan sakkèhé kéwan-kéwan mbrangkang ndlosor lan nggremet ing bumi werna-werna, lan manuk-manuk ya kuwi kabèh sing karo wulu lan sewiwi.

¹⁵Kabèh sing urip lan sing nduwé nyawa mau pada nekani Noah mlebu ing kapal sak jodo-sak jodo.

¹⁶Sing pada nekani kuwi lanang lan wédok sangka sak rupané daging sing urip, kaya sing dipréntahké karo Gusti Allah marang Noah. Lan sakwisé mengkono lawangé kapal ditutup karo GUSTI ing sak mburiné Noah.

¹⁷Banjir gedé mau enggoné ngelepi bumi patang puluh dina; banyuné mundak gedé njalari kapalé keangkat mumbul sangka bumi.

¹⁸Banyuné mundak tambah lan mundak gedé ngidap-idapi ngungkuli bumi, kapalé kemampul ing nduwuré banyu.

¹⁹Mundaké banyuné luwih okèh banget rata sak lumahé bumi, nganti kelakon nutupi gunung-gunung sing duwur ing sak ngisoré langit.

²⁰Gunung-gunung mau ketutupan banyu sing mundak tambah kuwi nganti sepuluh mèter, dadiné gunung-gunung ketutupan banyu,

²¹lan sak rupané ing bumi pada mati kabèh: manuk, kéwan ingon-ingon, galak alasan, sak rupané kéwan mbrangkang ndlosor lan nggremet sing kemroyok ing bumi, kabèh sakkèhé manungsa pada mati.

²²Kabèh pada mati, sembarang sing karo ambekané urip ing bolongan irungé, sapa ing daratan, kuwi pada mati kabèh.

²³Mengkono kedadiané sak rupané ing nduwuré bumi, pada dientèkké karo Gusti Allah, wiwit sangka manungsa tekan kéwan-kéwan mbrangkang ndlosor lan nggremet lan manuk ing awang-awang, pada dientèkké resik sangka bumi, mung Noah déwé sing ijik slamet lan kabèh sing katut ing kapal.

²⁴Banyuné tetep ngungkuli bumi suwéné nganti 150 dina.