Read Caribbean Javanese 2 Samuèl 4 Bible Online

2 Samuèl 4 - Caribbean Javanese bible

2 Samuèl 4

¹Waktu anaké Saul krungu yèn Abnèr wis mati ing Hébron, terus ilang kekendelané lan wong Israèl pada kagèt.

²Anaké Saul nduwé grombolan loro, sing siji jenengé Baana lan sijiné Rekab, loro-loroné anaké Rimon, wong Bényamin sangka Beerot. Awit Beerot kuwi uga diitung klebu panggonané Bényamin.

³Wong Beerot wis pada ndelik menyang ing Gitaim lan dadi wong mantya ing kana nganti sepréné.

⁴Yonatan, anaké Saul nduwé anak lanang, sing tyiri sikilé. Umuré ijik limang taun, waktu ana kabar bab Saul lan Yonatan sangka Yisreèl. Waktu semono digéndong digawa mblayu karo sing momong, nanging enggoné mblayu kesusu anak mau tiba terus dadi pintyang, jenengé Méfibosèt.

⁵Anaké Rimon, wong Beerot mau, ya kuwi Rekab lan Baana pada lunga, terus teka ing omahé Isybosèt, waktu dina panas tenan; Isybosèt ijik turu ing wayah awan.

⁶Ketepakan wong sing jaga lawangé kuwi ngantuk, lan keturon, waktu ijik nginteri gandum.

⁷Wong loro kuwi pada mlebu ing omahé, Isybosèt ijik turu ing kamaré, terus dipatèni lan diketok sirahé. Sirahé digawa ing mbengi kuwi, ngliwati dalan sing sangka Araba-Yordan.

⁸Sirahé Isybosèt mau digawa marang Daved ing Hébron lan ngomong marang ratu: “Iki sirahé Isybosèt, anaké Saul, mungsuh sampéyan sing arep matèni sampéyan; ing dina iki GUSTI wis nglilani sampéyan, mbales marang Saul lan turunané.”

⁹Nanging Daved ngomong marang Rekab lan Baana, anak-anaké Rimon, wong Beerot, préntahé: “Kanggo asmané GUSTI sing urip, sing wis ngluwari nyawaku sangka kabèh kangèlan!

¹⁰Waktu ana wong sing nggawa kabar mengkéné: Saul wis mati! lan nganggep dèwèké kaya wong sing ngabaraké kabar apik, aku terus nyekel lan matèni wong kuwi ing Siklag, lan kaya mengkono enggonku ngekèki upahé kanggo kabaré,

¹¹malah menèh saiki sakwisé wong duraka matèni wong sing bener ing omahé ing peturoné; apa aku ora nyeluk tebusan getihé sangka kowé, lan ngentèkké kowé sangka bumi?”

¹²Sakwisé ngomong mengkono Daved ngongkon marang abdiné, supaya matèni wong-wong kuwi; tangané lan sikilé diketok, layoné digantung ing pinggir telaga ing Hébron. Nanging sirahé Isybosèt dijikuk lan dikubur ing kuburané Abnèr ing Hébron.