Read Caribbean Javanese 2 Samuèl 1 Bible Online

2 Samuèl 1 - Caribbean Javanese bible

2 Samuèl 1

¹Sakwisé matiné Saul, waktu Daved mulih sangka ngalahké wong Amalèk, lan manggon rong dina ing Siklag,

²ing dina kaping telu ana wong tunggalé suradadu-suradaduné Saul, sandangané suwèk-suwèk, lan sirahé diwur-wuri lemah. Bareng tekan ing ngarepé Daved, sujut ing lemah lan nyembah.

³Daved takon wong mau: “Sangka ngendi tekamu?” Semauré wong mau: “Kula mlayu sangka suradaduné Israèl.”

⁴Pitakoné menèh: “Kepriyé kabaré? Maraa aku tyeritanana!” Semauré: “Suradaduné wis pada mlayu sangka peperangan, ora mung tunggalé suradaduné waé sing ambruk mati, uga Saul lan Yonatan, anaké, uga pada mati.”

⁵Daved terus ngomong marang wong sing nggawa kabar kuwi: “Kepriyé ngertimu, yèn Saul lan Yonatan, anaké wis mati?”

⁶Semauré sing nggawa kabar mau: “Ketepakan kula ing pegunungan Gilboa; sangka kono kétok Saul léndèhan ing tumbaké, nanging diuyak kréta-kréta lan suradadu sing numpak jaran.

⁷Waktu nolèh nang mburi weruh kula, terus nyeluk kula, lan kula ngomong: Ya, bendara kula.

⁸Saul takon marang kula: Kowé sapa? Semaur kula: Kula wong Amalèk.

⁹Terus tembungé marang kula: Tekaa mréné, aku patènana, awit aku krasa kaku banget, nanging nyawaku ijik.

¹⁰Kula nyélaki Saul terus kula patèni, awit kula ngerti, yèn panjenengané mesti ora tetep urip, sakwisé tiba. Jamang sirahé lan gelang lengenné pada kula jikuk lan iki kabèh kula pasrahké ing ngarepé bendara kula.”

¹¹Daved terus nyuwèk-nyuwèk sandangané lan wong sing pada ngadep ing ngarepé ya pada nandangi mengkono.

¹²Uga pada nangis, enggoné pada nangis karo pasa nganti tekan mingslepé srengéngé, awit sangka Saul lan Yonatan anaké, awit sangka umaté GUSTI lan bangsa Israèl, jalaran pada mati karo pedang.

¹³Daved terus takon marang wong sing nggawa kabar mau: “Tekamu sangka ngendi?” Semauré: “Kula kuwi wong nglembara, wong Amalèk.”

¹⁴Daved terus ngomong marang wong mau: “Kepriyé? Apa kowé ora wedi ngangkat tanganmu matèni sing dijebatani karo GUSTI?”

¹⁵Daved terus nyeluk salah sijiné suradadu, préntahé: “Maraa réné, wong kuwi pedangen!” Suradadu mau terus medang wong kuwi, nganti mati.

¹⁶Lan Daved ngomong marang wong kuwi: “Getihmu mbayar marang awakmu déwé, awit tutukmu déwé nyeksèni nglawan awakmu déwé, awit omong: Kula matèni sing dijebatani karo GUSTI.”

¹⁷Daved mbengokké kidung tangisané kuwi awit sangka Saul lan Yonatan, anaké.

¹⁸Lan piyambaké ngekèki préntah mulangké kidung iki marang turunané Yéhuda; kuwi ketulis ing kitab Wong Jujur.

¹⁹Hé Israèl, wongmu sing apik déwé mati, mati ing pegununganmu! lan para pahlawané suradadumu pada entèk!

²⁰Kuwi aja dikabarké ing Gat, lan aja diomongké ing dalan-dalané Askélon, supaya para wong wadon ing Filistèn aja nganti pada seneng-seneng, lan para prawané wong sing ora sunat pada jingklak-jingklak.

²¹Hé gunung-gunung ing Gilboa, aja ana ebun utawa udan sing mudun, nibani kowé, duh lemah ara-ara sing nggawa kematian. Awit ing kono tamèngé para suradadu pada reget, tamèngé Saul sing ora mambu lenga jebatan.

²²Wong sing mati tanpa kutahé getih, lan para suradadu tanpa gajihé. Panahé Yonatan ora tau bali tanpa olèh gawé, pedangé Saul ora tau bali nglentung.

²³Saul lan Yonatan, wong sing ditrésnani lan wong sing grapyak, uripé lan matiné ora pisah. Dèkné tyepeté ngungkuli maburé manuk garuda, rosané ngungkuli singa.

²⁴Hé para botyah wadon ing Israèl, Saul tangisana, sing ndandani kowé karo sandangan sing apik, sangka bakalé kain abang, sing masang dandanan emas ing sandanganmu.

²⁵Kepriyé ta nanging para suradadu pada mati ing sak tengahé peperangan! Yonatan mati ing pegununganmu.

²⁶Kula ngrasaké susah awit sangka sampéyan, duh sedulur kula Yonatan; sampéyan rumaket banget marang kula; kanggo kula katrésnan sampéyan kuwi liwat nggumunaké tenimbang katrésnané wong wadon.

²⁷Kepriyé ta nanging para suradadu pada mati, lan gamané perang pada lebur!