Read Caribbean Javanese Wiwitan 8 Bible Online

Wiwitan 8 - Caribbean Javanese bible

Wiwitan 8

¹Gusti Allah terus éling marang Noah lan marang sak rupané kéwan-kéwan alasan lan kéwan-kéwan ingon-ingon sing pada mèlu ing kapal; lan Gusti Allah nekakké angin ing bumi, nganti banyuné lekas mudun.

²Uga sumberé sak ngisoré bumi lan jendélané langit pada ditutup, lan udan deres sangka langit terus terang,

³Lan banyuné sangka setitik mudun sangka bumi, dadi mundak angok sakwisé 150 dina mau.

⁴Waktu sasi kaping pitu tanggal kaping pitulas, kapalé kandas ing gunungan Ararat.

⁵Banyuné saya suda-suda nganti tekan sasi sepuluh. Bareng sasi sepuluh tanggal sepisan, putyuké gunung-gunung wiwit pada kétok.

⁶Bareng wis kelakon patang puluh dina, Noah mbukak jendélané kapal sing digawé,

⁷lan ngetyulké manuk gagak, mabur bola-bali nganti tekan asaté banyu sangka bumi.

⁸Sakwisé mengkono terus ngetyulké manuk dara, karepé kanggo ndelok apa banyuné wis mudun sangka nduwuré bumi,

⁹nanging awit darané ora olèh péntyloan kanggo tlapakan sikilé, mulané bali ing ngarepé Noah menyang kapal menèh, awit sak lumahé bumi ijik rata ketutupan banyu. Noah terus ngelungké tangané, manuk dara mau dilebokké menèh ing kapal.

¹⁰Terus ngentèni pitung dina menèh, darané terus dityulké sangka kapal.

¹¹Bareng wantyi soré dara mau bali karo nggondol godong saitun sing ijik seger ing tyutyuké; dadi Noah ngerti yèn banyuné wis arep asat sangka bumi.

¹²Sakwisé kuwi ngentèni menèh pitung dina, darané terus dityulké, nanging wis ora bali nang enggoné Noah menèh.

¹³Waktu umuré Noah genep 601 taun, ing sasi kaping pisan tanggal sepisan, banyuné wis asat sangka bumi. Noah terus mbukak payoné kapal, lan ngerti yèn lumahé bumi wis asat.

¹⁴Lan waktu sasi kaping pindo tanggal pitulikur buminé wis gasik.

¹⁵Gusti Allah terus ngetokké tembung marang Noah:

¹⁶“Kowé metua sangka kapal, kowé kabèh, bojomu, anakmu lanang lan bojoné anakmu lanang.

¹⁷Uga sak rupané kéwan-kéwan sing mèlu kowé, kabèh sing urip: manuk, kéwan-kéwan ingon-ingon, kéwan-kéwan sing mbrangkang ndlosor lan sing nggremet ing bumi, kuwi pada tokna bebarengan karo kowé; bèn pada tambah-tambah ing bumi lan nduwé turunan, tambah okèh ing bumi.”

¹⁸Noah terus metu karo para anaké, bojoné lan bojoné para anaké,

¹⁹uga sak rupané kéwan galak alasan, kéwan-kéwan sing ndlosor lan nggremet, lan kabèh manuk, ya sak rupané sing urip ing bumi kabèh sak jodo, pada metu sangka kapalé.

²⁰Noah terus nggawé mesbèh kanggo GUSTI, lan njupuk kéwan-kéwan ingon-ingon sing halal lan bangsa manuk sing halal dipasrahké dadi kurban obongan ing mesbèh.

²¹Bareng GUSTI mambu ambuné sedep, terus mikir mengkéné: “Ing sak terusé Aku ora bakal mbebendu bumi menèh jalaran sangka manungsa, awit sak obahé atiné manungsa kuwi dasar ala wiwit tyiliké; lan sak terusé Aku ora ngentèkké menèh marang sak rupané sing urip, kaya sing wis Tak tindakké.

²²Selawasé bumi ana, mesti bakal ora mandek waktuné nyebar lan panèn, waktu adem lan panas, ketiga lan rendeng, awan lan wengi.”