Read Caribbean Javanese 2 Samuèl 3 Bible Online

2 Samuèl 3 - Caribbean Javanese bible

2 Samuèl 3

¹Perangé antarané brayaté Saul lan brayaté Daved kedawa-dawa; Daved mundak suwé mundak kuwat, nanging brayaté Saul mundak ringkih.

²Para anaké lanangé Daved sing lair ing kuta Hébron, sing mbarep, patutan sangka Ahinoam, wong wadon sangka Yisreèl, asmané Amnon;

³anaké nomer loro, patutan sangka Abigail randané Nabal, wong Karmèl, asmané Kileab; anaké nomer telu jeneng Absalom, patutan sangka Maaka, anaké Talmai, ratu ing Gesur,

⁴anaké sing nomer papat, patutan sangka Hagit, asmané Adonia, anaké sing kaping lima, patutan sangka Abital, jenengé Sefatya,

⁵lan anaké sing kaping enem, patutan sangka Egla, jenengé Yitream. Kuwi kabèh anaké Daved sing lair ing Hébron.

⁶Sak suwéné ana peperangan antarané brayaté Saul lan brayaté Daved, Abnèr mundak gedé wibawané ing sak tengahé brayaté Saul.

⁷Saul duwé tinggalan bojoné wayuh jenengé Rispa, anaké wadon Aya. Isybosèt ngomong marang Abnèr: “Kenèng apa sampéyan kok ngumpuli wayuhé bapakku?”

⁸Abnèr nesu banget, awit sangka tembungé Isybosèt mau, tembungé: “Kula kuwi apa endas asu sangka Yéhuda? Nganti saiki kula tansah nindakké kasetian kula marang brayaté Saul, bapakmu, ya marang para seduluré lan marang para kantyané, lan kula tansah ngéman sampéyan aja nganti tiba ing tangané Daved, nanging saiki sampéyan ndakwa kula mlaku ala karo wong wadon?

⁹Muga Gusti Allah ngekèki paukuman marang Abnèr, malah ngliwati sangka kuwi, yèn kula ora nindakké marang Daved sing dijanjèkké karo GUSTI karo sumpah marang piyambaké.

¹⁰Ya kuwi mindah kratoné Saul lan ngedekké damparé kratoné Daved, nganti ngwasani Israèl lan Yéhuda, wiwit ing Dan nganti teka ing Bèrsyéba.”

¹¹Lan Isybosèt ora bisa nyauri sak ketyap-ketyapa marang Abnèr, awit sangka wediné marang dèkné.

¹²Abnèr terus kongkonan marang ngarepé Daved lan diweling: “Negara kuwi duwèké sapa? Kula njaluk supaya nggawé perjanjian karo kula, kula tenan bakal ngréwangi sampéyan, supaya kabèh wong Israèl pada mèlu sampéyan.”

¹³Semauré Daved: “Ya apik, aku bakal nggawé perjanjian karo kowé, mung waé ana sak perkara sing tak jaluk marang kowé, ya kuwi kowé ora bakal nemoni aku, yèn kowé ora masrahaké Mikal, anaké Saul, yèn kowé ngadep ing ngarepku.”

¹⁴Daved uga kongkonan wong nemoni Isybosèt, anaké Saul, karo paweling: “Bojoku Mikal sampéyan balèkké marang kula malih, sing wis kula tuku karo ikuté wong lanang Filistèn 100.”

¹⁵Isybosèt terus kongkonan njupuk wong wadon kuwi sangka omahé Paltièl, anaké Lais.

¹⁶Lan bojoné ngetutké wong wadon kuwi karo nangis nganti tekan ing Bahurim. Abnèr terus nyentak marang dèwèké: “Wis muliha!” Wong mau terus mulih.

¹⁷Ing waktu kuwi Abnèr rembukan karo para pinituwané Israèl, tembungé: “Wis suwé sampéyan ngarepké supaya Daved dadi ratu ngwasani sampéyan.

¹⁸Hayuk saiki sampéyan pada nandangi, awit GUSTI wis ngomong marang Daved mengkéné: Lantaran abdi-Ku Daved Aku bakal ngluwari umat-Ku Israèl sangka tangané wong Filistèn lan sangka tangané sakkèhé mungsuhé.”

¹⁹Abnèr uga rembukan karo wong Bényamin; Abnèr uga terus lunga menyang Hébron, ngrembuk karo Daved kabèh perkara sing wis dianggep apik karo wong Israèl lan sakkèhé turunané Bényamin.

²⁰Bareng Abnèr ngadep ing ngarepé Daved, ditutké wong rong puluh, Daved terus nganakké pésta kanggo Abnèr lan wong-wongé.

