Read Caribbean Javanese Wiwitan 9 Bible Online

Wiwitan 9 - Caribbean Javanese bible

Wiwitan 9

¹Gusti terus mberkahi Noah lan para anaké, lan pada diomongi mengkéné: “Pada tangkar-tumangkara lan kebakana bumi.

²Sak rupané kéwan-kéwan ing bumi lan sak rupané manuk ing awang-awang kuwi bakal pada wedi marang kowé; kabèh kuwi pada kwasanana.

³Saben sing obah, sing urip kuwi dadia panganmu. Kuwi kabèh wis Tak wènèhké marang kowé; mengkono uga tetukulan sing ijo;

⁴mung daging sing ijik ana nyawané, getihé, kuwi aja kok pangan.

⁵Nanging kanggo getihmu déwé, ya kuwi nyawamu kuwi mesti Tak jaluk tanggung jawapé; kanggo kéwan-kéwan Tak jaluk tanggung jawapé, uga kanggo manungsa, Aku bakal njaluk tanggung jawapé nyawané pepadané manungsa.

⁶Sapa sing ngutahké getihé manungsa, mesti getihé bakal dikutahké karo manungsa, awit Gusti Allah nggawé manungsa kuwi pada karo gambaré Panjenengané piyambak.

⁷Kowé kuwi pada tangkar-tumangkara, nganti ora bisa diitung ing bumi, ya pada tambaha okèh.”

⁸Sak terusé Gusti ngetokké tembung marang Noah lan para anaké, mengkéné:

⁹“Aku nggawé perjanjian-Ku karo kowé lan karo turunanmu,

¹⁰uga karo kabèh sing urip sing mèlu kowé ing kapal: manuk, kéwan ingon-ingon lan kabèh kéwan alasan ing bumi sing mèlu kowé, sing wis pada metu sangka kapal, ya sak rupané kéwan-kéwan ing bumi.

¹¹Aku nganakké perjanjian-Ku karo kowé, sak terusé bakal ora kelakon menèh kabèh sing urip dientèkké karo banjir, lan bakal ora ana banjir gedé menèh sing ngentèkké bumi.”

¹²Gusti terus ngetokké tembungé: “Iki tandané perjanjiané sing Tak gawé ing antarané Aku lan kowé lan kabèh sing urip sing mèlu kowé, nganti turunanmu ing sak lawasé.

¹³Kluwung-Ku Tak pasang ing mendung, kuwi sing kanggo tanda perjanjian-Ku lan bumi.

¹⁴Yèn mbésuk Aku nglumpukké mendung ing sak nduwuré bumi, lan kluwung mau terus kétok ana mendung,

¹⁵ing kono Aku mesti bakal éling perjanjian-Ku sing ana antarané Aku lan kowé lan kabèh sing urip sing nduwé nyawa, nganti banyu ora bakal dadi banjir gedé menèh, sing ngentèkké kabèh sing urip.

¹⁶Yèn kluwung kétok ing mendung, kuwi bakal sing Tak sawang Aku terus éling ing perjanjian-Ku sing langgeng ing antarané Gusti Allah lan kabèh sing urip, ing bumi.”

¹⁷Terus Gusti Allah ngetokké tembung menèh marang Noah: “Ya iki tanda perjanjiané ing antarané Aku lan sak rupané kabèh ing bumi.”

¹⁸Para anaké Noah sing pada metu sangka kapal, ya kuwi: Sèm, Ham lan Yafèt. Ham kuwi bapaké Kanaan.

¹⁹Telu kuwi kabèh anaké Noah, lan awit sangka wong telu mau kabèh wong kesebar dadi sak jagat.

²⁰Noah miwiti nandur lan nggawé kebon anggur,

²¹nanging bareng ngombé angguré, terus mendem nganti wuda ing tarupé.

²²Bareng Ham, bapaké Kanaan, weruh bapaké wuda, terus nyritakké bab kuwi marang seduluré loro ing njaba.

²³Sèm lan Yafèt terus njupuk jubah, terus ditumpangké ing pundaké, karo mlaku mundur, praupané pada ditutupi, supaya ora nganti weruh wudané bapaké.

²⁴Bareng Noah tangi lan mendemé wis ilang, krungu bab tumindaké anaké ragil marang dèkné,

²⁵terus ngetokké tembung: “Kenaa ing paukuman Kanaan, dadia abdi-abdiné para seduluré.”

²⁶Terus ngetokké tembung menèh: “Pinujia GUSTI, Gusti Allahé Sèm, lan Kanaan kuwi dadia abdiné.

²⁷Gusti Allah njembarna panggonan kanggo Yafèt, lan manggona ing tarupé Sèm, lan Kanaan kuwi dadia abdiné.”

²⁸Sakwisé banjir gedé Noah ijik dikèki umuré 350 taun.

²⁹Dadi umuré Noah 950 taun, terus ninggal ndonya.