Read Caribbean Javanese 2 Samuèl 10 Bible Online

2 Samuèl 10 - Caribbean Javanese bible

2 Samuèl 10

¹Sakwisé mengkono ratuné turunané Amon mati; lan Hanun, anaké, dadi ratu nggentèni bapaké.

²Daved terus ngomong: “Aku bakal kekantyan karo Hanun anaké Nahas, pada kaya bapaké sing wis kekantyan karo aku.” Mulané Daved terus kongkonan ngirim kabar béla sungkawa lantaran para pegawéné awit sangka matiné bapaké. Nanging bareng para pegawéné Daved tekan ing ngarepé turunané Amon,

³para penggedéné turunané Amon ngomong marang Hanun, ratuné: “Miturut penganggepmu, Daved kuwi apa bakal ngurmati bapakmu, nanging mung kongkonan abdi-abdiné sing ngomongké béla sungkawa kuwi? Apa ora nduwé karep bakal mriksa kuta iki lan ngindik bakal nglebur kuta, mulané Daved terus kongkonan para pegawéné marang ngarepé sampéyan?”

⁴Hanun terus ngongkon nyekel para kongkonané Daved, dikongkon nyukur jénggoté separo lan ngetok sandangané sangka tengah tekan ing bokongé, terus dityulké.

⁵Perkara iki dikabarké marang Daved, terus ngongkon mapak, awit para kongkonan kuwi pada ngalami kisinan banget. Daved ngomong: “Pada lèrèna ing Yériko, nganti jénggotmu pulih menèh, terus muliha!”

⁶Bareng turunané Amon weruh, yèn dimungsuhi Daved, terus kongkonan nyéwa wong Aram-Bet-Rekob lan wong Aram sangka Soba 20.000 suradadu daratan, sangka ratu negara Maaka wong 1000 lan sangka wong Tob 12.000.

⁷Waktu Daved krungu perkara kuwi, terus ngongkon marang Yoab supaya maju perang karo kabèh suradaduné lan para penggedéné.

⁸Turunané Amon terus nata perang ing ngarepé gapura; nanging wong Aram sangka Soba lan Rekob, uga para wong Tob lan Maaka pada ndéwé ing ara-ara.

⁹Bareng Yoab ngerti, yèn mungsuhé mbebayani kanggo dèkné sangka ngarep lan sangka mburiné, terus nglumpukké wong Israèl karo peng-pengan lan nata perang adu-arep karo suradadu Aram.

¹⁰Turahé sangka suradadu kuwi dipasrahké marang pimpinané Abisai, seduluré, sing nata perangé adu-arep karo suradaduné Amon.

¹¹Yoab terus meling: “Yèn aku kuwalahan nglawan suradadu Aram, kowé kudu ngréwangi aku, nanging yèn kowé kuwalahan ngadepi suradadu turunané Amon, aku bakal teka ngréwangi kowé.

¹²Sing kendel atimu lan hayuk pada nguwatké ati kita kanggo bangsa lan kuta-kutané Gusti Allah kita. Supaya GUSTI nandangana sing dadi karepé.”

¹³Yoab lan sak balané terus maju perang nglawan suradaduné Aram lan mungsuhé pada mblayu sangka ngarepé.

¹⁴Bareng suradadu turunané Amon weruh, yèn suradaduné Aram pada mblayu, ya terus pada mundur sangka ngarepé Abisai lan mlebu ing kuta. Sakwisé kuwi Yoab mulih, sakwisé nyerang marang turunané Amon lan terus wis teka ing Yérusalèm.

¹⁵Waktu suradaduné Aram weruh, yèn wis pada dikalahké karo suradaduné Israèl, terus pada nglumpuk.

¹⁶Hadadèzèr ngongkon marang suradaduné Aram ing sabrangé kali Efrat supaya maju perang, suradadu kuwi terus wis tekan ing Helam, dipimpin karo Sobak, penggedéné suradadu Hadadèzèr.

¹⁷Bareng bab kuwi dikabarké marang Daved, terus sakkèhé wong Israèl diklumpukké ing sabrangé laut Yordan, terus wis tekan ing Helam. Wong Aram pada nata perang adu-arep karo Daved lan terus perang nglawan piyambaké.

¹⁸Nanging suradaduné Aram pada mblayu sangka ngarepé suradaduné Israèl lan Daved matèni wong sangka suradaduné Aram: jaran kréta 700 lan suradaduné jaran 40.000. Sobak, penggedéné suradaduné Aram ketaton banget, nganti mati ngenggon.

¹⁹Bareng sakkèhé ratu sing wis dikalahké Hadadèzèr, yèn wis dikalahké suradaduné Israèl, terus pada ngajak rukunan karo wong Israèl lan pada teluk; sakwisé kuwi para wong Aram pada wedi ngréwangi marang wong turunané Amon menèh.