²¹Abnèr ngomong marang Daved: “Lilanana kula nglumpukké kabèh wong Israèl ing ngarepé ratu, supaya pada nggawé perjanjian karo sampéyan lan sampéyan, terus dadi ratu ngwasani kabèh sing sampéyan karepaké.” Daved terus nglilani Abnèr lunga karo slamet.

²²Daved lan sak balané ijik waé mulih sangka enggoné ngluruk dituntun karo Yoab lan nggawa barang rayahané okèh. Nanging Abnèr wis mundur sangka ngarepé Daved ing Hébron, awit Abnèr wis dililani lunga karo slamet.

²³Bareng Yoab wis mulih ditutké sak balané, dikèki weruh mengkéné: “Abnèr, anaké Nèr, wis nemoni marang Daved, lan wis dililani mulih karo slamet.”

²⁴Yoab terus nemoni Daved, tembungé: “Apa ta sing sampéyan tandangi kuwi? Abnèr wis nemoni sampéyan, kenèng apa sampéyan dililani mulih mengkéné waé?

²⁵Sampéyan apa ora ngerti watekké Abnèr anaké Nèr kuwi? Tekané bakal masrahaké sampéyan lan supaya ngerti rantyaman sampéyan lan bakal weruh kabèh, sing bakal sampéyan tandangi.”

²⁶Sakwisé kuwi Yoab mulih sangka ngarepé Daved lan kongkonan wong nututi Abnèr, terus digawa bali sangka sumur Sira ora dingertèni karo Daved.

²⁷Waktu Abnèr bali menyang Hébron, Yoab ngajak minggir dèkné sedilut menyang ing tengahé gapura, étok-étok ngajak rembukan dèkné meneng-meneng, terus disuduk wetengé ing kono nganti mati, mbales getihé Asaèl, adiké.

²⁸Bareng Daved krungu perkara kuwi, dèkné ngomong: “Aku lan kratonku ora kesalahan ing ngarepé GUSTI, nganti sak lawas-lawasé kanggo getihé Abnèr anaké Nèr kuwi.

²⁹Bèn kuwi disangga karo Yoab déwé lan sakkèhé brayaté. Ing sak turun-turunané ora pedot-pedot anaa sing lara umbelen, lara lépra, sing mlaku nganggo teken, sing mati karo pedang, utawa kekurangan pangan.”

³⁰Mengkono enggoné Yoab lan Abisai seduluré, matèni Abnèr, awit Abnèr matèni Asaèl seduluré ing Gibéon, ing peperangan.

³¹Daved ngomong marang Yoab lan marang para rayat sing ngadep dèkné: “Hayuk pada nyuwèka sandanganmu lan sabukana mori kasusahan lan nangisa ing ngarepé layoné Abnèr.” Daved déwé uga lunga ing mburiné layon.

³²Waktu wong pada ngubur Abnèr ing Hébron, Daved nangis karo swara banter ing kuburané Abnèr lan kabèh rayat ya pada nangis.

³³Awit sangka Abnèr kuwi Daved nggawé kidung tangisané iki: “Kenèng apa Abnèr matiné kaya wong bodo,

³⁴tanganmu tanpa dibanda lan sikilmu ora diranté, matimu kaya wong sing mati awit tumindak ala.” Lan para rayat kabèh mundak banget enggoné pada nangis awit sangka dèkné.

³⁵Kabèh wong pada nemoni Daved, nggawa mangan marang dèkné ing waktu wayah awan, nanging Daved sumpah, tembungé: “Supaya Gusti Allah nibakké paukuman marang aku mengkéné, malah ngungkuli sangka kuwi, yèn sak durungé srengéngé mingslep aku nganti ngrasakaké roti utawa liyané.”

³⁶Waktu wong kabèh weruh perkara kuwi, nganggep bab kuwi apik kaya enggoné pada nganggep apik kabèh sing ditindakké karo Daved.

³⁷Dadiné para rayat kabèh, uga sakkèhé wong Israèl ing dina kuwi pada ngerti, yèn enggoné Abnèr mati kuwi duduk karepé ratu.

³⁸Terus ngomong marang para pegawéné: “Apa kowé pada ora ngerti, yèn ing dina iki ana penggedéné, wong gedé ing Israèl sing nemoni pati?

³⁹Nanging aku iki saiki ijik ringkih, senajan wis dijebatani dadi ratu, nanging wong-wong kuwi, anak-anaké Seruya, kuwaté pada ngungkuli aku. Supaya GUSTI ngekèki mbales marang wong sing nindakké memala tyotyok karo penggawéné sing ala.”