Read Caribbean Javanese 2 Samuèl 8 Bible Online

2 Samuèl 8 - Caribbean Javanese bible

2 Samuèl 8

¹Sakwisé kuwi Daved nggempur wong Filistèn lan dikalahké. Daved terus ngrebut kuta-kuta sangka tangané wong Filistèn.

²Daved terus ngalahké wong Moab, wong-wong kuwi pada dipréntahké ngglétak ing bumi lan tanahé diukur karo tali; sing diukur tikel loroné tali kuwi pada dipatèni, lan sing sak dawané tali diuripi. Wong Moab pada teluk marang Daved diwajipké mbayar pajek.

³Sak terusé Daved ngalahké Hadadèzèr anaké Rekab, ratu ing Soba, waktu dèkné arep mulihké pangwasané ing kali Efrat.

⁴Daved ngukum sangka bangsa kuwi wong 1700, suradadu jaran, lan 20.000 suradaduné daratan; Daved ngongkon ngetoki otot sikilé jaran sing nggèrèt kréta, mung jaran 100 sing dikarèkaké.

⁵Terus suradadu Aram sangka Damaskus teka ngréwangi Hadadèzèr, ratu ing Soba, nanging suradadu Aram kuwi sing dientèkké karo Daved wong 22.000.

⁶Daved terus ngekèki suradadu sak grombol kanggo ngenggoni panggonané wong Aram ing Damaskus. Wong Aram pada teluk marang Daved, terus diwajipké masrahaké pajek, GUSTI ngekèki kemenangan marang Daved menyanga ngendi waé enggoné ngluruk.

⁷Sakwisé kuwi Daved ngongkon ngangkati tamèng-tamèng emas sing dienggo suradaduné Hadadèzèr, terus digawa menyang Yérusalèm.

⁸Uga Daved ngangkati tembaga okèh banget sangka Betak lan Berotai, ya kuwi kuta-kutané Hadadèzèr.

⁹Waktu Toi, ratu ing Hamat, krungu yèn Daved wis ngalahké kabèh suradaduné Hadadèzèr,

¹⁰Toi terus kongkonan Yoram, anaké, nemoni Daved, mbagèkké keslametan lan ngutyapké slamet, awit wis ngluruk perang nglawan Hadadèzèr, lan wis ngalahké dèkné, Hadadèzèr kuwi kerep nglawan Toi. Uga Yoram masrahaké barang-barang slaka, emas lan tembaga.

¹¹Barang-barang kuwi dipiji Daved kanggo GUSTI, semono uga karo barang-barang slaka lan emas, sing sangka sakkèhé bangsa sing dikalahké,

¹²ya kuwi slaka lan emas sangka bangsa Aram, bangsa Moab, bangsa Amon, bangsa Filistèn lan bangsa Amalèk uga sangka sing direbut sangka Hadadèzèr anaké Rekab, ratu ing Soba.

¹³Lantaran mengkono Daved terus kesuwur asmané, lan waktu mulih, matèni suradaduné Edom 18.000 ing legokan Asin.

¹⁴Dèkné terus mernahké suradaduné sak grombol kanggo ngenggoni Edom, nganti panggonané Edom kabèh dadi abdiné Daved. GUSTI ngekèki kemenangan marang Daved menyanga ngendi waé enggoné ngluruk perang.

¹⁵Mengkono Daved enggoné dadi ratu ing sak tanah Israèl kabèh, lan njejekké keadilan lan sing bener kanggo bangsa kabèh.

¹⁶Yoab anaké Seruya dipatyak dadi komandané perang; Yosafat anaké Ahilud sing njaga bandané kraton,

¹⁷Sadok anaké Ahitub lan Akimèlèk anaké Abyatar dadi imam; Seruya dadi sèkretarisé kraton;

¹⁸Benaya anaké Yoyada dadi penggedéné wong Krèti lan Plèti; nanging anak-anaké Daved dadi imam.